ތިލައުތުރު ފުޓްސަލް މުބާރާތް 2024 ހުޅުވުމުގެ ގޮތުން ކުޅުނު ތިލައުތުރު ޝީލްޑް މެޗު ހއ. ކެލާއިން ކާމިޔާބުކޮށްފިއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މުބާރާތް ފެށުމުގެ ގޮތުން މިއަދު ހަވީރު ކުޅުނު ޝީލްޑް މެޗުގައި ބައްދަލުކޮށްފައިވަނީ ކެލާ އާއި، ތިލައުތުރު ފުޓްސަލް މުބާރާތުގެ އެންމެ ފަހުގެ ޗެމްޕިއަން ވަށަފަރެވެ. މި މެޗު 3-1 ގެ ނަތީޖާއަކުން ކާމިޔާބުކޮށްފައިވަނީ ކެލާއިންނެވެ.
ކެލާ ފުޓްސަލް ދަނޑުގައި ކުޅުނު މި މެޗުގެ ވަރަށް ކުރީކޮޅު ވަށަފަރުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ޔަޒްދާން ރަޝީދެވެ. އެކަމަކު ފުރަތަމަ ހާފު ނިމުމުގެ ކުރިން ކެލާ ޓީމުން ވަނީ ނަތީޖާ އެއްވަރުކޮށްފައެވެ. ކޯނަރަކުން މި ލަނޑު އެ ޓީމަށް ޖަހައިދިނީ އިސްމާޢީލް އާސިފެވެ. އަދި ދެވަނަ ހާފުގައި އަޙްމަދު ވަހީދު ކާމިޔާބުކޮށްދިން ދެ ލަނޑާއެކު، ކެލާއިން ވަނީ އެ ޓީމު ކޮޅަށް ނަތީޖާ އަނބުރާލާފައެވެ.
މުބާރާތް ހުޅުވުމުގެ ގޮތުން ކުޅުނު ޝީލްޑް މެޗު ކެލާއިން ކާމިޔާބުކުރިއިރު، މި ފަހަރުގެ މުބާރާތުގެ ހއ. އަތޮޅުގެ 10 ޓީމެއް ވަނީ ބައިވެރިވެފައެވެ. އެއާއެކު މުބާރާތް ކުރިއަށް ގެންދިޔުމަށް ހަމަޖެހިފައިވަނީ ދެ ގްރޫޕަކަށް ބަހާލައިގެންނެވެ. މުބާރާތުގެ ކުޅުން މާދަމާ ފަށާއިރު، ފައިނަލް މެޗު ކުޅުމަށް ތާވަލުކޮށްފައިވަނީ މި މެޗުގެ 11 ވަނަ ދުވަހެވެ.