އިނގިރޭސި ޕްރިމިއާ ލީގުގައި މި މަހުގެ ކުރީކޮޅު ޗެލްސީ އާއި ނޮޓިންގްހަމް ފޮރެސްޓް ބައްދަލުކުރި މެޗުގައި ދެ ޓީމުގެ ގިނަ އަދަދެއްގެ ކުޅުންތެރިން އެއްވެ، ހިންގި ހަމަނުޖެހުމާ ގުޅިގެން އިނގިރޭސި އެފްއޭ އިން އެ ދެ ކްލަބު ޖޫރިމަނާކޮށްފިއެވެ.
އެފްއޭ އިން ފޮރެސްޓް ޖޫރިމަނާކުރީ 125,000 ޕައުންޑް (162,300.00 އެމެރިކާ ޑޮލަރު) އިންނެވެ. އަދި ޗެލްސީ ވަނީ 40,000 ޕައުންޑުން ޖޫރިމަނާކޮށްފައެވެ.
"ނޮޓިންގްހަމް ފޮރެސްޓް އަދި ޗެލްސީގެ ކުޅުންތެރިން މެޗުގެ 88 ވަނަ މިނެޓުގައި އެކަށީގެންނުވާ އަދި/ނުވަތަ ދެބައިމީހުން އެއްބަޔަކު، އަނެއްބައެއް ރުޅިއެރުވުމުގެ ގޮތުން ޢަމަލުކުރިކަމަށް ތުހުމަތުކުރެވުނެވެ. އަދި ދެ ކުލަބުންވެސް މި ތުހުމަތު ޤަބޫލުކުރިއެވެ،" އެފްއޭއިން ނެރުނު ބަޔާނެއްގައި ވެއެވެ.
މި އޮކްޓޫބަރު މަހުގެ ހަވަނަ ދުވަހުގައި ސްޓެމްފޯޑް ބްރިޖްގައި ކުޅުނު އެ މެޗުގައި، ފޮރެސްޓްގެ ނީކޯ ވިލިއަމްސް ޗެލްސީގެ މާކް ކުކުރޭޔާ އަށް ކުރި ފައުލަކާ ގުޅިގެން އޭނާ ގޮސް އެ ޓީމުގެ ކޯޗު، އެންޒޯ މަރެސްކާގެ ގައިގަ ޖެހުމުން ވެއްޓުނެވެ. މިކަމާ ގުޅިގެން ދެ ޓީމުގެ ގިނަ އަދަދެއްގެ ކުޅުންތެރިން، އޭގެ ތެރޭގައި ބެންޗުގައި ތިބި ބައެއް ކުޅުންތެރިންވެސް ހިމެނޭގޮތަށް، އެއްވެ އެކަކު އަނެކަކަށް ޖެހި، ކޮއްޕާލައި، ހަމަނުޖެހުން ހިންގިއެވެ. މި މެޗުގައި ޖުމްލަ 11 ރީނދޫ ކާޑު ދައްކާފައިވެއެވެ.
މީގެކުރީން، އިނގިރޭސި އެފްއޭ އިން ވަނީ މި މަހުގެ ކުރީކޮޅު ފޮރެސްޓްގެ ވެރިޔާ، އެވަންޖެލޯސް މަރިނާކިސް އަށް ވެސް އަދަބުދީފައެވެ. އެއީ، މިދިޔަ ސެޕްޓެންބަރު މަހުގެ 28 ވަނަ ދުވަހު ލީގުގައި ފުލަމްއާ ދެކޮޅަށް ކުޅުނު މެޗަށްފަހު ސިޓީ ގްރައުންޑްގެ ޓަނަލް ސަރަހައްދުގައި މަރިނާކިސް ނުރަނގަޅު ގޮތެއްގައި އަމަލުތައް ބަހައްޓާފައިވާތީއެވެ.
އެފްއޭ އިން ވަނީ، އެ މެޗުގެ އޮފިޝަލުން ޓަނަލްގައި ހިނގާފައި ދިޔައިރު އެމީހުންގެ ކައިރީގައި ބިމަށް ކުޅު ޖެހުމާ ގުޅިގެން ފޮރެސްޓްގެ ވެރިޔާ، މަރިނާކިސް އަށް ފަސް މެޗަށް ސްޓޭޑިއަމަށް ވަނުން މަނާކޮށްފައެވެ.
މީގެއިތުރުން، ނިމިދިޔަ ސީޒަނުގެ ލީގުގައި ފޮރެސްޓް ކުޅުނު މެޗެއްގައި އިންސާފުކުރި ވީއޭއާރް އޮފިޝަލަކަށް ފާޑުކިޔުމުން ވެސް އެފްއޭ އިން ވަނީ އެ ޓީމު ޖޫރިމަނާކޮށްފައެވެ.