ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަރ މޭޓްސް (އެމްއެސްއެމް) ގުޅިގެން ބާއްވާ ދިވެހި ޔޫތު ލީގު 2024 ގެ ގުރުނެގުން ބާއްވައިފިއެވެ.
12 އަހަރުން ދަށާއި، 14 އަހަރުން ދަށާއި، 16 އަހަރުން ދަށުގެ އުމުރުފުރާއަށް ހުޅުވާލައިގެން ބާއްވާ ޔޫތު ލީގުގައި ކޮންމެ އޭޖް ގުރޫޕަކުން ޖުމްލަ އަށް ޓީމު ވާދަކުރާނެއެވެ. މި މުބާރާތް ކުރިޔަށްދާނީ ހެންވޭރު ދަނޑާއި، ހުޅުމާލެ ސްޓޭޑިއަމް އަދި ގަލޮޅު ދަނޑުގައެވެ. ދިވެހި ޔޫތު ލީގު ކުރިއަށްދާނީ މި މަހުގެ 21 އިން އަންނަ އަހަރުގެ ޖެނުއަރީ މަހުގެ އެއްވަނަ ދުވަހުގެ ނިޔަލަށެވެ.
މި މުބާރާތުގެ ފުރަތަމަ މެޗުގައި އަންނަ ބުރާސްފަތި ދުވަހުގެ ހަވީރު 15:45 ގައި ބައްދަލުކުރާނީ ޔުނައިޑެޓް ވިކްޓަރީ (ޔޫވީ) އާއި ޓީސީ ސްޕޯޓްސް ކުލަބުގެ 12 އަހަރުން ދަށުގެ ޓީމެވެ. މި މެޗު އޮންނާނީ ހެންވޭރު ދަނޑުގައެވެ. މުބާރާތުގެ 14 އަހަރުން ދަށުގެ ފުރަތަމަ މެޗު އޮންނާނީ ހަމަ އެ ދުވަހު 17:00 ގައި ހެންވޭރު ދަނޑުގައެވެ. އެ މެޗުގައި ބައްދަލުކުރާނީ ޔޫވީ އާއި ޓީސީ ސްޕޯޓްސް ކުލަބެވެ.
މި މުބާރާތުގައި ވާދަކުރާނީ ޔޫވީ އާއި، ޓީސީ ސްޕޯޓްސް ކުލަބާއި، ކުލަބް ވެލެންސިއާ އާއި، ވިކްޓަރީ ސްޕޯޓްސް ކުލަބާއި، ކުލަބު އީގަލްސް އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ސުޕަ ޔުނައިޓެޑް ސްޕޯޓްސް (ސަސް) އަދި ހުއްރިއްޔާ ސްޕޯޓްސް ކުލަބެވެ.
ޔޫތު ލީގުގައި ބައިވެރިވެފައިވާ ޓީމުތަކުގެ މެދުގައި ގުރުނެގުމަށް ރޭ ގައުމީ ފުޓްބޯޅަ ދަނޑުގައި ބޭއްވި ރަސްމިއްޔާތުގައި ދިވެހި ފުޓްބޯޅައިގެ މަޝްހޫރު ތަރިން ބައިވެރިވިއެވެ. އޭގެ ތެރޭގައި ކުރީގެ ގައުމީ ކެޕްޓަން އަކުރަމް އަބުދުލް ޣަނީ އާއި އައްސަދު އަބްދުލް ޣަނީ އަދި އަލީ އަޝްފާގު (ދަގަނޑޭ) ފަދަ ފުޓްބޯޅައިގެ ލެޖެންޑުން ބައިވެރިވިއެވެ.