މަޝްހޫރު ޓެނިސް ކުޅުންތެރިޔާ ސްޕެއިންގެ ރަފައެލް ނަޑާލް ކުޅުނު ފަހު މެޗުން އޭނާ ބަލިވެއްޖެއެވެ.
ޑޭވިސް ކަޕްގެ ސިންގަލްގައި ނެދަލޭންޑްސްގެ ބޮޓިކް ވެންޑަޒެންޑްޝަލްޕް އާއި ދެކޮޅަށް ކުޅުނު މި މެޗުން ރަފައެލް ނަޑާލް ބަލިވެފައިވަނީ ސީދާ ދެ ސެޓުން ހައެއް ހަތަރެއް އަދި ހައެއް ހަތަރެއްގެ ނަތީޖާއަކުންނެވެ.
ނަޑާލްއަށް ވަނީ އަނިޔާގެ ސަބަބުން މި އަހަރުގެ ފްރެންޗް އޯޕަން އާއި ޔޫއެސް އޯޕަންގެ އިތުރުން ލޭވަރ ކަޕްގައި ބައިވެރިނުވެފަ އެވެ. އަދި އަނިޔާގެ ސަބަބުން ނަޑާލްގެ އަސްލު ކުޅުން ދެއްކޭގޮތް ނުވުމާއެކު އޭނާ ވަނީ ދާދި ފަހުން ކުޅުން ހުއްޓާލުމަށް ނިންމާފައިވާކަން އިއުލާން ކޮށްފަ އެވެ.
އުމުރުން 38 އަހަރުގެ ނަޑާލް ވަނީ 22 ގްރޭންޑް ސްލޭމް މުބާރާތް ކާމިޔާބުކޮށްފައެވެ. އޭގެ ތެރޭގައި އޮސްޓްރޭލިއަން އޯޕަން ދެ ފަހަރު, ވިމްބަލްޑާން މުބާރާތް ދެ ފަހަރު އަދި އޭނާ ވަނީ ހަތަރު ފަހަރު ޔޫއެސް އޯޕަން އާއި ޑޭވިސް ކަޕްގެ އިތުރުން އޮލިމްޕިކްސްއިން ރަން މެޑަލް ހަތަރު ފަހަރު ހޯދާފައެވެ. ނަޑާލްގެ ދިގު ކެރިއަރުގައި އޭނާ ވަނީ ފްރެންޗް އޯޕަން ޓެނިސް މުބާރާތް 14 ފަހަރު ކާމިޔާބުކޮށްފައެވެ.
ނަޑާލް ޓެނިސް ކުޅުން ހުއްޓާލާކަން އިއުލާންކޮށްފައި މިވަނީ އޭނާ އާއި އެންމެ ވާދަވެރި ސްވިޒަލޭންޑްގެ ރޮޖަރ ފެޑެރަރ މީގެ ދެ އަހަރު ކުރިން ޓެނިސް ކުޅުން ހުއްޓާލާފައިވަނިކޮށެވެ. ފެޑެރަރ ވަނީ 24 ގްރޭންޑް ސްލޭމް މުބާރާތް ކާމިޔާބުކޮށްފައެވެ.
ޑޭވިސް ކަޕްގެ ފަހު މެޗަށް ނަޑާލް ނިކުތުމުގެ ކުރިން އޭނާ އާއި އެންމެ ވާދަވެރި ކުޅުންތެރިޔާ ސްވިޒަލޭންޑްގެ ރޮޖަރ ފެޑެރަރ ވަނީ ނަޑާލްއަށް ތައުރީފުކޮށް އޭނާގެ ސޯޝަލް މީޑިޔާގައި އަސަރުގަދަ ޕޯސްޓެއް ކޮށްފައެވެ.