ޓެނިސް އެސޯސިއޭޝަން އޮފް މޯލްޑިވްސްގެ ރައީސްކަމުގެ ދެވަނަ ދައުރަކަށް އަޙްމަދު ހަފީޒް އިންތިޚާބުވެވަޑައިގެންފިއެވެ.
ދެވަނަ ދައުރަކަށް ހަފީޒް އިންތިހާބުވެވަޑައިގެންނެވީ އިއްޔެ ކުރިއަށްދިޔަ އެސޯސިއޭޝަނުގެ އިންތިހާބުގައެވެ. މި އިންތިހާބުުގައި ރައީސްކަމާއި ނައިބު ރައީސްކަމުގެ އިތުރުން މެމްބަރުންގެ ތެރެއިން އިންތިހާބުކުރާ ތިން މެމްބަރުން ވަނީ ހޮވާފައެވެ. ކޮންމެ މަގާމަކަށްވެސް ކުރިމަތިލާފައިވަނީ އެކަކެވެ. އެހެންކަމުން ނެގީ ފެންނަ ނުފެންނަ ވޯޓެކެވެ.
އެސޯސިއޭޝަނުގެ ރައީސްކަމަށް ހަފީޒް ދެވަނަ ދައުރަކަށް އިންތިހާބުވެވަޑައިގެންނެވީ ވޯޓުލި ޖުމްލަ 95 މެމްބަރުންގެ 93 ވޯޓާއެކު އެވެ. ނުފެންނަ ކަމަށް ދެ މެމްބަރުން ވަނީ ވޯޓުލާފައެވެ. ހަފީޒް ވަނީ 2020-2024 އާއި ހަމައަށް އެއް ދައުރު ފުރިހަމަކުރައްވާފައެވެ. ދެވަނަ ދައުރުގެ މުއްދަތު ހަމަވާނީ 2028 ގައެވެ.
ޓެނިސް އެސޯސިއޭޝަނުގެ ނައިބު ރައީސްކަމަށް އިންތިހާބުވަޑައިގެންނެވީ ކުރީގެ މަޝްހޫރު ޓެނިސް ތަރި އިގްނާޒް މަންސޫރެވެ. މިއީ އޭނާ މިފަދަ މަގާމަކަށް އިންތިހާބުވެވަޑައިިިގެންނެވި ފުރަތަމަ ފަހަރެވެ. އޭނާއަށް ޖުމްލަ 93 ވޯޓު ވަނީ ލިބިފައެވެ. އަދި ނުފެންނަ ކަމަށް އެއް ވޯޓު ލިބުނުއިރު ބާތިލް އެއް ވޯޓު ހިމެނެއެވެ.
އެސޯސިއޭޝަނުގެ ބޯޑަށް އިންތިހާބުވި ތިން މެމްބަރުންނަކީ އައިމިނަތު މަލީލާ ސޯލިހާއި ހަސަން ޝާމް އަދި މުހައްމަދު ފަސީހެވެ. މިއީ މި މަގާމަށް ޝާމް އިންތިހާބުވި ހަތަރުވަނަ ދައުރެވެ. އަދި މިއީ ފަސީހު އާއި މަލީލާ މި މަގާމުގައި ހޭދަކުރާނެ ފުރަތަމަ ދައުރެވެ.
މި އިންތިހާބުގައި އެސޯސިއޭޝަނުގެ ވޯޓުލުމުގެ ފުރުސތަު ލިބިފައިވާ 275 މީހުންގެ ތެރެއިން ވޯޓު ލާފައިވަނީ 95 މީހުންނެވެ.