ނޭޕާލުގައި ބޭއްވި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ކުލަބު ޗެމްޕިއަންޝިޕް 2024 ގެ ތިންވަނަ ހޮވި މެޗުގައި އީރާނުގެ 18 އަހަރުން ދަށުގެ ޓީމު އަތުން ބަލިވެ ރާއްޖޭގެ ކުލަބު އެޗްޑީސީއަށް މުބާރާތުގެ ހަތަރުވަނަ ލިބިއްޖެއެވެ.
މުބާރާތުގެ ސެމީ ފައިނަލުގައި އެޗްޑީސީ ވާދަކުރީ ރޭންކިންގެ ހަތަރުވަނަ ހޯދި ޓީމުގެ ގޮތުގައެވެ. ފުރަތަމަ ބުރު ނިމުނުއިރު އީރާނު ޓީމު އޮތީ ތިންވަނައިގައެވެ. މި ނަތީޖާއާއެކު އެޗްޑީސީއަށް ލިބުނީ ފަސް ޓީމު ވާދަކުރި މުބާރާތުގެ ހަތަރުވަނަ އެވެ.
މެޗުގެ ފުރަތަމަ ސެޓުގައި ދެ ޓީމުގެ ފަރާތުންވެސް ފެނުނީ ހަމަހަމަކޮށް ކުޅުނު ތަނެވެ. މި ސެޓު އީރާނުން ކާމިޔާބުކޮށްފައިވަނީ 25-21 އިންނެވެ. ދެވަނަ ސެޓުގެ ކުރީކޮޅު އެޗްޑީސީން ވަރުގަދަކޮށް ފެށި ނަމަވެސް އީރާނު ޓީމުން ވަނީ ސެޓުގެ އެންމެ ފަހުކޮޅު ހޯދި ޕޮއިންޓުތަކާއެކު ދެވަނަ ސެޓުވެސް ކާމިޔާބުކޮށްފައެވެ. މި ސެޓު އީރާނުން ކާމިިޔާބުކުރީ 27-25 އިންނެވެ. އަދި ތިންވަނަ ސެޓުވެސް އީރާނުން ކާމިޔާބުކޮށްފައިވަނީ ހަމަ މި ނަތީޖާގައެވެ.
މުބާރާތުގައި ރާއްޖޭގެ އެޗްޑީސީއަށް މޮޅުވެވުނީ ފުރަތަމަ މެޗުން އެކަންޏެވެ. އެއީ ނޭޕާލުގެ ގަންޑަކީ އަތުން ފަހަތުން އަރާ ހޯދި މޮޅެކެވެ. އޭގެފަހުން ކުޅުނު ހުރިހާ މެޗަކުން އެޗްޑީސީ ވަނީ ބަލިވެފައެވެ.
ފަސް ޓީމު ވާދަކުރި މުބާރާތުގެ ޗެމްޕިއަންކަން ހޯދާފައިވަނީ އިންޑިއާގެ ކަލިކަޓް އެވެ. އެ ޓީމު ޗެމްޕިއަންކަން ހޯދާފައިވަނީ ހެލްޕް ނޭޕާލް ބަލިކޮށްގެންނެވެ.