އިންޓަރ ސްކޫލް ހޭންޑްބޯލް: ޗެމްޕިއަންކަން ޖަމާލުއްދީނާއި، ގުރައިދޫ، އަޙްމަދިއްޔާ އަދި އއ. އޭއީސީއަށް

އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުން ދަށުގެ ޗެމްޕިއަންކަން ޖަމާލުއްދީނާއި ގުރައިދޫ ސްކޫލް، އަދި 17 އަހަރުންދަށުގެ ޗެމްޕިއަންކަން އަހްމަދިއްޔާ އާއި އއ.އޭއީސީ ހޯދައިފިއެވެ.

މުބާރާތުގައި 15 އަހަރުން ދަށުގެ އަންހެން ޗެމްޕިއަންކަން ގުރައިދޫ ސްކޫލުން ހޯދީ އިއްޔެ ހަވީރު ކުޅުނު ފައިނަލް މެޗްގައި ރެހެންދި ސްކޫލާ ވާދަކޮށް އެންމެ ގޯލެއްގެ ތަފާތަކުން މޮޅުވެގެންނެވެ. ވާދަވެރި ކުޅުމުގައި ގުރައިދޫއިން 10 ގޯލު ޖެހިއިރު، ރެހެންދިއަށް ޖެހުނީ ނުވަ ގޯލެވެ. މެޗުގެ މޮޅު ކުޅުންތެރިއަކީ ގުރައިދޫ ސްކޫލުގެ މަރިޔަމް ރީމް ތައުރީފެވެ.

މި އުމުރުފުރާގެ ފިރިހެން ބައިގެ ޗެމްޕިއަންކަން ޖަމާލުއްދީން ސްކޫލް ހޯދީ ފައިނަލުގައި ޅ. އޭއީސީގެ މައްޗަށް ކުރިހޯދައިގެންނެވެ. ޖަމާލުއްދީން ސްކޫލުން 13 ގޯލް ޖެހިއިރު ޅ. އޭއީސިއަށް މި މެޗުގައި ޖެހުނީ ހަތް ގޯލެވެ. މި މެޗުގައި ގިނަ ގޯލުތައް ފެނިގެންދިޔައީ ދެވަނަ ހާފުގައެވެ. މެޗުގެ މޮޅު ކުޅުންތެރިއަކީ ހަތަރު ގޯލު ޖެހި ޖަމާލުއްދީން ސްކޫލުގެ މުހައްމަދު އަކުމަލް ނަސީމެވެ.

މީގެއިތުރުން މުބާރާތުގެ 17 އަހަރުންދަށުގެ ފިރިހެން ފައިނަލް މެޗުގައި އަހުމަދިއްޔާ އިންޓަނޭޝަނަލް ސްކޫލާއި ޖަމާލުއްދީން ސްކޫލް ވާދަކުރި މެޗު 22-18 ނަތީޖާއަކުން ކާމިޔާބުކޮށް އަހުމަދިއްޔާ އިން ވަނީ ޗެމްޕިއަންކަން ހޯދާފައެވެ. މި އުމުރުފުރާގެ އަންހެން ޗެމްޕިއަންކަން އއ. އަތޮޅު ތައުލީމީ މަރުކަޒު ހޯދީ ފައިނަލުގައި ހަމަދު ސްކޫލާ ވާދަކޮށް 23-15 ގެ ނަތީޖާއަކުން ކާމިޔާބުކޮށްގެންނެވެ.

މިއަހަރުގެ އިންޓަސްކޫލް މުބާރާތުގައި ގިނަ އަދަދެއްގެ ސްކޫލުތައް ވަނީ ވާދަކޮށްފައެވެ. އަދި ބޮޑު ތަރުހީބެއް ވަނީ ލިބިގެންގޮސްފައެވެ.