ސިޓީ ބަލައިނުގަތީ އިޖުރާތްތައް ފުރިހަމަނުވާތީ، ސިފައިންނަށް އޭގެ ކުރިން އޮތީ ފިޔަވަޅު އަޅާފައި: ވީއޭއެމް
ސްޕޯޓްސް ކުލަބު ސިޓީން ހުށަހެޅި ސިޓީ ބަލައިނުގަތީ އިޖުރާތްތައް ފުރިހަމަނުވާތީ ކަމަށާއި، އެ ސިޓީގެ ކުރިން ދިވެހި ސިފައިންގެ ކުލަބުގެ ޓީމު ލިސްޓުގެ ބޭރުން ޖަހާފައިވާ ދެ ކުޅުންތެރިންނަށް ފިޔަވަޅު އަޅާފައިވާނެ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނެފިއެވެ.
މިހާރު ކުރިޔަށްދާ މައިލޯ ވޮލީބޯލް އެސޯސިއޭޝަން ކަޕް ސެމީ ފައިނަލު ތިން ވަނަ މެޗު ސްޕޯޓްސް ކުލަބު ސިޓީން ވަނީ ވީއޭއެމަށް ހުށައެޅި ސިޓީއަށް ޖަވާބުނުދޭ ކަމަށް ބުނެ މެޗު ދޫކޮށްލާފައެވެ. އެއާއެކު ފައިނަލުގެ ޖާގަ ލިބުނީ ހައުސިން ޑިވަލޮޕްމެން ކޯޕަރޭޝަން (އެޗްޑީސީ) އަށެވެ.
ވޮލީބޯލް އެސޯސިއޭޝަނުގެ އޮފިޝަލަކު ޕީއެސްއެމް ސްޕޯޓްސްއަށް މައުލޫމާތުދިން ގޮތުގައި އެ މެޗަށް ދެޓީމު ނުކުތްއިރު ސިޓީގެ ހުށަހެޅި މައްސަލައަށް ޖަވާބު ދީފަނުވަނީ އިޖުރާތަށް ފުރިހަމަނުވުމުން ކަމަށެވެ.
"ފުރަތަމަ ކަމަކަށް އެސޯސިއޭޝަން ސަމާލުކަމަށް އަންނަނީ ކުޅުންތެރިއެއް ސޯޝަލް މީޑިއާގަ އެކަން ހިއްސާކުރުމުން، އެހިިސާބުން ވީއޭއެމުން އަމިއްލައަށް އިސްނަގައިން މައްސަލަ ބެލީ، އެ ދުވަހު ސިޓީ އަންނަނީ ސިޓީއެއް އެގާރަ ޖަހާކަށްހާއިރު، އޭގަ އޮތީ ސިފައިންގެ ޓީމުން ލިސްޓުގެ ބޭރުން ޖަހާފައިވާ ދެ ކުޅުންތެރިންނަށް ފިޔަވަޅު އަޅައިދޭން، ސްޕޯޓްސް ކުލަބް ސިޓީގެ އެ ސިޓީ އައިމަ ޖަވާބުނުދިން ސަބަބަކީ އިޖުރާތު ފުރިހަމަނުވާތީ." އޮފިޝަލު ވިދާޅުވިއެވެ.
ވީއޭއެމް ކަޕް ކޮލިފިކޭޝަންގައި އެހެން ޓީމުތަކަށް ކުޅެފައިވާ ދެ ކުޅުންތެރިޔަކު ސިފައިންގެ ޓީމު ލިސްޓްގައި ޖަހައިގެން ކުޅުވާފައިވާ ކަމަށް ތުހުމަތުކޮށްފަ އެވެ. އެ މައްސަލަ ބަލައި އެކަމާ މެދު ފިޔަވަޅު އަޅައި ދިނުމަށް ވީއޭއެމަށް، ހުށަހަޅައިފަ އެވެ.
"ހުށައަޅާ މައްސަލައަށް 500 ރުފިޔާ ދައްކާފައެއް ނެތް. އެހެންވެ ޖަވާބުދިނުން ލާޒިމެއް ނޫން، އެ މައްސަލަ ބަލާކަށް ލާޒިމެއްވެސް ނޫން، އެކަމަކު ސޯޝަލް މީޑީއާގައި އައިމަ މައްސަލަ ބަލާ އެ ދެ ކުޅުންތެރިން އުނިކުރަން އަދި ތިން ހާހުން ޖޫރިމަނާކުރުމަށް ނިންމާފައިވޭ. އަދި އިތުރަށް މައްސަލަ ބަލަމުން ދަނީ" ޕީއެސްއެމް ސްޕޯޓްސް ވާހަކަދައްކަމުން އޮފިޝަލް ވިދާޅުވިއެވެ.
ޕީއެސްއެމް ސްޕޯޓްސްއަށް އެނގިފައިވާ ގޮތުގައި ސިޓީ އާއި ޑީއެސްސީ މެޗުގައި އެ ދެ ކުޅުންތެރިން ކުޅެފައެއް ނުވެއެވެ. ވީއޭއެމުން އޮފިޝަލަކު ބުނީ މިއީ މެޗުގެ ނަތީޖާއަށް ބަދަލު އަންނާނެ ކަމެއްގެ ގޮތުގައި ނުދެކޭ ކަމަށާއި ސިޓީއަށް ޖަވާބުނުދޭ ކަމަށްބުނެ ސެމީ މެޗު ނުކުޅެ ދޫކޮށްލުމަކީ ވަރަށް ޒިންމާދާރުކަން ކުޑަކޮށް ކޮށްފައިވާ ކަމެއް ކަމަށެވެ. އަދި އެއީ މަސްލަހަތު ގެއްލުވާލުމަށް ކޮށްފައިވާ ކަމެއްގެ ގޮތުގައި އެސޯސިއޭޝަނުން ދެކެއެވެ.
މާދަމާ ރޭ ކުޅޭ ފައިނަލުގައި އެޗްޑީސީން ނުކުންނާނީ ދިވެހި ސިފައިންގެ ކްލަބާ ދެކޮޅަށެވެ.