ޢާމްދަނީގެ ނިސްބަތުން ސިއްޙީ ޚިދުމަތް ހަރުދަނާކުރަން ކޯ-ޕޭގެ ނިޒާމް ތައާރަފްކުރަނީ

ރާއްޖޭގެ ހެލްތު އިންޝުއަރެންސްގެ ނިޒާމު އިތުރަށް ހަރުދަނާކުރުމަށް އިންޝުއަރެންސްގެ ދަށުން ޚިދުމަތްހޯދާ ފަރާތްތަކުގެ އަތުން އިތުރު ކޮންޓްރިބިއުޝަނެއް ނެގުމަށް އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފިއެވެ. މިގޮތުން 2 ބާވަތެއްގެ ކޮންޓްރިބިއުޝަން ނެގުމަށް ނިންމާފައިވާކަމަށް ބަޖެޓުގައިވަނީ ހިމަނާފައެވެ. މިބަދަލު އަންނަ އަހަރުގެ އޭޕްރީލް މަހުގެ ތެރޭގައި ތަންފީޒުކުރަން ވަނީ ނިންމާފައެވެ.

ރާއްޖޭގައި ގިނަ ޚިދުމަތަކެއް ދިނުމުގައި ދައުލަތުގެ ސަބްސިޑީ ނިޒާމަށް ބަރޯސާވުމުގެ ސަބަބުން މާލީ ނިޒާމަށް ކުރިމަތިވެފައިވާ ހުރަސްތައް ކުޑަކޮށް ޚިދުމަތްތަކުގެ ފެންވަރު މަތިކުރުމަށް ސަބްސިޑީގެ ނިޒާމަށް ބޮޑު ބަދަލެއް ގެނައުމަށް އަންނަ އަހަރުގެ ބަޖެޓުގައިވަނީ ކަނޑައަޅާފައެވެ. މިގޮތުން ސިއްޙީ ނިޒާމުގައި އެންމެ ބޮޑު ހޭދައެއް ކުރާ އެއް ދާއިރާއަކީ އާސަންދަ އަދި މެޑިކަލް ވެލްފެއަރގެ ދަށުން ދެމުންގެންދާ ޚިދުމަތްތައްކަމަށްވުމުން މިކަން ދެމެހެއްޓެނިވިގޮތެއްގައި ދިނުމަށްވަނީ ބޮޑެތި އިސްލާޙީ ބަދަލުތަކެއް ގެނައުމަށްވަނީ ނިންމާފައެވެ.

2 ބާވަތެއްގެ ކޮންޓްރިބިއުޝަން ނެގުމަށްވަނީ ނިންމާފައި

އެގޮތުން ފުރަތަމަ ބާވަތަކީ މަހަކު 60،000 ރުފިޔާއަށްވުރެ ގިނަ ޢާމްދަނީ ލިބޭ މީހުން، ނުވަތަ އިންކަމް ޓެކްސް ދައްކަންޖެހޭ ފަރާތްތަކުގެ އަތުން ހެލްތު ކޮންޓްރިބިއުޝަންގެ ގޮތުގައި ކޯ-ޕޭއެއް ނެގުމަށެވެ. ސެވަނައަށް ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްޙީ ޚިދުމަތް ފޯރުކޮށް ދިނުމަށްނަގާ ކޯ-ޕޭއެއް ނެގުމަށް ވަނީ ބަޖެޓުގައި ކަނޑައަޅާފައެވެ.

އެންމެ ގިނައިން ޢާމްދަނީ ލިބޭ ފަރާތްތަކުން ނެގުމަށް ހަމަޖެހިފައިވާ ކޮންޓްރިބިއުޝަން ނެގުމަށް ހަމަޖެހިފައިވަނީ މުޅި ނިޒާމު ޕްރޮގްރެސިވްކޮށް ސިއްޙީ ޚިދުމަތް ހޯދުމަށް، އެންމެ ފަގީރު ޙާލުގައިވާ ފަރާތްތަކަށް މާލީ ބުރައަކާއިނުލާ ސިއްޙީ ޚިދުމަތް ލިބޭކަން ކަށަވަރުކުރުމުގެ ޖާގަ ފަހިކުރުމަށްކަމަށް ބަޖެޓުގައިވަނީ ބަޔާންކޮށްފައެވެ. އަދި މިއީ ދުނިޔޭގެ ކުރިއަރާފައިވާ ޤައުމުތަކުގައި ޓެކްސް އިދާރާ މެދުވެރިކޮށް ނަގާ މިންވަރެއްކަން ފާހަގަކޮށް މިކަމުގެ ސަބަބުން އަންނާނެކަމަށް ލަފާކުރެވޭ ބަދަލުވަނީ ބަޖެޓުގައި އަންދާޒާކޮށްފައެވެ.

އިންކަމް ޓެކްސް ދައްކާ މީހުން އަދި ޢާމްދަނީގެ ނިސްބަތުން ބައެއް ޢާއްމުންގެ އަތުން މިންވަރެއް ނެގުމަށް ނިންމާފައި

މީގެއިތުރުން އެންމެ ގިނައިން ޢާމްދަނީ ލިބޭ ފަރާތްތަކުން އައުޓްޕޭޝަންޓެ ޚިދުމަތް ހޯދުމުގައި ޒަރޫރީ ނޫން ބޭސްތައް ގަތުމުގައި ބިލުގެ ވަކި މިންވަރެއްމި ކޮންޓްރިބިއުޝަންގެ ގޮތުގައި ދައްކާގޮތަށްވަނީ ބަދަލުކުރުމަށްވަނީ ނިންމަވާފައެވެ. އަދި މިގޮތަށް ޢަމަލުކުރުމުގައިވެސް އަހަރެއްގެ މައްޗަށް އަމިއްލަ ޖީބުން ގިނަވެގެން ޚަރަދުކުރަންޖެހޭނެ އެންމެ މަތީ މިންވަރު ކަނޑައަޅާ، އެއަށްވުރެ އިތުރަށް އަތުން ޚަރަދުނުކޮށް މިހާރުވެސް އޮންނަ އުސޫލާއެއްގޮތަށް ޚިދުމަތް ކަށަވަރުކުރެވޭނެކަމަށް ބަޖެޓުގައިވަނީ ފާހަގަކޮށްފައެވެ.

މިގޮތުން ޢާއްމުންގެ އަތުން ނަގާނެ މިންވަރު ކަނޑައަޅާނީ ޢާމްދަނީގެ ގިންތިތަކަށް ބަލައިގެން ޕްރޮގްރެސިވްކޮށް ކަމަށްވެސް ބަޖެޓުގައިވަނީ ހިމަނާފައެވެ. މިގޮތަށް ނެގުމުގައި އެންމެ މަތީ ޢާމްދަނީ ލިބޭ ގިންތީގައި ނުހިމެނޭ ޢުމުރުން 18 އަހަރުން ދަށުގެ ކުޑަކުދިންނާއި، ޢުމުރުން 65 އަހަރުން މަތީގެ މީހުންނާއި ދާއިމީ ބޮޑެތި ބަލިތަކަށް ފަރުވާ ހޯދާ ފަރާތްތައް އިސްތިސްނާވާނެކަމަށް ބަޖެޓުގައިވަނީ ފާހަގަކޮށްފައެވެ.

ސިއްޙީ ދާއިރާއަށް އަހަރު 6 ބިލިއަން ރުފިޔާ މިޙާރު ޚަރަދުކުރެއެވެ. އެގޮތުން 2 ބިލިޔަނާއި 3 ބިލިއަނާ ދެމެދުގެ އަދަދަކަށް ރުފިޔާ އާސަންދަ އަދި މެޑިކަލް ވެލްފެއަގެ ނިޒާމަށްދަނީ ޚަރަދުކުރަމުންނެވެ. ސަބްސީޑީގެ ނިޒާމަކީ އެންމެ ބޭނުންޖެހިފައިވާ މީހުންނަށް ޚާއްސަ އަދި ފުދުންތެރި ފަރާތްތަކުން އެޚިދުމަތް ހަރުދަނާކުރުމަށް މާލީގޮތުން އެހީތެރިވާފަދަ ނިޒާމެއް ޤާއިމުކުރުމަށް ސަރުކާރުންދަނީ މަސައްކަތް ކުރަމުންނެވެ.