ޔުއެފާ ނޭޝަންސް ލީގުގައި ޕޯޗުގަލްއާ ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރުކޮށް، މުބާރާތުގެ ކުއާޓާ ފައިނަލުގެ ޖާގައެއް ކްރޮއޭޝިއާއިން ހޯދައިފިއެވެ.
މި މެޗަށް ނިކުތްއިރު ވެސް މުބާރާތުގެ ކުއާޓަރ ފައިނަލުގެ ޖާގައެއް ކަށަވަރުވެފައިވާ ޕޯޗުގަލް އިން މި މެޗުގައި އެ ޓީމުގެ މުހިންމު ކުޅުންތެރިން ބޭނުންކޮށްފަ އެއް ނުވެއެވެ. އޭގެ ތެރޭގައި ކްރިސްޓިއާނޯ ރޮނާލްޑޯ ވެސް ހިމެނެއެވެ.
ކްރޮއޭޝިއާގައި ކުޅުނު މި މެޗު އެއްވަރުވުމާއެކު އެ ޓީމަށް ވަނީ ހަ މެޗުން 8 ޕޮއިންޓާއެކު ތާވަލުގެ ދެވަނަ މަގާމު ލިބިފަ އެވެ. ޕޯޗުގަލް އަށް ހަ މެޗުން ވަނީ 14 ޕޮއިންޓް ލިބިފަ އެވެ. ޕޮލެންޑް އަތުން ސްކޮޓްލޭންޑް މޮޅުވި ނަމަވެސް އެ ޓީމަށް ލިބިފައިވަނީ 7 ޕޮއިންޓެވެ.
މި މެޗުން ކޮންމެގޮތެއް ހަދާފަވެސް ޕޮއިންޓެއް ބޭނުންވެފައިވާ ކްރޮއޭޝިއާ އާއި ދެކޮޅަށް ޕޯޗުގަލް ކުޅުނު މި މެޗުގެ 33 ވަނަ މިނިޓުގައި ޗެލްސީގެ ފޯވަޑް ޖޮއާއޯ ފީލިކްސް ވަނީ ލަނޑެއް ޖަގާ ޕޯޗުގަލް އަށް ލީޑު ނަގައިދީފަ އެވެ.
ކްރޮއޭޝިއާ އިން ރަގަޅަށް ކުޅެ ގިނަ ހަމަލަތަކެއް އުފައްދާފައިވާ މި މެޗުގައި އެ ޓީމުގެ ކްރަމަރިޗް ފޮނުވާލި ހަމަލަތަކެއް ވަނީ ގޯލުގެ ދަނޑިއަށް އަމާޒުވެފަ އެވެ.
މި މެޗުގައި ކްރޮއޭޝިއާ އަށް އެއްވަރުކޮށްދިން ލަނޑު މެޗުގެ 65 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ މެންޗެސްޓަރ ސިޓީއަށް ކުޅެމުންދާ ޑިފެންޑަރ ޖޮސްކޯ ގްވަޑިއޯލް އެވެ.
މި ލަނޑަށްފަހުވެސް ކްރޮއޭޝިއާގެ ކްރަމަރިޗް ޕޯޗުގަލްގެ ގޯލަށް އަމާޒުކޮށް ފޮނުވާލި ނުރައްކާތެރި ހަމަލައެއް ކީޕަރު ޖޯސޭ ސާ ވަނީ ދިފާއުކޮށްފަ އެވެ.