ކުރިއަށް އޮތް އަހަރެއް ނުވަތަ ދެ އަހަރު ދުވަހުގެ ތެރޭގައި ފުޓްބޯޅަ ކުޅުން ހުއްޓާލާނެކަމުގެ އިޝާރާތެއް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ދީފިއެވެ.
ރޮނާލްޑޯ މިހެން ބުނީ، ޔުއެފާ ނޭޝަންސް ލީގުގައި ޕޮލެންޑް އަތުން 1-5 އިން ޕޯޗުގަލް މޮޅުވި މެޗަށްފަހު ނޫސްވެރިންނަށް ދިން އިންޓަވިއުއެއްގައެވެ. ރޮނާލްޑޯގެ ވާހަކައިގައި ވަނީ، ފުޓްބޯޅަ ކުޅުން ހުއްޓާލިނަމަވެސް ކޯޗެއްގެ ގޮތުގައި މަސައްކަތްނުކުރާނެ ކަމުގެ ޔަގީންކަންދީފައެވެ.
"އަހަރެންނަކަށް ނުފެނޭ އަހަރެން ޓީމެއް މެނޭޖް ކުރާ ތަނެއް. އެއީ އަހަރެންގެ ޕްލޭންތަކުގައި ހިމެނޭ ކަމެއް ނޫން."
"އަހަރެންގެ މުސްތަޤްބަލު އޮތީ ފުޓްބޯޅައިން ބޭރުގެ އެހެން ދާއިރާއަކުން. ނަމަވެސް އެވަގުތު އައިސްޖެހުމުން ވާނެ ގޮތެއް ބުނަން އެނގޭނީ." ރޮނާލްޑޯ ބުންޏެވެ.
މިވަގުތު ސައުދީ ޕްރޯ ލީގުގައި އަލް ނަސްރު އަށް ކުޅެމުން އަންނަ ރޮނާލްޑޯ އަށް އަންނަ އަހަރުގެ ފެބުރުއަރީ މަހުގެ ތެރޭގައި 40 އަހަރުފުރޭނެއެވެ. މިހާރު އުމުރުން ކިތަންމެ ދުވަސްވެފައިވީނަމަވެސް ބައިނަލްއަގުވާމީ ފުޓްބޯޅައިގައި އަދިވެސް ރޮނާލްޑޯ އަންނަނީ ގިނަ ގޯލްތަކެއް ޖަހަމުންނެވެ. އެގޮތުން، އެންމެ ފަހުން ޕޮލެންޑް އަތުން ޕޯޗުގަލް މޮޅުވި މެޗުގައި ރޮނާލްޑޯ ވަނީ ދެ ލަނޑުޖަހައިފައެވެ. އޭގެތެރެއިން، އެއްގޯލަކީ އޯވަހެޑް ކިކަކުން ރޮނާލްޑޯ ޖެހި ގޯލެކެވެ. މި މެޗުން ހޯދީ މޮޅާއެކު ރޮބާޓޯ މާޓިނޭޒްގެ އިރުޝާދުގެ ދަށުން ކުޅެމުން އަންނަ ޕޯޗުގަލް ވަނީ ނޭޝަންސް ލީގުގެ ކުއާޓާ ފައިނަލަށް ދަތުރުކޮށްފައެވެ.
"އަހަރެން ބޭނުންވަނީ ހިތްހަމަޖައްސާލަން،"
"ރިޓަޔާކުރުމުގެ ޕްލޭން؟ އެކަން ކުރަންޖެހޭ ހާލަތު ދިމާވުމުން އަހަރެއް ނުވަތަ ދެ އަހަރުގެ ތެރޭގައި ކުޅުން ހުއްޓާލާނަން. ކަނޑައެޅިގެން ބުނާކަށް ނޭނގޭ." ރޮނާލްޑޯ ބުންޏެވެ.
އަލް ނަސްރަށް ބަދަލުވުމަށްފަހު ރޮނާލްޑޯ ވަނީ ގިނަ އަދަދަކަށް ލަނޑުޖަހައިފައެވެ. ރޮނާލްޑޯ ވަނީ ސައުދީ ކުލަބަށް ކުޅެދިން 85 މެޗުގައި 74 ގޯލު ޖަހާފައެވެ. އަދި މި ފަހަރުގެ ސީޒަނުގެ ލީގުގައި އޭނާ ވަނީ 6 ގޯލު ޖަހާފައެވެ.
ރޮނާލްޑޯ ބުނީ، އޭނާގެ ހިތްހަމަޖެހުމަށްޓަކައި ފުޓްބޯޅަ ކުޅުން ކުރިއަށްގެންދާނެ ކަމަށާއި، އަދި އޭނާގެ މޯޓިވޭޓްވެފައި ހުންނަހާ ހިނދަކު ކުޅުން ހުއްޓާލުމުގެ ވިސްނުމެއް ނުގެންގުޅޭ ކަމަށެވެ. އަދި، އެކަމުގައި ކުރިއަށްދާން ބޭނުންނުވާކަމަށް ފެނިއްޖެނަމަ ރިޓަޔާކުރާނެ ކަމަށް ވެސް ރޮނާލްޑޯ ބުންޏެވެ.
މީގެކުރީން، މިދިޔަ އޮގަސްޓް މަހުގެ ތެރޭގައި ރޮނާލްޑޯ ބުނެފައިވަނީ ގައުމީ ޓީމަށް އޭނާ ކުޅުން ހުއްޓާލާނެކަން ކުރީބައިގައި ހާމަ ނުކުރާނެ ކަމަށާއި އެއީ ވަރަށް ވިސްނުމަށްފަހު އޭނާ ނިންމާނެ ނިންމުމެއް ކަމަށެވެ. އަދި އޭނާ ކްލަބް ފުޓްބޯޅަ އާއި ދުރަށް ދާނީ އަލް ނަސްރުގައި ކަމަށްވެސް ވަނީ ބުނެފަ އެވެ.
ނޭޝަންސް ލީގުގައި ޕޯޗުގަލް ދެން ކުޅޭ މެޗުގައި އަންނަ އަންގާރަ ދުވަހު ނިކުންނާނީ ކްރޮއޭޝިއާއާ ދެކޮޅަށެވެ. ނަމަވެސް، ރޮނާލްޑޯ އަށް އަރާމުކުރުމުގެ ފުރުޞަތު ދީފައިވުމުން އެ މެޗުގައި ބައިވެރިނުވެ، އޭނާ އެނބުރި ކްލަބާ ގުޅޭނެއެވެ.