ޕާޓީ ބަދަލުކޮށްފިނަމަ ގޮނޑި ގެއްލޭ އިޞްލާހު މުޅި މަޖިލީހުގެ ކޮމިޓީން ފާސްކޮށްފި
-
މި އިޞްލާހު ކޮމިޓީން ފާސްވީ 75 މެންބަރުންގެ ވޯޓުން
ރައްޔިތުންގެ މަޖިލީހަށް އިންތިޚާބުވި މެންބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ މެންބަރުކަން ގެއްލޭގޮތަށް ޤާނޫނުއަސާސީއަށް ހުށައެޅި އިޞްލާހު މުޅި މަޖިލީހުގެ ކޮމިޓީން ފާސްކޮށްފިއެވެ. މި އިސްލާޙު ގެނައުމުގެ ބިލު ދިރާސާކުރި މުޅި މަޖިލީހުގެ ކޮމިޓީން ފާސްކުރީ 75 މެންބަރުންގެ ވޯޓުންނެވެ. ނުފެންނަކަމަށް ވޯޓު ދެއްވީ 13 މެންބަރުންނެވެ.
މި ވޯޓު ނަގާފައިވަނީ ވަކިވަކި މެންބަރުންގާތު އަހައިގެންނެވެ. މިގޮތަށް ވޯޓަށް އަހާފައިވަނީ މަޖިލީހުގެ ވޯޓިން ނިޒާމަށް ދިމާވި މައްސަލައަކާއި ގުޅިގެންނެވެ.
ސަރުކާރުގެ ފަރާތުން ޤާނޫނު އަސާސީއަށް އިޞްލާހު ހުށައެޅުއްވީ ހުޅުދޫ ދާއިރާގެ މެންބަރު މުޙައްމަދު ޝާހިދެވެ. އެ އިޞްލާހުގައި ވަނީ ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ ޢުމުރުގެ ތެރޭގައި އެ މެންބަރަކު ތަމްސީލްކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ މަޖިލީހުގެ މެންބަރުކަމުން ވަކިވާނެ ކަމަށެވެ.
އަމިއްލަ ގޮތުން ވާދަކޮށްގެން މަޖިލީހަށް އިންތިޚާބުވާ މެންބަރަކު، މަޖިލީހުގެ ޢުމުރުގެ ތެރޭގައި ސިޔާސީ ޕާޓީއެއްގެ މެންބަރަކަށްވެއްޖެނަމަ މެންބަރުކަމުން ވަކިވާނެކަމަށްވެސް އައު އިސްލާޙުގައި ވަނީ ބަޔާންކޮށްފައެވެ.
ޤާނޫނު އަސާސީއަށް ހުށައެޅި އިޞްލާހުގައި އަސްކަރީ ތަމްރީނުތަކުގައި ބައިވެރިވުން ފިޔަވައި ރާއްޖެއިން ބޭރުގެ ފަރާތްތަކަށް ރާއްޖޭގެ އެއްވެސް ސަރަޙައްދެއް ޢަސްކަރީ ބޭނުމަށް ބޭނުންކުރުމުގެ ހުއްދަ ދެވޭނީ ރައްޔިތުންގެ މަޖިލީހުގެ ހަތަރު ބައިކުޅަ ތިންބައިގެ އަޣިލަބިއްޔަތުންކަަމަށް ކޮމިޓީ މަރުހަލާގައި ގެނައި އިޞްލާހުގައިވެއެވެ.
ނިމިދިޔަ އެމްޑީޕީގެ މެޖޯރިޓީ އޮތް މަޖިލީހުން ވަނީ އެންޓި ޑިފެކްޝަންގެ ޤާނޫނަށް އިސްލާޙު ގެނެސްފައެވެ. މި އިސްލާޙުގައި ބަޔާންކޮށްފައިވަނީ ޕާޓީ ބަދަލުކޮށްފިނަމަ، އެ މެންބަރަކު އަމިއްލައަށް އިސްތިއުފާ ދޭންޖެހޭނެ ކަމަށެވެ. އަދި އިސްތިއުފާ ނުދީފިނަމަ ދެން މެންބަރާމެދު ޢަމަލުކުރެވޭނެ ގޮތެއް ބަޔާންކޮށްފައެއް ނުވެއެވެ. އަދި ޕާޓީ ބަދަލުކޮށްފިނަމަ، ސީދާ މެންބަރު ވަކިވާނެކަމަކަށްވެސް މިހާރު ޢަމަލުކުރަމުން އަންނަ އެންޓި ޑިފެކްޝަންގެ ޤާނޫނުގައި ނޯވެއެވެ.