މާލެ ސަރަޙައްދުގެ ސިއްޙީ ނިޒާމަށް 117 އެނދު އިތުރުކުރަނީ
-
އައިޖީއެމްއެޗްގެ ކުރީގެ އެޑްމިނިސްޓްރޭޓިވް ބްލޮކް ވޯޑަށް 75 އެނދު އިތުރުކުރާނެ
-
ހުޅުމާލޭ ހޮސްޕިޓަލް 6 ބުރީގެ ޢިމާރާތުގެ 3 ވަނަ ފަންގިފިލާއަށް 28 އެނދު އިތުރުކުރާނެ
-
އެހޮސްޕިޓަލުގެ އީއާރަށްވެސް 14 އެނދު އިތުރުކުރާނެ
އަންނަ އަހަރު ކުރީކޮޅު މާލެ ސަރަޙައްދުގެ ސިއްޙީ ނިޒާމަށް 117 އެނދު އިތުރުކުރެވޭނެކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.
މިމަޝްރޫޢުގެ ދަށުން އެނދުތައް އިތުރުކުރުމަށް މަސައްކަތްކުރަމުންދަނީ އައިޖީއެމްއެޗާއި، ހުޅުމާލެ ހޮސްޕިޓަލަށް ކަމަށް ސީއީއޯ ވިދާޅުވިއެވެ.
ޒަމާނުއްސުރެ ރާއްޖޭގެ މުޅި ސިއްޙީ ނިޒާމު ބަރޯސާވެފައިވަނީ މާލެ ސަރަޙައްދުގައި ހިމެނޭ ހޮސްޕިޓަލްތަކަށެވެ. އާބާދީގެ ނިސްބަތުން އެންމެ ގިނަ ބަޔަކު ދިރިއުޅެމުންދާ މާލޭ ސަރަޙައްދުގައި އެކަށީގެންވާ މިންވަރާ ގާތަށްވެސް ސިއްޙީ ޚިދުމަތުގެ ފެންވަރު މައްޗަށް ގެންދެވިފައިނުވެއެވެ. ގިނަ ޚިދުމަތްތައް ތަޢާރަފްކޮށް ޚިދުމަތްފުޅާކުރުމަށް އޮތް އެންމެ ބޮޑު އެއް ހުރަހަކީ އަބާދީއާއި ނުބައްދަލު އެނދުގެ ރޭޝިއޯއެވެ.
ޕީއެސްއެމް ނިއުސްއަށް ދެއްވި އިންޓަރވިއުއެއްގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، މުޅި ރާއްޖޭގެ އެކި ސަރަޙައްދުތަކުން މާލެ ސަރަޙައްދުގައި ހިމެނޭ ސަރުކާރު ހޮސްޕިޓަލްތަކަށް ބަލިމީހުން ރިފަރކުރާއިރު، އާބާދީއަށްވުރެ ބޮޑުތަނުން މަދުކޮށްހުރި މިހޮސްޕިޓަލްތަކުގެ އެނދުތަކަށް ބާރު ބޮޑުވެގެންދާކަމަށެވެ.
އެއީ ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމަށް އަބަދުވެސް ކުރިމަތިވަމުންދާ އެންމެ ބޮޑު ހުރަސްކަމަށް އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ. އެގޮތުން މާލެ ސަރަޙައްދުގައި ވޭތުވެދިޔަ 30 އަހަރުގެ ތެރޭގައި ސިއްޙީ ނިޒާމުގައި ހުރީ 316 އެނދުކަން ފާހަގަކުރެއްވިއެވެ.
ސަރުކާރުގެ ބޮޑެތި ހޮސްޕިޓަލުތަކުގެ އެނދުގެ ކެޕޭސިޓީ 316 އިން 433 އަށް އިތުރުވާނެ
އެހެންކަމުން މިކަމަށް ޙައްލެއްގެނައުމަށް މިހާރު ކުރަމުންގެންދާ މަސައްކަތްތަކުން އަންނަ އަހަރުގެ ކުރީކޮޅު ބަދަލު ފެނިގެންދާނެކަމަށް ވިދާޅުވިއެވެ. އެގޮތުން އައިޖީއެމްއެޗާއި ހުޅުމާލޭ ހޮސްޕިޓަލުގައި އިތުރު އެނދުތައް ޤާއިމުކުރުމުގެ މަސައްކަތް ކުރަމުންދާކަމަށް އިބްރާހީމް ޢަބްދުއްރައްޒާޤް ވިދާޅުވިއެވެ.
"އައިޖީއެމްއެޗްގެ ކުރީގެ އެޑްމިނިސްޓްރޭޓިވް ބްލޮކް އެއްކޮށް ހުސްކޮށްފައި އެތަނުގައި އަޅުގަނޑުމެން މިހަދަނީ ވޯޑެއް. އެތަނުގައި ހަދަމުންދާ 75 އެނދުގެ ވޯޑުގެ މަސައްކަތް މިއަހަރު ނިންމާ އަންނަ އަހަރުގެ ކުރީކޮޅު ޚިދުމަތްދޭން ފެށޭނެ. އަދި ހުޅުމާލޭ ހޮސްޕިޓަލުގެ އީއާރް ބޮޑުކުރުމުގެ މަސައްކަތުގެ ދަށުން 14 އެނދު އިތުރުކުރުމުގެ މަސައްކަތް މިދަނީ ކުރަމުން." އިބްރާހީމް ޢަބްދުއްރައްޒާޤް ވިދާޅުވިއެވެ.
އަދި ހުޅުމާލޭ ހޮސްޕިޓަލުގެ 6 ބުރީ ޢިމާރާތުގެ 3 ވަނަ ފަންގިފިލާއަކީ ވޯޑެއްގެ ގޮތުގައި ހަމަޖައްސާ އެތަނަށް 28 އެނދު އިތުރުކުރުމުގެ މަސައްކަތްކުރަމުންދާކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ. މިއީ އަންނަ އަހަރުގެ ކުރީކޮޅަށް ރާވާފައިވާ ބައެއް މަސައްކަތްތައްކަމަށް ސީއީއޯ ވިދާޅުވިއެވެ. މިމަޝްރޫޢުތަކާއެކު މާލެ ސަރަޙައްދުގެ ސަރުކާރު ހޮސްޕިޓަލުތަކުގެ އެނދުގެ ކެޕޭސިޓީ 433 އަށް އިތުރުވެގެންދާނެއެވެ.
ސަރުކާރުން ސިއްޙީ ނިޒާމަށް ކަނޑައަޅާފައިވާ އެހެނިހެން މަޝްރޫޢުތަކުގެ ތެރެއިން މާލެ ސަރަޙައްދުގައި ތަރައްޤީކުރާ ކެންސަރު ހޮސްޕިޓަލާއި، ތެލަސީމިއާ ހޮސްޕިޓަލާއި، ވިލިމާލޭ ޓާޝަރީ ހޮސްޕިޓަލާއި ހުޅުމާލޭ ހޮސްޕިޓަލަށް އިތުރުކުރާ އެކްސްޓެންޝަން ޢިމާރާތާއެކު އެނދުގެ ކެޕޭސިޓީ އިތުރުވެގެންދާނެއެވެ.