ބައިނަލްއަގުވާމީ އެކުވެރިކަމުގެ ދެވަނަ މެޗުގައި ބަންގްލަދޭޝްއިން ފަހު ވަގުތު ޖެހި ލަނޑާއެކު، ފަހަތުން އަރައި 2-1 ގެ ނަތީޖާއަކުން ރާއްޖެ ބަލިކޮށްފިއެވެ.
މި މެޗުން ރާއްޖެ ބަލިވިއިރު، މިދިޔަ ބުދަ ދުވަހު ކުޅުނު މެޗުން ރާއްޖެ ވަނީ 1-0 ގެ ނަތީޖާއަކުން މޮޅުވެފައެވެ. މިއީ ބައިނަލްއަގުވާމީ ފުޓްބޯޅައިގައި ބަންގްލަދޭޝްއިން ރާއްޖެ އަތުން ހޯދި ނުވަވަނަ މޮޅެވެ.
ބަޝުންދަރާ ކިންގްސް އެރީނާގައި މިއަދު ހަވީރު ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ރާއްޖެއިންނެވެ. މެޗުގެ 23 ވަނަ މިނެޓުގައި އިބްރާހިމް މަހުދީ (ފޭދޫ އިއްބެ) ދިން ބޯޅައަކުން މި ލަނޑު ކާމިޔާބުކޮށްދިނީ އަލީ ފާސިރު (ސެންޓޭ) އެވެ. މި މެޗުގައިވެސް ރާއްޖޭގެ ލަނޑު ސެންޓޭ ކާމިޔާބުކޮށްދިންއިރު، ބަންގްލަދޭޝް އަތުން ރާއްޖެ މޮޅުވި މެޗުގައިވެސް ފެނިގެންދިޔަ ހަމައެކަނި ލަނޑު ޖަހައިދިނީ ސެންޓޭއެވެ.
މެޗުގެ ކުރީކޮޅު ރާއްޖެއިން ލީޑު ނެގި ނަމަވެސް، ފުރަތަމަ ހާފު ނިމުމުގެ ކުރިން ބަންގްލަދޭޝްއިން ވަނީ ނަތީޖާ އެއްވަރުކޮށްފައެވެ. މެޗުގެ 43 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މުޖީބުއްރަހުމާން ޖޯނީއެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގެ ދެވަނަ ހާފުގައި ރާއްޖޭގެ އަޙްމަދު ރިޒްވާން (ރިޒޭ) އަށް ވަނީ ރަނގަޅު ދެ ފުރުސަތެއް ލިބި ބޭކާރުވެފައެވެ. މި މެޗުގައި ބަންގްލަދޭޝްއިން ފަހަތުން އަރައި ލީޑު ނަގާފައިވަނީ މެޗުގެ އިތުރު ވަގުތުގެ ތެރޭގައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލަަކަށް ކުޅެން އެރި ޕަޕޯން ސިންގް އެވެ.
މި މެޗުގެ ދެވަނަ ހާފުގައި ރާއްޖޭގެ ޒުވާން ކުޅުންތެރިންޔާ އަބްދުﷲ ލޫތު އިބްރާހީމް ކުޅެން އެރިއިރު، މިއީ 19 އަހަރުގެ ކުޅުންތެރިޔާ ގައުމީ ޓީމަށް ކުޅެދިން ފުރަތަމަ މެޗެވެ.