ދަރަނީގެ ނުރައްކަލުން އެންމެ ނާޒުކު ފަރާތްތަކުގެ ރައްކާތެރިކަން ކަށަވަރުކުރަންޖެހޭ: ވަޒީރު މޫސާ ޒަމީރު

ދަރަނި ބޮޑުވުމުގެ ސަބަބުން ކުރިމަތިވާ ހިރާސްތަކުން އެންމެ ނާޒުކު ހާލަތުގައި ދިރިއުޅޭ ފަރާތްތައް ރައްކާތެރި ކުރަން ޖެހޭ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ، އިންޑިއާގެ ނިއުދިއްލީގައި ބޭއްވި ގްލޯބަލް އިކޮނޮމިކް ފޯރަމް 2024 ގައި ވާހަކަފުޅުދައްކަވަމުންނެވެ.

މި ފޯރަމުގައި ވާހަކަފުޅުދައްކަވަމުން މާލީ ވަޒީރު ވަނީ ދުނިޔޭގެ އިޤްތިޞާދު ކުރިމަތިލާންޖެހިފައިވާ ގޮންޖެހުންތަކަށް އަލިއަޅުއްވާލައްވާފައެވެ. އެގޮތުން، ރަޝިއާ-ޔޫކްރެއިން ހަނގުރާމާއި މެދުއިރުމަތީގައި ހިނގަމުންދާ ކަންކަމުގެ ސަބަބުން ދުނިޔޭގެ ވިޔަފާރި އަދި އިޤްތިޞާދަށް ބޮޑެތި ބަދަލުތަކެއް އައިސްފައިވާކަން ވަޒީރު ފާހަގަކުރެއްވިއެވެ.

އެގޮތުން ތެލާއި ކާބޯތަކެތީގެ އަގު އުފުލިފައިވާކަން ފާހަގަކުރައްވާ ވަޒީރު ވިދާޅުވީ މިކަމުގެ ސަބަބުން ރާއްޖެއަށްވެސް މާލީ ގޮތުން ގޮންޖެހުންތަކާއި ކުރިމަތިލާންޖެހިފައިވާ ކަމަށެވެ. މީގެ އިތުރުން ކޯވިޑުގެ ޢާލަމީވަބާގެ ސަބަބުން ބޮޑެތި އަދަދުން ދަރަނިތައް ނަގަން ޤައުމުތަކަށް މަޖުބޫރުވިކަން ފާހަގަކުރައްވާ ވަޒީރު ވިދާޅުވީ، މިހާރު އެދަރަނިތައް ދެމެހެއްޓެނިވި ގޮތެއްގައި ދެއްކުމަށް ގޮންޖެހުންތައް ހުރި ކަމަށެވެ. ނަމަވެސް މިކަމުން އަރައިގަތުމަށް މަސައްކަތް ކުރާއިރު މާލީ ހަރުދަނާކަން ދަމަހައްޓާ ސިޔާސީ އަދި އިސްތިރާޖީ ހަޤީޤަތައް މަސައްކަތްތައް ބައްޓަން ކުރަން ޖެހޭ ކަމަށް ވިދާޅުވިިއެވެ.

މިއާއެކު ރާއްޖެ ފަދަ ޤައުމުތަކުން ދަރަނިތައް އަދާކުރަމުން އަންނައިރު އެންމެ ނާޒުކު ފަރާތްތަކަށް މިކަމުގެ ސަބަބުން ދިމާވެދާނެ ނުރައްކަލަކުން ސަލާމަތްކުރުމަށް މަސައްކަތް ކުރަންޖެހޭކަމަށް މާލީ ވަޒީރު ވިދާޅުވިއެވެ.

"ރާއްޖޭ ފަދަ ޤައުމަކުން ދަރަނި އަދާކުރުމުގައި އުފެއްދުންތެރި ވިސްނުން ޚިޔާރުކޮށް، އާމްދަނީ އިތުރުކޮށް އެންމެ ނާޒުކު ފަރާތްތައް ރައްކާތެރިކުރަން ޖެހޭ. އަދި ބައިނަލްއަޤްވާމީ އިދާރާތަކުން ލުއި އެހީތަކެއް ދިނުމަކީ ދެމެހެއްޓެނިވިކަން ކަށަވަރުކުރުކޮށް މެދުރާސްތާގައި މާލީ ހާލަތު ރަނގަޅުކުރުމަށް މުހިންމު ކަމެއް " ވަޒީރު ޒަމީރު ވިދާޅުވިއެވެ.

މާލީ ވަޒީރުގެ ވާހަކަފުޅުގައި ރާއްޖެއަކީ މޫސުމީ ބަދަލުތަކުގެ ބޮޑެތި ހިރާސްތަކާއި ކުރިމަތިލާންޖެހިފައިވާ ޤައުމެއް ކަމަށް ވިދާޅުވިއެވެ. އަދި މިއާއެކުވެސް ރާއްޖޭގައި ވިލުންތެރިކަން އިތުރުކޮށް މިހާލަތުން އަރައިގަތުމަށް މަސައްކަތް ކުރައްވަމުން އަންނަކަން މާލީ ވަޒީރު ފާހަގަކުރެއްވިއެވެ.

އެގޮތުން ރާއްޖޭގައި ބޭނުން ކުރާ ހަކައިތައިގެ 33 އިންސައްތަ އިޔާދަ ކުރަނިވި ހަކަތައަށް ބަދަލު ކުރުމަށް މަސައްކަތް ކުރަމުންދާކަން ފާހަގަކުރައްވާ މާލީ ވަޒީރު ވަނީ މިފަދަ ލަނޑުދަނޑިތައް ހާސިލްކުރުމަށް ގުޅިގެން މަސައްކަތް ކުރަންޖެހޭކަމަށް ވިދާޅުވެފައެވެ. އަދި ޤައުމުތަކުން މާލީ އެހީތެރިކަމުގެ އިތުރަށް ފަންނިޔާތު ހިއްސާކުރުން މުހިންމުކަމަށް މާލީ ވަޒީރުގެ ވާހަކަފުޅުގައި ވަނީ ފާހަގަކުރައްވާފައެވެ.