ޕާޓީ ބަދަލުކޮށްފިނަމަ މަޖިލީހުގެ މެންބަރުކަމުން ވަކިވާގޮތަށް ޤާނޫނުއަސާސީއަށް ހުށައެޅި އިޞްލާހު މަޖިލީހަށް ބަލައިގެންފި

ރައްޔިތުންގެ މަޖިލީހަށް އިންތިޚާބުވި މެންބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ މެންބަރުކަން ގެއްލޭގޮތަށް ޤާނޫނުއަސާސީއަށް ހުށައެޅި އިޞްލާހު މަޖިލީހަށް ބަލައިގެންފިއެވެ. މި އިސްލާޙު ގެނައުމުގެ ބިލު ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވުމަށްވެސް ވަނީ ފާސްކޮށްފައެވެ.

ޤާނޫނު އަސާސީއަށް ހުށައެޅި އިޞްލާހު ބަލައިގަތުމަށް ފާސްވީ 69 މެންބަރުންގެ ވޯޓުންނެވެ.

ޤާނޫނު އަސާސީއަށް ހުށައަޅާފައިވާ އިޞްލާހުގައި ވަނީ ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ ޢުމުރުގެ ތެރޭގައި އެ މެންބަރަކު ތަމްސީލްކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ މަޖިލީހުގެ މެންބަރުކަމުން ވަކިވާނެ ކަމަށެވެ.

އަމިއްލަ ގޮތުން ވާދަކޮށްގެން މަޖިލީހަށް އިންތިޚާބުވާ މެންބަރަކު، މަޖިލީހުގެ ޢުމުރުގެ ތެރޭގައި ސިޔާސީ ޕާޓީއެއްގެ މެންބަރަކަށްވެއްޖެނަމަ މެންބަރުކަމުން ވަކިވާނެކަމަށްވެސް އައު އިސްލާޙުގައި ވަނީ ބަޔާންކޮށްފައެވެ.

ޤާނޫނު އަސާސީއަށް ހުށައެޅި އިޞްލާހުގައި އަސްކަރީ ތަމްރީނުތަކުގައި ބައިވެރިވުން ފިޔަވައި ރާއްޖެއިން ބޭރުގެ ފަރާތްތަކަށް ރާއްޖޭގެ އެއްވެސް ސަރަޙައްދެއް ޢަސްކަރީ ބޭނުމަށް ބޭނުންކުރުމުގެ ހުއްދަ ދެވޭނީ ރައްޔިތުންގެ މަޖިލީހުގެ އަޣުލަބިއްޔަތުން ފާސްކޮށްގެންކަމަށްވެސް ބަޔާންކޮށްފައިވެއެވެ.

ނިމިދިޔަ އެމްޑީޕީގެ މެޖޯރިޓީ އޮތް މަޖިލީހުން ވަނީ އެންޓި ޑިފެކްޝަންގެ ޤާނޫނަށް އިސްލާޙު ގެނެސްފައެވެ. މި އިސްލާޙުގައި ބަޔާންކޮށްފައިވަނީ ޕާޓީ ބަދަލުކޮށްފިނަމަ، އެ މެންބަރަކު އަމިއްލައަށް އިސްތިއުފާ ދޭންޖެހޭނެ ކަމަށެވެ. އަދި އިސްތިއުފާ ނުދީފިނަމަ ދެން މެންބަރާމެދު ޢަމަލުކުރެވޭނެ ގޮތެއް ބަޔާންކޮށްފައެއް ނުވެއެވެ. އަދި ޕާޓީ ބަދަލުކޮށްފިނަމަ، ސީދާ މެންބަރު ވަކިވާނެކަމަކަށްވެސް މިހާރު ޢަމަލުކުރަމުން އަންނަ އެންޓި ޑިފެކްޝަންގެ ޤާނޫނުގައި ނޯވެއެވެ.