އުނގޫފާރު ހޮސްޕިޓަލުގައި އެމްއާރުއައިގެ ޚިދުމަތް، ޓަރޝަރީ ފެންވަރަށް ހޮސްޕިޓަލް ތަރައްޤީކުރުމުގެ ފެށުން

އެމްއާރުއައިގެ ޚިދުމަތް ޤާއިމްވެގެންދިޔުމަކީ އުނގޫފާރު ހޮސްޕިޓަލް ޓަރޝަރީ ފެންވަރަށް ތަރައްޤީކުރުމުގެ ފެށުންކަމަށް ޞިއްޙީ ވަޒީރު ޢަބްދުﷲ ނާޡިމް ވިދާޅުވެއްޖެއެވެ.

ވަޒީރު މިހެން ވިދާޅުވީ އުނގޫފާރު ރީޖަނަލް ހޮސްޕިޓަލްގައި އެމްއާރުއައިގެ ޚިދުމަތް ފެށުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ. އުނގޫފާރު ރީޖަނަލް ހޮސްޕިޓަލްގައި ރަސްމީކޮށް އެމްއާރުއައިގެ ޚިދުމަތް ފަށްޓަވާދެއްވީ ޞިއްޙީ ވަޒީރު ޢަބްދުﷲ ނާޡިމެވެ.

އުނގޫފާރު ރީޖަނަލް ހޮސްޕިޓަލްގައި އެމްއާރުއައިގެ ޚިދުމަތް ފެށުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޞިއްޙީ ވަޒީރު ޢަބްދުﷲ ނާޡިމް ވިދާޅުވީ އެމްއާރުއައިގެ ޚިދުމަތް އުނގޫފާރު ރީޖަނަލް ހޮސްޕިޓަލްގައި ޤާއިމްކުރުމަށްފަހު، އެ ހޮސްޕިޓަލް ޓަރޝަރީ ފެންވަރަށް ތަރައްޤީކުރުމަށް ބޭނުންވާ އިތުރު ޚިދުމަތްތައް ޤާއިމްކުރުމުގެ މަސައްކަތް ވަރަށް އަވަހަށް ފެށޭނެ ކަމަށެވެ. އަދި އެމްއާރުއައިގެ ޚިދުމަތް ޤާއިމްވެގެންދިޔުމަކީ ރައީސްގެ ވަޢުދާ އެއްގޮތަށް އުނގޫފާރު ހޮސްޕިޓަލް ޓަރޝަރީ ފެންވަރަށް ތަރައްޤީކުރުމުގެ މަސައްކަތް ފެށުމުގެ ފުރަތަމަ މަރުޙަލާކަން ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައި ޞިއްހީ ދާއިރާއާ ގުޅޭގޮތުން ސަރުކާރުން ގެންގުޅުއްވާ ސިޔާސަތުތަކަށްވެސް އަލިއަޅުވާލެއްވިއެވެ. އެގޮތުން ސަރުކާރުގެ އަމާޒަކީ ބަލި ޖެހުމުގެ ކުރިން ބަލިން ރައްކާތެރިވެ ތިބޭ ބަޔަކަށް ދިވެހިން ހެދުންކަމަށް ވަޒީރު ވިދާޅުވިއެވެ. އަދި މި ސިޔާސަތުގެ ދަށުން ޕްރައިމަރީ ހެލްތު ކެއަރ ނުވަތަ އިބްތިދާއީ ސިއްޙީ ޚިދުމަތުގެ ނިޒާމު ރަށްރަށުގައި ޤާއިމްކުރުމުގެ މަސައްކަތް މިހާރު ފަށާފައިވާކަން ވަޒީރު ފާހަގަކުރެއްވިއެވެ. އިބްތިދާއީ ސިއްޙީ ޚިދުމަތުގެ ނިޒާމް ޤާއިމްކުރުމުގެ ޕްރޮގުރާމަކީ ރައްޔިތުންނާ ގާތުން ޞިއްޙީ އެކި ކަންކަމަށް ހޭލުންތެރިކުރުވައި، ބަލިތަކުން ރައްކާތެރިވެވޭނެ ގޮތްތަކުގެ މަޢުލޫމާތު ފޯރުކޮށްދިނުމުގެ ޕްރޮގުރާމެކެވެ.

"ޕްރައިމަރީ ހެލްތު ކެއަރ ނިޒާމު ޤާއިމްކުރުމުގެ މަސައްކަތް ދަނީ ކުރަމުން. 2025 ނިމުމުގެ ކުރިން ޕްރައިމަރީ ހެލްތު ކެއަރ ނިޒާމު މީހުން ދިރިއުޅޭ ހުރިހާ ރަށެއްގައި ޤާއިމްކުރެވޭނެ. އޭރުން ދުޅަހެޔޮ މުޖުތަމަޢެއް ޤާއިމްކުރުމަށް ކުރަމުންދާ މަސައްކަތަށް ވަރަށް ބޮޑު ކުރިއެރުމެއް ލިބޭނެ." ވަޒީރު ވިދާޅުވިއެވެ.

އުނގޫފާރު ރީޖަނަލް ހޮސްޕިޓަލްގައި ހަށިގަނޑުގެ ކޮންމެ ގުނަވަނަކަށް ދިމަވެފައިވާ ގެއްލުމެއްވެސް ބަލައިލެވޭ އެމްއާރުއައިގެ ޚިދުމަތާއެކު ޕީއާރުޕީގެ ޚިދުމަތްވެސް ވަނީ ފަށާފައެވެ. ޕްލޭޓްލެޓް ރިޗް ޕްލާޒްމާ، ޕީއާރުޕީގެ ޚިދުމަތަކީ އިންސާނާގެ ހަށިގަނޑުގައި ހަލާކުވެފައި ހުންނަ ޓިޝޫތައް ރަނގަޅުކުރުމަށް ދެވޭ ފަރުވާގެ ޚިދުމަތެވެ.

އުނގުފާރު ރީޖަނަލް ހޮސްޕިޓަލަކީ އަތޮޅުގެ ގިނަ އަދަދެއްގެ ރައްޔިތުން ޚިދުމަތް ހޯދައި ހޮސްޕިޓަލެކެވެ. އަދި މި ހޮސްޕިޓަލް ޓަރޝަރީ ފެންވަރަސް ތަރައްޤީވެގެންދިޔުން ވާނީ ގާތުން ފެންވަރު ރަނގަޅު ޞިއްޙީ ޚިދުމަތެއް ހޯދުމަށް އަތޮޅުގެ ރައްޔިތުންކުރާ އުންމީދަށް ނިމުން ގެނެސްދޭނެ ކަމަކަށެވެ. މި ހޮސްޕިޓަލަށް 40 އަހަރު ވެފާވާއިރު، ގިނަ ޚިދުމަތްތަކެއް މިހާރު ވަނީ ޤާއިމްކޮށްފައެވެ.

މި ޚިދުމަތްތަކުގެ ތެރޭގައި ހިތުގެ ބަލިތަކުގެ ފަރުވާއާއި މެމޯގްރަފީގެ ޚިދުމަތާއި ސީޓީ ސްކޭންގެ ޚިދުމަތް ހިމެނެއެވެ. އަދި ދަތުގެ ފަރުވާއާއި އީއެންޓީގެ ޚިދުމަތް ޒަމާނީ ވަޞީލަތްތަކާއެކު ވަނީ ފުޅާކޮށްފައެވެ.