ވޭޕް އޮއިލް ޝިޕްމަންޓްގައި ޑްރަގު ހުރިކަމަށް އާންމުކުރީ ފުރަތަމަ މަރުހަލާއިން ޕޮޒިޓިވްވުމުން: ދާޚިލީ ވަޒީރު

މިދިޔަމަހު ރާއްޖެއަށް އެތެރެކުރި ވޭޕް އޮއިލް ޝިޕްމަންޓެއްގައި މަސްތުވާތަކެތިކަމަށް ޝައްކުކުރެވޭ ބާވަތެއް ފެނިފައިވާކަމަށް އޭރު ޢާންމުކުރެއްވީ ފުރަތަމަ މަރުހަލާގެ ޓެސްޓުން މަސްތުވާތަކެއްޗަށް ޕޮޒިޓިވްވެފައިވާތީ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

މިދިޔަ މަހުގެ 14 ވަނަ ދުވަހުގެ ރޭ ރާއްޖެއަށް އެތެރެކުރަން އުޅެނިކޮށް އަތުލައިގަތް ވޭޕް ޝިޕްމެންޓެއް މަސްތުވާތަކެއްޗަށް ޕޮޒިޓިވްވި ކަން ހާމަކުރެއްވީ ވަޒީރެވެ. ނަމަވެސްއޭގެ ފަހުން އިތުރު ޓެސްޓުތަކެއް ހެދުމަށް ފަހު، އޭގައި މަސްތުވާތަކެތި ނުހިމެނޭ ކަމަށް ފުލުހުން ވަނީ ވިދާޅުވެފައެވެ.

މިކަމާއި ގުޅިގެން ކަންހިނގައިދިޔަ ގޮތް ތަފްސީލްކޮށްދެއްވާ ދާޚިލީ ސަލާމަތާބެހޭ ވަޒީރު ޢަލީ އިޙްސާން ވިދާޅުވީ އެއަރޕޯޓްގައި ކަސްޓަމްސްއިން ކްލިއަރ ކުރަމުންދާ ތަކެތިން ޝައްކުކުރެވޭފަދަ ކަމެއް ފާހަގަވެއްޖެނަމަ ރެޕިޑް ޓެސްޓްކޮށް ޕޮޒިޓިވްވާނަމަ ހިފެހެއްޓި ތަހްގީގަށް ހަވާލުކުރެވޭކަމަށެވެ. އެގޮތުން މިވޭޕް ޝިޕްމަންޓުންވެސް ރެޕިޑް ޓެސްޓް ހެދިއިރު ކެނަބިސްއަށް ޕޮޒިޓިވްވި ކަމަށާއި ނަމަވެސް އާންމު އުސޫލުން މިތަކެތި ތަހްޤީގަށް ފުލުހުންނާ ހަވާލުކުރެވި ލެބޯރެޓަރީ ޓެސްޓް ހަދާފައިވާކަމަށެވެ. އަދި މިޓެސްޓާއި ރެޕިޑް ޓެސްޓް ނަތީޖާ ދިމާވާ ނުވެއްޖެނަމަ އިތުރަށް ކޮންފަރމެޓަރީ ޓެސްޓްތައް ހަދާކަމަށާއި، ތަހުގީގަށް ނަތީޖާ ބޭނުންކުރާނީ ކޮންފަރމެޓަރީ ޓެސްޓް ހެދުމަށްފަހު ޝައްކެއް ނެތް މިންވަރަށް ޔަޤީންވުމުންކަމަށް ދާޚިލީ ވަޒީރު ވިދާޅުވިއެވެ.

އަދި އެދުވަހު މިޝިޕްމެންޓް ހިފެހެއްޓުނު ވާހަކަ ހިއްސާ ކުރެއްވުމަށް ނިންމެވީ 2023 ވަނަ އަހަރާއި މިއަހަރުވެސް މިފަދަ ވޭޕް އޮއިލް ޝިޕްމެންޓްތަކުގައި ކެނަބިސް ހުރި ކަމަށް ޔަޤީންކުރެވިފައި ވާތީ މިއީ މުޖްތަމަޢުގެ ކަންބޮޑުވުން އޮތް މައްސަލައަކަށްވާތީކަމަށް ވަޒީރު ވިދާޅުވިއެވެ. އަދި ފުލުހުން އަންގާރަދުވަހު ހާމަ ކުރެއްވި މަޢުލޫމާތުން އެނގިގެންދަނީ މިޕްރޮސެސްގެ ހާމަކަން ބޮޑުކަމާއި އިންސާފްވެރިކަންކަމަށް ދާޚިލީ ވަޒީރު އަލީ އިހްސާން ވިދާޅުވިއެވެ. އަދި ރައްޔިތުންގެ ސަލާމަތާއި ރައްކާތެރިކަމަކީ އެންމެ އިސްކަންދޭ ކަންކަންކަމަށް ވިދާޅުވެ ކުރިއަށް އޮތްތަނުގައިވެސް މިފަދަ ކަންކަމުގައި އަމަލުކުރައްވާނީ މިގޮތަށްކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވިއެވެ.

ވޭޕްގެ ވަބާގައި ސްކޫލް ކުދިން ޖެހި ކުދިންގެ ސިއްޙަތަށް އޭގެ ނޭދެވޭ އަސަރުކުރަމުންދާކަމީ މުޖުތަމަޢުގައި އޮތް އެންމެ ބޮޑު އެއް ކަންބޮޑުވުމެވެ. މިކަމަކީ ބެލެނިވެރިންނާއި މުދައްރިސުންގެ އިތުރުން ސިއްހީ ދާއިރާގައި މަސައްކަތް ކުރާ ފަރާތްތަކުންވެސް ކަންބޮޑުވުން ފާޅުކޮށްފައިވާ ކަމެކެވެ.

ޑްރަގް އަޅާފައިވާ ވޭޕް ފްލޭވާ އާއި އޮއިލްތައް ސްކޫލް ދަރިވަރުންނަށް ވިއްކަމުންދާކަން ފާހަގަ ކުރެވިފައިވާކަމަށް ވަޒީރު އިހްސާންވަނީ މީގެ ކުރިންވެސް ވިދާޅުވެފައެވެ. އަދި މިމަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި އެންމެ ބޮޑު އެއް ސަބަބަކީ ވެސް އެއީ ކަމަށް ވަޒީރު ވަނީ ވިދާޅުވެފައެވެ. މިމަހުގެ 15ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާކުރުމަށް ރައީސުލްޖުމްހޫރިއްޔާ ނިންމަވާފައިވާއިރު އަންނަ ޑިސރމްބަރުމަހުގެ 15ވަނަ ދުވަހުން ފެށިގެން ރާއްޖޜގައި ވޭޕް ބޭނުންކުރުން މަނާކުރުމަށް ނިންމަވާ ޤާނޫނަށްވެސްވަނީ އިސްލާހް ގެނެސްފައެވެ.

ރައީސްގެ މި ނިންމެވުމަށް ސިއްޙީ ދާއިރާގެ ބޭފުޅުންނާއި ރާއްޖޭއާއި ބޭރުގެ ބައެއް ފަރާއްތަކުންވެސް ވަނީ މަރުހަބާ ކިޔާފައެވެ.