މި އަހަރުގެ ކޮޕާ ލިބަޓަޑޯރެސްގެ ސެމީ ފައިނަލްގެ ދެވަނަ ލެގުގައި އާޖެންޓީނާގެ ރިވާ ޕްލޭޓާ އެއްވަރުކޮށް، ބްރެޒިލްގެ އެތުލެޓިކޯ މިނެއިރޯ ފައިނަލަށް ދަތުރުކޮށްފިއެވެ.
މިއީ އެ ޓީމުން ކޮޕާ ލިބަޓަޑޯރެސްގެ ފައިނަލަށް ދަތުރުކުރި ދެވަނަ ފަހަރެވެ. މީގެކުރީން، އެތުލެޓިކޯ މިނެއިރޯ ވަނީ 2013 ވަނަ އަހަރުގެ މުބާރާތް ކާމިޔާބުކޮށްފައެވެ.
އެތުލެޓިކޯ މިނެއިރޯ އިން މި ފަހަރުގެ ފައިނަލުން ޖާގަ ހޯދީ ދެ މެޗުގެ އެގްރިގޭޓުން 3-0 އިން ކުރިހޯދައިގެންނެވެ. އެއީ، މި ދެ ޓީމުގެ ދެމެދުގައި މި މަހުގެ 23 ވަނަ ދުވަހު ބްރެޒިލްގައި ކުޅުނު މެޗުން 3-0 ގެ ނަތީޖާއަކުން އެތުލެޓިކޯ މިނެއިރޯއިން ކާމިޔާބުކުރިއިރު، ރޭގެ މެޗު ލަނޑެއް ނުޖެހި އެއްވަރުވުމާ ގުޅިގެންނެވެ.
މި އަހަރުގެ މުބާރާތުގެ ފައިނަލް ކުޅުމަށް ހަމަޖެހިފައިވާ މޮނިއުމެންޓަލް ސްޓޭޑިއަމްގައި އަމިއްލަ ސަޕޯޓަރުންގެ ކުރިމަތީގައި ކުޅުނު މި މެޗުގައި ގިނަވަގުތު ބޯޅަ ގެންގުޅެ ގިނަ ހަމަލާތައް ފޮނުވާލީ ރިވާ ޕްލޭޓުންނެވެ.
މި މެޗުގެ ފުރަތަމަ ހާފުގައިވެސް އެ ޓީމުގެ ކުޅުންތެރިން ފޮނުވާލި ނުރައްކާތެރި ގިނަ ހަމަލާތަކެއް އެތުލެޓިކޯ މިނެއިރޯގެ ގޯލްކީޕަރު، އެވާސަން ވަނީ ހުއްޓުވާފައެވެ.
މި މުބާރާތުގެ ފައިނަލްގެ ދެވަނަ ޖާގަ ކަށަވަރުވެގެންދާނީ އަނެއް ސެމީގައި ބްރެޒިލްގެ ބޮޓަފޯގޯއާ އުރުގުއޭގެ ޕެނަރޯލް ބައްދަލުކުރާ މެޗުން މޮޅުވާ ޓީމެކެވެ. މި ދެ ޓީމުގެ ދެމެދުގައި ކުޅެވުނު ފުރަތަމަ ލެގުގެ މެޗުން ބޮޓަފޯގޯ މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ.
ކޮޕާ ލިބަޓަޑޯރެސްގެ އެންމެ ފަހުން ކުޅެވުނު ފަސް މުބާރާތުގެ ޗެމްޕިއަންކަން ވެސް ބްރެޒިލްގެ ކްލަބުތަކުން ހޯދާފައިވާއިރު، މި އަހަރުގެ މުބާރާތުގެ ފައިނަލް މެޗު އޮތީ އަންނަ ޑިސެންބަރު މަހުގެ އެއްވަނަ ދުވަހު އެވެ.