އަނިޔާވެރި އަމަލުތަކަށް ހިތްވަރުދިނުމަކީ ޚިޔާލު ފާޅުކުރުމުގެ މިނިވަންކަމުގެ ރޫޙާއި ޚިލާފު އަމަލެއް: އެޗްއާރްސީއެމް

އަނިޔާވެރި އަމަލުތަކަށް ހިތްވަރު ލިބޭގޮތަށް ފާޅުކުރެވޭ ޚިޔާލުތަކަކީ، ޚިޔާލު ފާޅުކުރުމުގެ މިނިވަންކަމުގެ ހައްޤުގެ ރޫޙާ ޚިލާފު އަމަލެއްކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ވިދާޅުވެއްޖެއެވެ.

އެ ކޮމިޝަނުން މިހެން ވިދާޅުވީ މޯލްޑިވިއަން ޑިމޮކްރެޓިކް ޕާޓީން ދާދިފަހުން ބާއްވާފައިވާ ހަފްލާތަކެއްގައި އާންމުންގެ މެދުގައި ނަފުރަތު އުފައްދާ އަނިޔާވެރިވުމަށް ހިތްވަރު ލިބޭގޮތަށް ޕާޓީއަށް ނިސްބަތްވާ ފަރާތްތަކުން އެކިއެކި ވާހަކަދައްކައި އާންމުވެފައިވާ ވީޑިއޯތަކާ ގުޅޭގޮތުން ނެރުނު ބަޔާނެއްގައެވެ.

އެޗްއާރްސީއެމްއިން ނެރުނު ބަޔާނާގައި ވިދާޅުވީ މިނިވަންކަމާއެކު ފިކުރުކުރުމާއި އިސްލާމްދީނުގެ އަސްލަކާ ޚިލާފުނުވާ ގޮތެއްގެމަތީން އެމީހެއްގެ ބުއްދިއަށް ފެންނަ ގޮތްތަކާއި، ޚިޔާލުތައް ދުލާއި ގަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަމަކީ ޤާނޫނުއަސާސީގެ 27 ވަނަ މާއްދާއިން ކަށަވަރުކޮށްދީފައިވާ ހައްޤެކެވެ. ޚިޔާލުފާޅުކުރުމުގެ މިނިވަންކަމަކީ ވަރަށް ފުޅާކޮށް ޤާނޫނުއަސާސީގެ ދަށުން ލިބިދީފައިވާ ޙައްޤެއްކަމުގައި ވީނަމަވެސް، މި ޙައްޤުގެ ބޭނުން ކުރަންވާނީ ވަކި ހުދޫދެއްގެ ތެރެއިން، އަނެކާގެ ޙައްޤުތަކަށް އިޙްތިރާމް ކުޑަނުވާނެގޮތަށްކަމަށް ބަޔާނުގައި ވެއެވެއެވެ.

އެ ކޮމިޝަނުން ވަނީ މީހުންގެ މެދުގައި ނަފްރަތު އުފެއްދުމަށާއި، މުޖުތަމައުގެ ހަމަޖެހުމާއި މަސްލަޙަތު ނަގާލުމަށް ގޮވާލުމުގެ އިތުރުން، އަނިޔާވެރި އަމަލުތައް ކުރުމަށް ހިތްވަރު ލިބޭގޮތަށް ފާޅުކުރެވޭ ޚިޔާލުތަކަކީ، ޤާނޫނުއަސާސީގެ 27 ވަނަ މާއްދާއިން ދިވެހި ރައްޔިތުންނަށް ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމުގެ ހައްޤުގެ ރޫޙާ ޚިލާފު އަމަލެއްކަން ފާހަގަކޮށްފައެވެ. އަދި މިފަދަ ޢަމަލުތައް ކުރުމަށް ހިތްވަރު ލިބޭގޮތަށް ގޮވާލައި ކުރެވޭ ޚިޔާލުފާޅުކުރުންތަކަކީ ކަންބޮޑުވާ ކަމެއްކަމަށާއި މިފަދަ ޢަމަލުތައް ކުށްވެރިކޮށް، ސިޔާސީ ޕާޓީތަކުންނާއި ޕާޓީތަކުގެ އިސްފަރާތްތަކުން މިފަދަ ޢަމަލުތައް ނުކުރުމަށް އެ ކޮމިޝަނުން ވަނީ ގޮވާލައްވާއެވެ.

ޤާނޫނުއަސާސީން ލިބިދޭ މިނިވަންކަމާއެކު ޚިޔާލުފާޅުކުރުމުގެ މިނިވަންކަމުގެ ހައްޤުގެ ބޭނުން ހިފުމުގައި، އެހެން މީހުންގެ އިންސާނީ ކަރާމަތަށާއި ހައްޤުތަކަށް ހުރުމަތްތެރިކޮށް ހިތުން އިސްކޮށް، ހަމަނުޖެހުން ހިންގުމަށާއި، އަނިޔާވެރި ޢަމަލުތައް ކުރުމަށް ހިތްވަރުލިބޭފަދަ އެއްވެސް އަމަލެއް ނުކުރުމަށް އެޗްއާރްސީއެމްއިން ވަނީ ގޮވާލައްވާފައެވެ. އަދި ސިޔާސީ ހަރަކާތްތަކުގެ ތެރެއިން ޚިޔާލާއި ޝުއޫރު ފާޅުކުރުމުގައި އަނެކާގެ އަބުރާއި ނަފްސަށް ގެއްލުންވާފަދަ އަދި ނަފްރަތު އުފެދޭފަދަ އެއްވެސް ޢަމަލެއް ނުކުރުމަށާއި، ސިޔާސީ ޕާޓީތަކުން އިންތިޒާމްކުރާ ހަރަކާތްތަކުގައި އާންމު މަސްލަހަތު އިސްކޮށް، މިފަދަ ކަންކަން ނުހިނގާނެގޮތަށް ސިޔާސީ ހަރަކާތްތައް ރޭއްވުމަށް އިސްކަންދެއްވުމަށް ސިޔާސީ ޕާޓީތަކަށް އެ ކޮމިޝަނުން ވަނީ ގޮވާލައްވާފައެވެ.

އެޗްއާރްސީއެމްގެ ބަޔާނުގައި ވަނީ ސިޔާސީ ޕާޓީތަކުން ކުރިއަށްގެންދާ ހަރަކާތްތައް ސުލްހަވެރިކަމާއެކު، ކަނޑައެޅިފައިވާ ޤާނޫނީ އިމުގެ ތެރެއިން ކުރިއަށް ގެންދިއުމަށް ހުރިހާ ޕާޓީތަކަށް އިލްތިމާސްކުރައްވާފައެވެ.