ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ހއ. ދިއްދޫ ބަލިކޮށް، މުބާރާތުގެ ކުއާޓާ ފައިނަލުގެ ޖާގައެއް ބ. އޭދަފުށިން ހޯދައިފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ގްރޫޕް އެފްގެ މެޗު އޭދަފުށިން ކާމިޔާބުކޮށްފައިވަނީ 4-1 ގެ ނަތީޖާއަކުންނެވެ. މި ނަތީޖާއާއެކު އޭދަފުށީގެ އިތުރުން ކ. މާފުއްޓަށްވެސް ކުއާޓާގެ ޖާގައެއް ޔަގީންވެފައިވާއިރު، ދިއްދޫ ވަނީ މުބާރާތުން ކަޓާފައެވެ. މި ގްރޫޕުގައި ހިމެނޭ ތިން ޓީމަށްވެސް ދެ މެޗުން ތިން ޕޮއިންޓް ލިބިފައިވާއިރު، ލަނޑުގެ ތަފާތުން އެއްވަނަ ލިބުނީ އޭދަފުއްޓަށެވެ. އަދި މާފުއްޓަށް ދެވަނަ ލިބުނުއިރު، ދިއްދޫ ދިޔައީ ފުލަށެވެ.
މިއަދު ހަވީރު ކުޅުނު މެޗުގައި އޭދަފުށީގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 21 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު ޖަހައިދިނީ އަލީ ނަސީމެވެ. އަދި މެޗުގެ 65 ވަނަ މިނެޓުގައި އޭދަފުށިން ލީޑު ފުޅާކޮށްފައިވަނީ ޖައުޝަން މުޙައްމަދު ކާމިޔާބުކޮށްދިން ލަނޑުންނެވެ. އޭގެ ފަހުން މެޗުގެ ފަހުކޮޅު އޭދަފުށީގެ މުޙައްމަދު ފާސިރު ވަނީ ދެ ލަނޑު ޖަހައި، އެ ޓީމަށް ކުއާޓާގެ ޖާގައެއް ކަށަވަރުކޮށްދީފައެވެ. މި މެޗުގައި ދިއްދޫން ލަނޑެއް ޖަހާފައިވަނީ މެޗުގެ އިތުރު ވަގުތުގެ ނުވަވަނަ މިނެޓުގައެވެ. މި ލަނޑު ކާމިޔާބުކޮށްދިނީ ހުސައިން ޒިމްޔާނެވެ.
މި މުބާރާތުގެ ކުއާޓާގެ ޖާގަތައް މިހާތަނަށް އައިރު ކަށަވަރުކޮށްފައިވަނީ އޭދަފުއްޓާއި މާފުށީގެ އިތުރުން މާލެ ސިޓީ އާއި، ރ. އަލިފުއްޓާއި، ޅ. ނައިފަރު އަދި ކ. ގުރައިދޫންނެވެ. މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.