އަމާޒަކީ އަތޮޅުތެރޭގައިވެސް "ރަހަވަރު" މުބާރާތް ކުރިއަށްގެންދިއުން: ވަޒީރު ޝިޔާމް

މަސްވެރިންގެ ދުވަސް ފާހަގަކުރުމަށް މިއަހަރު ބާއްވަން ފެށި "ރަހަވަރު" ކެއްކުމުގެ މުބާރާތް ކުރިއަށްއޮތްތަނުގައި މުޅި ރާއްޖޭގައި ކުރިއަށްގެންދިއުމުގެ ވިސްނުންފުޅު ގެންގުޅުއްވާކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

މަސްވެރިކަމާބެހޭ ވަޒީރު މިހެން ވިދާޅުވީ މިއަހަރުގެ މަސްވެރިންގެ ދުވަސް ފާހަގަކުރުމަށް އެ ވުޒާރާއިން އިންތިޒާމްކޮށްގެން ބޭއްވި "ރަހަވަރު" ކެއްކުމުގެ މުބާރަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

"ރަހަވަރު" ކެއްކުމުގެ މުބާރާތަކީ މިއަހަރުގެ މަސްވެރިންގެ ދުވަސް ފާހަގަކުރުމަށް ބޭއްވި ފުރަތަމަ ހަރަކާތެވެ. މި މުބާރާތުގައި 7 ޓީމަކުން 35 އަށްވުރެ ގިނަ މީހުން ބައިވެރިވިއެވެ. މި މުބާރާތުގައި ކެއްކި ތަކެތި ތައްޔާރުކޮށްފައިވަނީ ފަރުމަހާއި މުށިމަސް ބޭނުންކޮށްގެންނެވެ.

"ރަހަވަރު" ކެއްކުމުގެ މުބާރަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ މިއަހަރު ކެއްކުމުގެ މުބާރާތް ޢާންމުންނަށް ހުޅުވާލައިގެން ބޭއްވި ނަމަވެސް، އަންނަ އަަހަރު ސްކޫލް ދަރިވަރުން އަމާޒުކޮށްގެން މުބާރަތް ބޭއްވުމުގެ ވިސްނުންފުޅު ގެންގުޅުއްވާކަމަށެވެ. މީގެއިތުރުން ކުރިއަށްއޮތްތަނުގައި ވީހާވެސް ގިނަ ބަޔަކު ބައިވެރިވާގޮތަށް، އަތޮޅުތެރޭގެ ރަށްތަކުގައި ބޭއްވުމުގެ ވިސްނުން ގެންގުޅުއްވާކަންވެސް ވަޒީރު ހާމަކުރެއްވިއެވެ.

ވަޒީރުގެ ވާހަކަފުޅުގައި މިއަހަރުގެ މަސްވެރިންގެ ދުވަސް ފާހަގަކުރުމަށްވެސް ގިނަ ހަރަކާތްތަކެއް ބާއްވާނެކަމަށްވެސް ވިދާޅުވިއެވެ. .

"މިއަހަރުގެ މަސްވެރިންގެ ދުވަސް ފާހަގަކުރުމަށް އާރޓް އެގްޒިބިޝަނެއް ވަނީ ބާއްވަން ހަމަޖެހިފައި. އަދި މަސްވެރިންގެ ގުންޒަރާއި މަސްރޭސްވެސް އޮންނާނެ. ޖަލްސާ އޮންނަނީ އަންނަ ހުކުރު ދުވަހުގެ ރޭ ދަރުބާރުގޭގައި" ވަޒީރު ވިދާޅުވިއެވެ.

މަސްވެރިކަމާބެހޭ ވުޒާރާއިން ވިދާޅުވީ މަސްވެރިންގެ ދުވަހަށް ޙާއްސަކޮށް ކެއްކުމުގެ މުބާރާތެއް ބޭއްވުމުގެ ބޭނުމަކީ އެކި ބާވަތުގެ ކަނޑު މަހުން އުފައްދާ އުފެއްދުންތައް އިތުރުކުރުމަށް ބާރުއަޅައި، އެކަމަށް ލޯބި ޖެއްސުން ކަމަށެވެ. އަދި މަސްވެރިކަމުން އުފައްދާ ކާނާގެ ބާވަތްތައް އިތުރުކުރުމަކީ މަސްވެރިކަމުގެ ސިނާޢަތް ސިންދަފާތުކުރުމަށް މުހިންމު ކަމެއްކަންވެސް އެ ވުޒާރާއިން ފާހަގަކުރައްވައެވެ.

"ރަހަވަރު" ކެއްކުމުގެ މުބާރާތުން 1 ވަނަ ލިބުނީ ފަތްމިނި ކަމަނަ ޓީމަށެވެ. "ޓީމް ފުޑް ބަޑީސް"އަށް ދެވަނަ ލިބިފައިވާއިރު 3 ވަނަ ލިބުނީ "ޓީމް ނޯޑިކް ބައިޓްސް"އަށެވެ. މުބާރާތުގެ 1 ވަނައަށް އައި ޓީމަށް ފައިސާގެ އިނާމްގެ ގޮތުގައި 10،000 ރުފިޔާ ދީފައިވާއިރު ދެވަނައަށް 7،000 ރުފިޔާ އަދި 3 ވަނައަށް 5،000 ރުފިޔާވަނީ ދީފައެވެ.

މުބާރާތުން 1 ވަނައަށް އައި ފަތްމިނި ކަމަނަ ޓީމުގެ އައިމިނަތު ޝިފާ ވަނީ އޭނާގެ ތަޖުރިބާ ޕީއެސްއެމް ނިއުސްއާ ހިއްސާކޮށްފައެވެ.

"ޝަވަރުމާ ރައިސްއެއް ހެދީ ފާނަ މަސް ބޭނުންކޮށްގެން. އަދި މުށި މަސް ބޭނުންކޮށްގެންވެސް ޑިޝްއެއް ތައްޔާރުކުރިން. އަދި މަސް ބޭނުންކޮށްގެން ކޭކަކާއި މުށި މަހުން މިނީ ބާގާއެއްވެސް ހެދިން." ޝިފާ ބުންޏެވެ.

މަސްވެރިންގެ ދުވަސް ފާހަގަކުރަނީ ކޮންމެ އަހަރެއްގެވެސް ޑިސެންބަރުމަހުގެ 10 ވަނަ ދުވަހުއެވެ. މަސްވެރިންގެ ދުވަހުގެ ރަސްމީ ޖަލްސާ ރާއްޖޭގެ އެކި ސަރަހައްދުތަކުގައި ބާއްވަމުން އަންނައިރު، މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ މާލޭގައެވެ.