މެލޭޝިޔާގައި ކިޔެވުމަށް 5 ދަރިވަރަކަށް ސްކޮލަރޝިޕް ދީފި

މެލޭޝިޔާގައި 5 ދާއިރާއަކުން މަތީ ތަޢުލީމަށް ކިޔެވުމުގެ ސްކޮލަރޝިޕް 5 ދަރިވަރަކަށް މަތީ ތަޢުލީމާއި މަސައްކަތްތެރިކަމާއި، ހުނަރުތައް ތަރައްޤީކުރުމާއި ބެހޭ ވުޒާރާއިން ދީފިއެވެ. މި ސްކޮލަރޝިޕްތައް ހަވާލުކޮށްދެއްވީ މަތީ ތަޢުލީމާއި މަސައްކަތްތެރިކަމާއި، ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރިޔަމް މާރިޔާއެވެ.

މި ސްކޮލަރޝިޕްތަކަކީ "ދާލަން: ނެޝަނަލް ސްކިލްސް އެންޑް ކެރިޔަރ އެކްސްޕޯ 2024" ގެ ނަމުގައި ކުރިއަށް ގެންދިޔަ އެކްސްޕޯގައި ބެއިވެރިވި ފަރާތްތަކުގެ ތެރެއިން ގުރުއަތުން ހޮވުނު ފަރާތްތަކަށް ދިން ސްކޮލަރޝިޕްތަކެވެ. މި ސްކޮލަރޝިޕްތައް ދީފައިވަނީ އެޑިޔުކޭޝަން މެލޭޝިޔާ ގްލޯބަލް ސަރވިސަސްއާ ގުޅިގެންނެވެ.

އެގޮތުން ދާލަން ލަކީ ޑްރޯގައި ބައިވެރިވެ، ގުރުއަތުން ހޮވޮނު 5 ދަރިވަރަކަށް، 5 ދާއިރާ އަކުން މެލޭޝިޔާގައި ކިޔެވުމުގެ ފުރުޞަތު ވަނީ ދީފައެވެ. އެގޮތުން ބެޗްލަރސް އޮފް ޖަރނަލިޒަމް ބެޗަލަރސް އޮފް އާރޓިފިޝަލް އިންޓެލިޖެންސްއާއި ބެޗްލަރސް އޮފް ސޮފްޓްވެއަރ އިންޖީނިއަރިންގ ބެޗްލަރ އޮފް މެރިން ބަޔޯޓެކްނޮލޮޖީއާއި ބެޗްލަރސް އޮފް ޑިޖިޓަލް މީޑިޔާ ޓެކްނޮލޮޖީއެވެ.

މިދިޔަ ސެޕްޓެމްބަރު މަހު ވަނީ އެޑިޔުކޭޝަން މެލޭޝިއާ ގްލޯބަލް ސަރވިސްއާ ގުޅިގެން ރާއްޖެއަށް 561 ސްކޮލަރޝިޕް ފުރުޞަތު ހަމަޖެއްސުމުގެ އެއްބަސްވުމެއްގައި ސޮއިކޮށްފައެވެ. އެގޮތުން 6 ދާއިރާއަކުން ކިޔެވުމުގެ ފުރުޞަތުތައް ހޯދާފައިވާއިރު މިއީ މި ފުރުޞަތުގައި މެލޭޝިއާގެ ޔުނިވަރސިޓީތަކުން ދަރިވަރުންނަށް %70އާއި ހަމައަށް ޓިއުޝަން ފީއިން ބޮޑެތި ޑިސްކައުންތައް ލިބޭ ފުރުޞަތުތަކެކެވެ.

މަތީ ތަޢުލީމާ ބެހޭ ވުޒާރާއިން ވިދާޅުވީ މި ފުރުޞަތުގައި، މެލޭޝިއާއަށް މިހާރު އަމިއްލައަށް ލޯނު ނަގައިގެން ކިޔަވަން ދާން ހަމަޖައްސާފައިވާ ދަރިވަރުންވެސް ބައިވެރިވެ، ޓިއުޝަން ފީ އިން ބޮޑެތި ޑިސްކައުންޓްތައް ހޯދުމުގެ ފުރުޞަތު ލިބޭނެކަމަށެވެ.