ކުންފުނި ހަރުދަނާވުމާއެކު ޙައްޖާއި އުމްރާއަށް ދާން ފައިސާ ދައްކާ މީހުންގެ އަދަދު ދަނީ އިތުރުވަމުން: ޙައްޖު ކޯޕަރޭޝަން

ޙައްޖު ކޯޕަރޭޝަނަށް ރައްޔިތުންގެ އިތުބާރު އަލުން ލިބި، ޙައްޖާއި އުމްރާއަށް ދާން ފައިސާ ދައްކާ މީހުންގެ އަދަދު މިދިޔަ އަަަހަރެއްހާ ދުވަހުގެ ތެރޭގައި އިތުރުވެފައިވާކަމަށް ޙައްޖު ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

ޝަކީލް މިފަދައިން ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރަށް 1 އަހަރުވުމާއި ގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުންނެވެ.

ސައުދީ ސަރުކާރުން ރާއްޖެއަށް ދޫކުރާ 1000 ހައްޖު ކޯޓާ މީގެކުރިން ބަހަނީ ހައްޖު ކޯޕަރޭޝަނާއި ބިޑް ކާމިޔާބުކުރާ އަމިއްލަ ކުންފުނިތަކަށެވެ. ނަމަވެސް، އެ ކުންފުނިތަކުން އޮޅުވާލައިގެން ބޮޑު އަގު ނެގުމާއި، އަދި އެ ނޫންވެސް މައްސަލަތައް ގިނަވަމުންދިއުމުން އާންމުންގެ މެދުގައި އޮތީ ނުތަނަވަސްކަމެއް އުފެދިފައެވެ.

މި މައްސަލަތައް ހައްލުކުރައްވައި، ރައްޔިތުންގެ އިތުބާރު އަލުން ހޯއްދެވުމުގެ ގޮތުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާއި ހަވާލުވެވަޑައިގަތުމަށްފަހު ރާއްޖެއަށް ލިބޭ 1000 ޙައްޖު ކޯޓާ ޙައްޖު ކޯޕަރޭޝަނާއި ހަވާލުކުރެއްވުމަށް ނިންމެވިއެވެ.

ޙައްޖު ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވީ ޙައްޖަށް މީހުން ގެންދިޔުމުގައި ކުރީ ސަރުކާރުން ގެންގުޅުނު އުސޫލުގެ ސަބަބުން އާންމުންގެ މެދުގައި ކަންބޮޑުވުންތަކެއް އޮތްކަމަށެވެ. ނަމަވެސް މިއަދު ހައްޖު ކޯޕަރޭޝަނަށް ރައްޔިތުންގެ އިތުބާރު އަލުން ލިބި، ހައްޖާއި އުމްރާއަށް ދާން ފައިސާ ދައްކާ މީހުންގެ އަދަދުވެސް އިތުރުވަމުންދާކަމަށް ޙައްޖު ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވިއެވެ. އެގޮތުން މީގެކުރިން ހައްޖާއި އުމްރާއަށް ދާން މީހުންގެ ދައްކާ ފައިސާގެ ގޮތުގައި މަހެއްގެ މައްޗަށް ލިބެނީ 9 މިލިއަން ރުފިޔާކަމަށާއި، ނަމަވެސް މިހާރު އެއަދަދު 35 މިލިއަން ރުފިޔާއަށް އިތުރުވެފައިވާކަމަށް ޝަކީލް ވިދާޅުވިއެވެ.

"ރައްޔިތުންގެ އިތުބާރު ހޯދުމަށް ޚިދުމަތްތައް ރަނގަޅު ކުރިން. ޚައްޖާއި އުމްރާއަށް ދާން ބޭނުންވާ މީހުންގެ މުސާރައިން ކެނޑޭގޮތަށް ސޭވިންގ ސްކީމެއްވެސް އޮތް. މީގެ މައުލޫމާތު މާގިނަ މީހުންނަކަށް ނޭނގެ. އަޅުގަނޑު އެކަމަށް ވަކި ޑިޕާޓްމަންޓެއް ހަދާ، ކުންފުނިތަކާއި ކައުންސިލްތަކާއި މުއައްސަސާތަކަށް މި މައުލޫމާތު ފޯރުކޮށްދިނުމުގެ މަސައްކަތް ފެށިން. ފެށި ހިސާބުން ކަލެކްޝަން ވެސް އިތުރުވެގެންދިޔަ. ކުރިން ކޯޕަރޭޝަން ހިންގަމުން އައި ހަނި ގޯޅިއެއްގައި ހުންނަ އޮފީހެއްގައި. އެހެންނަމަވެސް މަޤާމާއި ހަވާލުވި ހިސާބުން ރައްޔިތުންނާއި ގާތުން ޚިދުމަތް ދިނުމަށް މާލޭގެ މެދުތެރޭގެ ސަރަހައްދަކަށް އޮފީސް ބަދަލުކުރިން، އެއީވެސް ރައްޔިތުންނާ ގާތުން ޚިދުމަތް ފޯރުކޮށްދިނުމަށްޓަކައި" ޝަކީލް ވިދާޅުވިއެވެ.

ހައްޖު ކޯޕަރޭޝަން އުފެދުނީއްސުރެ ކުންފުނީގެ ތަރައްޤީއަށް އެއްވެސް މަސައްކަތެއް ކޮށްފައިނުވާކަން ފާހަގަކުރައްވާ ޝަކީލް ވިދާޅުވީ ފާއިތުވި އަހަރުތަކުގައި އެ ކޯޕަރޭޝަން ހިންގަމުން އައީ ޙައްޖު އުމްރާ ގްރޫޕެއްގެ ގޮތަށް ކަމަށެވެ. އަދި ވޭތުވެދިޔަ 11 އަހަރު 168 މިލިއަން ރުފިޔާގެ ދަރަނި އޮތް ކަމަށްވެސް އޭނާ ވިދާޅުވިއެވެ.

11 އަހަރު ވަންދެން ކުންފުނީގައި އޮތް ދަރަނި އެއްކޮށް ޚަލާސްކުރުމަށް ވަގުތު ނަގާނެކަން ޝަކީލް ފާހަގަކުރައްވަމުން ޝަކީލް ވިދާޅުވީ މި ދައުރުގެ ތެރޭގައި ދަރަނިތައް ދައްކާ ޚަލާސްކޮށް ކުންފުންޏަކީ ފައިދާގާ ހިންގާނެ ކުންފުންޏަކަށް ހެދުމުގެ މަސައްކަތް ކުރަމުންދާކަމަށެވެ.

ޙައްޖު ކޯޕަރޭޝަނަކީ އާމްދަނީ ލިބޭ ކުންފުޏަކަށް ހެދުމަށްޓަކައި އެކުންފުނިން ވަނީ ރިއަލް އެސްޓޭޓް ވިޔަފާރިއަށް ވަނުމަށް ނިންމާފައެވެ. އެގޮތުން ހުޅުމާލޭގައި ރެޒިޑެންޝަލް އިމާރާތެއް ތަރައްޤީކުރުމަށް ހަމަޖެހިފައިވާއިރު އެ އިމާރާތުގެ އެޕާޓްމަންޓްތައް ވިއްކާ ނިމުމުން ކުންފުނީގެ ދަރަނީގެ ބޮޑުބައެއް ދެއްކޭނެކަމަށް ޝަކީލް ވިދާޅުވިއެވެ. އަދި ރިއަލް އެސްޓޭޓް ދާއިރާ ނޫން އެހެން ދާއިރާތަކުންވެސް އިންވެސްޓު ކުރުމަށް މަސައްކަތް ކުރަމުންދާކަމަށްވެސް ޝަކީލް ވިދާޅުވިއެވެ.

ރާޢްޖެއިން ޙައްޖަށް މީހުން ގެންދާ އަގު ބޮޑުވުމަކީ އާންމުންގެ ބޮޑު ކަންބޮޑުވުމެކެވެ. އާންމުންގެ އެ ކަންބޮޑުވުން ހައްލުކުރުމުގެ ގޮތުން ޙައްޖަށް މީހުން ގެންދަން ނަގާ އަގު، 50،000 ރުފިޔާއަށް ކުޑަކުރުމަކީ ސަރުކާރުގެ އަމާޒެކެވެ.