މަސްވެރިންގެ ދުވަހު ބޭއްވި މަސްރޭހުން އެއްވަނަ ފުއްލާޒް ރެކްރިއޭޝަން ކުލަބް

44 ވަނަ މަސްވެެރިންގެ ދުވަހާއި ގުޅުވައިގެން ބޭއްވި މަސްރޭސް ކާމިޔާބު ކަމާއެކު ނިންމާލައިފިއެވެ.

މަސްވެރިންގެ ދުވަސް ފާހަގަކުރުމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ބޭއްވި މަސްރޭހުގައި ސަރުކާރުގެ ވުޒާރާތަކާއި ކުންފުނިތަކާއި އަމިއްލަ އެކި ފަރާތްތައް ހިމެނޭހެން ޖުމްލަ 25 ޓީމު ވަނީ ބައިވެރިވެފައެވެ. މިޓީމުތަކުގައި 500އަށްވުރެ ގިނަ މީހުން ތިބިއެވެ.

މެންދުރު 3 ޖެހިއިރު ޓީމްތައް ފުރައިގެންގޮސް އަނބުރާ އައިސްފައިވަނީ ރޭގަނޑު 9 ޖެހިއިރުއެވެ. ޓީމްތައް ލަފާ ވަރަކުން އެ ޓީމަކުން ބޭނި މަސްތައްވަނީ ކިރާފައެވެ. މަސްތައް ކިރާ ނިމުމުން މަސްރޭހުން ވަނަ ވަނައަށް ދިޔަ ޓީމްތައް ވަނީ އިއުލާންކޮށްފައެވެ.

އެންމެގިނަ ޕޮއިންޓް ހޯދައިގެން މަސްރޭހުން އެއްވަނަ ހޯދާފައިވަނީ ފުއްލާޒް ރެކްރިއޭޝަން ކުލަބެވެ. ދެވަނަ ހޯދާފައިވަނީ ޗިލް ބްރޯސް ނަމަކަށް ކިޔާ ޓީމަކުންނެވެ. އަދި ތިން ވަނަ ހޯދާފައިވަނީ އެސްޓީއޯއިންނެއެވެ. މީގެ އިތުރުން އެންމެ ބަރުމަސް ބޭނި ފަރާތަކަށް ހޮވިފައިވަނީ އެމްޕީއެލް ޓީމްގެ މެމްބަރެކެވެ.

މަސްރޭހުން މޮޅުވި 3 ޓީމަށް ފައިސާގެ އިނާމުވަނީ ހަވާލުކޮށްފައެވެ. އެގޮތުން 1 ވަނަ ޓީމަށް 25،000 ރުފިޔާ، 2 ވަނަ ޓީމަށް 20،000 ރުފިޔާ އަދި 3 ވަނަ ޓީމަށް 15،000ވަނީ ދީފައެވެ. މީގެ އިތުރުން އެންމެ ބަރުމަސް ބޭނި ފަރާތަށް 2000 ރުފިޔާގެ ފައިސާގެ އިނާމް ވަނީ ހަވާލުކޮށްފައެވެ.

މަސް ރޭސް ނިންމުގެ ރަސްމިއްޔާތުގައި ވާހަކަދައްކަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވީ މި އަހަރުގެ މަސްރޭސް ވަރަށް ކާމިޔާބުކަމަށެވެ. މިމަސްރޭހަށް ބަލާލިނަމަވެސް މަސްވެރިކަމަށް އޮތް ޝައުގުވެރިކަން ފެނިގެން ގޮސްފައިވާކަމަށް ވަޒީރު ވިދާޅުވިއެވެ.

" ރާއްޖޭގައި ބޭއްވޭ މި ފަދަ މުބާރާއްތަކުގައި ބައިވެރިވާ ބައިވެރިވުމަކީ ފައިސާއަށް ނުވަތަ ދެވޭ އިނާމަކަށް ބައިވެރިވާ ބައިވެރިވުމެއް ނޫންކަން އިނގޭ. އެއީ ހަމަ ހިންހަމަޖެހުމަށް" ވަޒީރު ވިދާޅުވިއެވެ.

ވަޒީރު ޝިޔާމް ވިދާޅުވީ މަސްވެރިންގެ ދުވަސް ފާހަގަކުރުމުގެ ހަރަކާތްތައް ކުރިއަށްގެންދަނީ އާންމުކޮށް މާލެއިން ބޭރުގައިކަމަށެވެ. ނަމެސް ފާއިތުވި 2 އަހަރު ހަރަކާތްތައް ބޭއްވީ މާލޭގައެވެ. މިއާއެކުވެސް މަސްވެރިންގެ ދުވަހުގެ ހަރަކާތްތަކަށް އޮތް ޝައުގުވެރިކަން ބޮޑުކަން ފާހަގަކުރެވުނުކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވިއެވެ.