މެންޗެސްޓާ ސިޓީގެ މައްޗަށް ފުރަތަމަ ފަހަރަށް ބޯންމަތުން ކުރި ހޯދާފައިވާއިރު, މި މެޗުން ބަލިވުމާއެކު 6 ޑިސެމްބަރ 2023 އިން ފެށިގެން މެޗަކުން ބަލިނުވެ ސިޓީން ދަމަހައްޓަމުން އަންނަ ރެކޯޑް ވަނީ ނިމުމަކަށް އައިސްފަ އެވެ. އަދި މިއީ ހަތަރު ދުވަހުގެ ތެރޭގައި ސިޓީ ބަލިވި ދެވަނަ މެޗެވެ. އެ ޓީމު ވަނީ މިދިޔަ ހަފްތާގައި ކަރަބާއޯ ކަޕުގައި ޓޮޓްންހަމް ހޮޓްސްޕަރ އާއި ދެކޮޅަށް ކުޅުނު މެޗުންވެސް ބަލިވެފަ އެވެ.
މި މެޗުން ބަލިވުމާއެކު ސިޓީ ވަނީ ލީގުގައި މިހާތަނަށް ކުޅުނު ދިހަ މެޗުން 23 ޕޮއިންޓާއެކު ތާވަލުގެ ދެވަނަ އަށް ވެއްޓިފަ އެވެ. އެއްވަނައިގައި އޮތީ 25 ޕޮއިންޓާއެކު ލިވަޕޫލް އެވެ. އަދި މި މޮޅާއެކު ބޯންމަތު ވަނީ 10 މެޗުން 15 ޕޮއިންޓާއެކު ތާވަލުގެ އަށްވަނަ އަށް ޖެހިލާފަ އެވެ.
ބޯންމަތުގެ ވައިޓަލިޓީ ސްޓޭޑިއަމްގައި ކުޅުނު މި މެޗުގެ 9 ވަނަ މިނިޓުގައި އެންޓޮއިން ސެމެންޔޯ ވަނީ ލަނެއް ޖަހާ ބޯންމަތުއަށް ކުރި ހޯދަދީފަ އެވެ. މިއީ މި ސީޒަނުގައި އޭނާ ޖެހި ހަތަރުވަނަ ގޯލެވެ.
މެޗުގެ ފުރަތަމަ ހާފްގައި ސިޓީގެ ފަރާތުން ދަށް ކުޅުމެއް ފެނިގެންގޮސްދައިވާ މި މެޗުގެ ދެވަނަ ހާފްގެ ކުޅުން ފެށުނުތާ ގިނައިރުތަކެއް ނުވަނީސް މިލޮސް ކާރކޭޒް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މި މެޗުގައި މެންޗެސްޓަރ ސިޓީން ޖެހި ހަމައެކަނި ލަނޑު މެޗުގެ 82 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ޖޮސްކޯ ގްވަޑިއޯލް އެވެ. މިއީ ރަށުން ބޭރުގައި އޭނާ ކުޅުނު ހަތް މެޗުގެ ތެރޭގައި އޭނާ ޖެހި ހަވަނަ ލަނޑެވެ.
މި މެޗުން ބަލިވުމާއެކު ސިޓީގެ ކޯޗު ޕެޕް ގަޑިއޯލާ ބުނެފައިވަނީ އޭނާއަށް އަނިޔާގެ މައްސަލަ އިންތިހާއަށް ބޮޑުވެފައިވާ ކަމަށާއި މި މެޗަށް ނިކުތްއިރު އެއްކޮށް ފިޓްކޮށް ތިބީ 13 ކުޅުންތެރިން ކަމަށެވެ.
މި މެޗުން މޮޅުވުމުގެ ކުރިން މެންޗެސްޓަރ ސިޓީ އަތުން ބޯންމަތުއަށް އެންމެ ފަހުން ޕޮއިންޓެއް ލިބިފައިވަނީ 1989 އަދި 1999 ވަނަ އަހަރު ކުޅުނު ދެ މެޗުވެސް އެއްވަރުވެ ލިބުނު ޕޮއިންޓެވެ.