އިޓާލިއަން ލީގުގައި އޭސީ މިލާނާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް، ތާވަލުގެ ކުރީގައި ނާޕޮލީން ހަތް ޕޮއިންޓުގެ ލީޑެއް ނަގައިފިއެވެ.
ނާޕޮލީން ވަނީ ލީގުގައި މިހާތަނަށް ކުޅުނު 10 މެޗުން 25 ޕޮއިންޓާއެކު ތާވަލުގެ އެއްވަނަ މަގާމް ހޯދާފައެވެ. ދެވަނައިގައި އޮތް އިންޓަރ މިލާނަށް 9 މެޗުން 18 ޕޮއިންޓް ލިބިފައިވާއިރު، އޭސީ މިލާން އޮތީ ކުޅުނު 9 މެޗުން ލިބުނު 14 ޕޮއިންޓާއެކު ތާވަލުގެ އަށްވަނައިގައެވެ.
މި އަހަރުގެ ލީގުގެ ފުރަތަމަ މެޗުން ނާޕޮލީ ބަލިވި ނަމަވެސް، އެންޓޯނިއޯ ކޮންޓޭގެ އިރުޝާދުގެ ދަށުން ކުޅެމުންދާ ނާޕޮލީން ވަނީ އޭގެ ފަހުން ލީގުގައި ކުޅުނު ނުވަ މެޗުން ބަލިވެފައެއް ނުވެއެވެ. އޭގެ ތެރެއިން 8 މެޗުން މޮޅުވެފައިވާއިރު އެއް މެޗު ވަނީ އެއްވަރުވެފައެވެ.
މިލާނުގެ ގިއުސެއްޕެ މެއާޒާ ސްޓޭޑިއަމްގައި ކުޅުނު މި މެޗުގެ ފަސްވަނަ މިނިޓުގައި ނާޕޮލީގެ ބެލްޖިއަމް ފޯވަޑް ރޮމެލޯ ލުކާކޫ ވަނީ ލަނޑެއް ޖަހައި، އެ ޓީމަށް ކުރި ހޯދަދީފައެވެ.
މި ލަނޑަށްފަހު އޭސީ މިލާނުން ލަނޑެއް ޖެހުމަށް ގިނަ މަސައްކަތްތަކެއްކޮށް، ނާޕޮލީގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލި ނަމަވެސް، ނާޕޮލީގެ ގޯލްކީޕަރު ވަނީ ގިނަ ހަމަލަތަކެއް ދިފާއުކޮށްފައެވެ.
އޭސީ މިލާނަށް މި މެޗުގައި ލިބުނު ރަނގަޅު ފުރުސަތުތަކެއް ބޭކާރުވެފައިވަނިކޮށް، ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް ނާޕޮލީގެ ޚްވިޗާ ކްވަރަޝްކޭލިއާ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލުކޮށްފައެވެ.
ދެވަނަ ހާފްގެ ކުޅުން ފެށުނުތާ ގިނައިރުތަކެއް ނުވަނީސް އޭސީ މިލާނުގެ ފޯވަޑް އަލްވާރޯ މޮރާޓާ ބޮލުން ޖަހާ ގޯލުގެ ތެރެއަށް ބޯޅަ ފޮނުވާލި ނަމަވެސް، ރެފުރީ ވަނީ އެއީ އޮފްސައިޑް ލަނޑެއްގެ ގޮތުގައި ނިންމާފައެވެ.