ޔޫރޯ ފުޓްބޯޅަ މުބާރާތުގައި ރިޕަބްލިކް އޮފް އަޔަލެންޑް އަދި ސްވިޑެންގެ ކުރިމަތިލުން އެއްވަރުވެގެން ނިމިއްޖެއެވެ.
ރޭ ކުޅުނު މި މެޗް އެއްވަރުވީ އެކެއް އެކެއްގެ ނަތީޖާއަކުންނެވެ. މެޗުގެ ފުރަތަމަ ގޯލް ޖަހައި ލީޑް ނެގީ ފުރަތަމަ ހާފްގައި މޮޅު ކުޅެމެއް ދެއްކި އަޔަލެންޑް ޓީމުންނެވެ. މި ލަނޑު އެޓީމަށް ޖަހައިދިނީ ހޫލަހާންއެވެ.
އަޔަލެންޑްގެ ގޯލާއިއެކީގައި ސްވިޑެން އެޓީމްގެ ކުޅުން ރަނގަޅުކޮށް ގިނަ ހަމަލާތަކެއް އުފެއްދޭތޯ މަސައްކަތްކުރިއެވެ. ނަތީޖާއަކަށްވެގެންދިޔައީ ކެއިރެން ކްލާކް އަތުން ބައިކޮޅަށް ވަތް ގޯލާއިއެކު ނަތީޖާ ހަމަހަމަވެގެންދިއުމެވެ. މީ މި މުބާރާތުގައި ބައިކޮޅަށް ވަތް ފުރަތަމަ ގޯލްކަން ފާހަގަކޮށްލެވެއެވެ.
މެޗަށްފަހު އަޔަލެންޑްގެ ކޯޗް މާޓިން އޯނިލް ބުނީ ރޭގެ މެޗުގައި އަޔަލެންޑްގެ ނަސީބު ދެރައީކަމަށާއި، ކުޅުންތެރިން ދެއްކި ކުޅުމާއިމެދު އޭނާގެ އެއްވެސް ޝަކުވާއެއް ނެތްކަމަށެވެ. އަދި ކުރިއަށް ގްރޫޕް ސްޓޭޖްގައި އޮތް ވަރުގަދަ ދެ މެޗަށް ނުކުންނައިރު ޓީމް އޮތް ފެންވަރު ދެނެގަނެވިއްޖެކަމަށެވެ.