އެމެރިކާގެ މޭޖަރ ލީގު ސޮކަރ (އެމްއެލްއެސް) ގައި ވާދަކުރަމުން އަންނަ އިންޓަރ މަޔާމީގެ ކޯޗުގެ މަގާމުން ޖެރާޑޯ "ޓާޓާ" މާޓީނޯ އިސްތިއުފާދީފައިވާ ކަމަށް މީޑިއާ ރިޕޯޓުތައް ބުނެފިއެވެ.
އުމުރުން 61 އަހަރުގެ މާޓީނޯ މަގާމުން އިސްތިއުފާދީފައިވަނީ އަމިއްލަ ސަބަބުތަކާ ހުރެ ކަމަށްވެސް ޚަބަރުތައް ބުނެއެވެ.
މާޓީނޯ އާއެކު އިންޓަރ މަޔާމީން ވަނީ އެންމެ ފަހުގެ ރެގިއުލާ ސީޒަންގައި ޖުމްލަ 74 ޕޮއިންޓް ހޯދައި، ސަޕޯޓާސް ޝީލްޑް އުފުލާލައިފައެވެ. އެ ޓީމު ކުޅުނު 34 މެޗުގެ ތެރެއިން 22 މެޗު ކާމިޔާބުކުރިއެވެ. އެކަމަކު، އެމްއެލްއެސްގެ ޕްލޭ-އޮފްސްގައި ވާދަކޮށް ފުރަތަމަ ބުރުގައި ނުވަވަނައަށް ސީޑް ކޮށްފައިވާ އެޓްލާންޓާ ޔުނައިޓެޑް އަތުން ބަލިވެ ވަނީ ނާކާމިޔާބީއާ ކުރިމަތިލާން ޖެހިފައެވެ.
މިދިޔަ އަހަރުގެ ޖޫން މަހު އިންޓަރ މަޔާމީގެ ކޯޗުކަމާ ހަވާލުވި މާޓީނޯ ވަނީ އެ ޓީމާއެކު 2023 ވަނަ އަހަރުގެ ލީގްސް ކަޕް ކާމިޔާބުކޮށްފައެވެ. އޭގެކުރީން، އޭނާ ވަނީ މެކްސިކޯގެ ގައުމީ ޓީމަށް ތިން އަހަރަށްވުރެ ދިގު މުއްދަތަކަށް އިރުޝާދުދީފައެވެ. އެ މަގާމުން އޭނާ ވަކިވީ 2022 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުން އެ ޓީމު ކެޓުމުންނެވެ.
އޭގެ ކުރިން، މާޓީނޯ ވަނީ 2018 ވަނަ އަހަރު އެޓްލާންޓާ ޔުނައިޓެޑާއެކު އެމްއެލްއެސް ކަޕް ކާމިޔާބުކޮށްފައެވެ. އަދި އެ ފަހަރުގެ ސީޒަނަށްފަހު އޭނާ ވަނީ އަމިއްލަ ސަބަބުތަކަކަށްޓަކައި ކަމަށް ބުނެ، އެއްބަސްވުން އައުކުރުމަށް އިންކާރުކޮށްފައެވެ.