މައިލޯ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ކަޕުގައި ޕޮލިސް ކުލަބު، ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) ގެ ކްލަބް އެޗްޑީސީ އަދި ސްޕޯޓްސް ކުލަބު ސިޓީން ކުޅުނު ފުރަތަމަ މެޗު ކާމިޔާބުކޮށް ފެށުން ރަނގަޅުކޮށްފިއެވެ.
އިއްޔެ ފެށި އެސޯސިއޭޝަން ކަޕްގެ ފުރަތަމަ މެޗުގައި ޕޮލިސް ކްލަބުން ނުކުތީ، ބްލޫސް ފޯ ވޮލީބޯލްއާ ދެކޮޅަށެވެ. މި މެޗު ޕޮލިސް ކްލަބުން ކާމިޔާބުކުރީ ސީދާ ތިން ސެޓުންނެވެ. މި މެޗުގެ ސެޓުތައް ދިޔައީ, 22-25, 21-25 އަދި 19-25 އިންނެވެ. މި މެޗުގެ މޮޅު ކުޅުންތެރިޔަކީ ޕޮލިސް ކްލަބްގެ ދިރްވިލް ނަޔާންދަބާއި އެވެ.
ދެވަނަ މެޗުގައި އެޗްޑީސީ އިން ނުކުތީ ކްލަބް ހާފްލައިން ލިންކޭޖްއާ ދެކޮޅަށެވެ. މި މެޗު އެޗްޑީސީ އިން ވަނީ ފަސޭހަކަމާއެކު ސީދާ ތިން ސެޓުން ކާމިޔާބު ކޮށްފަ އެވެ. މި މުބާރާތައް އެޗްޑީސީ އިން ނުކުތްއިރު, އެ ޓީމުގައި ގައުމީ ޓީމުގެ ގިނަ ކުޅުންތެރިންތަކެއް ހިމެނެ އެވެ. މި މެޗުގެ ސެޓުތައް ދިޔައީ, 25-22, 25-19 އަދި 25-16 އިންނެވެ. މި މެޗުގެ މޮޅު ކުޅުންތެރިޔަކީ އެޗްޑީސީގެ ޒަހަންތަމީރް ޒަހީބެކް އޫލޫ އެވެ.
އިއްޔެ ކުޅުނު ތިން ވަނަ މެޗުގައި ސްޕޯޓްސް ކްލަބް ސިޓީ އިން ނުކުތީ ސިޓީ ސްޕޯޓްސް ކްލަބާ ދެކޮޅަށެވެ. މި މެޗު, ސްޕޯޓްސް ކްލަބް ސިޓީ އިން ގެންދިޔައީ, 3-1 ސެޓުންނެވެ. މެޗުގެ ސެޓުތައް ދިޔައީ, 25-27, 25-20, 25-17 އަދި 25-18 އިންނެވެ. މި މެޗުގެ މޮޅު ކުޅުންތެރިޔަކީ ސިޓީ ސްޕޯޓްސް ކްލަބްގެ ޕަރްނީތް ތެންދެނާ އެވެ.