ފީފާ ކުލަބު ވޯލްޑް ކަޕްގެ އެންމެ ފަހުގެ ޗެމްޕިއަން މެންޗެސްޓަރ ސިޓީ އިޓަލީގެ ޔުވެންޓަސް އާއި އެއް ގްރޫޕެއްގައި ހިމެނިއްޖެ އެވެ.
ގިނަ އަހަރު ތަކަކަށްފަހު މުޅިން އައު ފޯމެޓަކަށް ކުރިއަށް އޮތް ފީފާ ކްލަބް ވޯލްޑް ކަޕް މުބާރާތް ބަދަލުކޮށްފައިވާއިރު މި ފަހަރުގެ މުބާރާތުގައި ދުނިޔޭގެ އެކި ކަންކޮޅުތަކުން 32 ޓީމު ވާދަކުރާނެ އެވެ. އަންނަ އަހަރުގެ ޖޫން 15 އިން ޖުލައި 13 އަށް އެމެރިކާގައި ކުރިއަށްދާ މި މުބާރާތުގެ ފުރަތަމަ މެޗުގައި ބައްދަލު ކުރާނީ އެމެރިކާގެ އިންޓަރ މަޔާމީ އާއި މިސްރުގެ އަލް އަހުލީ އެވެ.
މުބާރާތުގައި ވާދަކުރާ 32 ޓީމު އަށް ގްރޫޕަކަށް ބަހާލާފައިވާއިރު ގްރޫޕް ސްޓޭޖުގައި ކޮންމެ ޓީމެއްވެސް ތިން މެޗު ކުޅޭނެ އެވެ. އެންމެ ފަހުގެ ޗެމްޕިއަން މެންޗެސްޓަރ ސިޓީ ހިމެނޭ ގްރޫޕް ޖީ ގައި ދެން ހިމެނެނީ ޔުވެންޓަސްގެ އިތުރުން މޮރޮކޯގެ ވައިދާދް އާއި ޔޫއޭއީގެ އަލް އައިން އެވެ.
2021 ވަނަ އަހަރުގެ ކްލަބް ވޯލްޑް ކަޕް ކާމިޔާބު ކުރި ޗެލްސީ ހިމެނިފައިވާ ގްރޫޕް ޑީ ގައި ދެން ހިމެނެނީ މެކްސިކޯގެ ލިއޯން އާއި ޓިއުނީޝިއާގެ އެސްޕެރަންސޭ އާއި ބްރެޒިލްގެ ފްލެމިންގޯ އެވެ.
ޔޫރަޕްގެ ވަރުގަދަ ދެ ބާރު ކަމުގައިވާ ސްޕެއިން އެތްލެޓިކޯ މެޑްރިޑް އާއި ފްރާންސްގެ ޕީއެސްޖީގެ އިތުރުން މެކްސިކޯގެ ބޮޓަފޮގޯ އަދި އެމެރިކާގެ ސިއޭޓަލް ސައުންޑާސް ހިމެނިފައިވަނީ ގްރޫޕް ބީ ގައެވެ.
ފީފާ ކްލަބް ވޯލްޑް ކަޕްގައި ދުނިޔޭގެ ހަ ބައްރުގެ ޓީމުތައް ވާދަކުރާއިރު މި މުބާރާތުގައި ހިމެނޭ 32 ޓީމުގެ ތެރެއިން 12 ޓީމަކީ ޔޫރަޕްގެ ޓީމުތަކެވެ. ޔޫރަޕުން މި މުބާރާތުގައި ވާދަކުރާ ޓީމުތައް ފައިނަލް ކޮށްފައިވަނީ ފާއިތުވެދިޔަ ހަތަރު އަހަރުގެ ތެރޭގައި ޔޫއެފާ ޗެމްޕިއަންސް ލީގުގައި ދައްކާފައިވާ ކުޅުމަށް ބެލުމަށްފަހުގަ އެވެ.
މި މުބާރާތުގައި ވާދަކުރާ ޓީމު ތަކުގެ ތެރޭގައި މުބާރާތް ބާއްވާ ގައުމުގެ ޓީމަކަށް ފުރުސަތު ދިނުމަށް ހަމަޖައްސާ ފީފާ އިން ވަނީ އެ ފުރުސަތު އިންޓަރ މަޔާމީ އަށް ދީފަ އެވެ. އަދި އެކަމާއި ގުޅިގެން ބައެއް ފަރާތްތަކުގެ ފާޑުކިއުންތައް ފީފާވަނީ އަމާޒުވެފަ އެވެ.