ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި ފުވައްމުލައް ސިޓީ އާއި ތ. ތިމަރަފުށީގެ ތެރެއިން ކުއާޓާ ފައިނަލަށް ދާނެ ޓީމެއް ކަނޑައެޅުމަށް ނެގި ގުރުއަތުލުން ފުވައްމުލަކުން ކާމިޔާބުކޮށްފިއެވެ.
މި މުބާރާތުގެ ދެވަނަ ބުރުގެ ގްރޫޕް އީގައި ހިމެނޭ މި ދެ ޓީމު ވަނީ ހުރިހާ ގޮތަކުން އެއްވަރުވެފައެވެ. އެގޮތުން ދެ ޓީމަށްވެސް ލިބިފައިވަނީ އެންމެ ޕޮއިންޓެކެވެ. މި ގްރޫޕުގައި ރޭ ކުޅުނު މެޗުގައި ފުވައްމުލައް ވަނީ ކ. ގުރައިދޫ އަތުން 1-0 ގެ ނަތީޖާއަކުން ބަލިވެފައެވެ.
އެއާއެކު މި ގްރޫޕުގައި ކުޅުނު ދެ މެޗުންވެސް މޮޅުވެ ހަ ޕޮއިންޓާއެކު ގުރައިދޫ ކުއާޓާއަށް ދަތުރުކޮށްފައިވަނީ އެއްވަނަ ޓީމުގެ ގޮތުގައެވެ. އަދި މި ގްރޫޕުގެ ދެވަނަ ޓީމު ކަނޑައެޅުމަށް ގުރުއަތުލުމެއް ބޭއްވިއިރު، މިއަދު ހަވީރު ކުރިއަށްދިޔަ ގުރުލުން ކާމިޔާބުކޮށްފައިވަނީ ފުވައްމުލަކުންނެވެ.
އެހެންކަމުން މި މުބާރާތުގެ ކުއާޓާގެ ޖާގަތައް މިހާތަނަށް އައިރު ކަށަވަރުކޮށްފައިވަނީ ފުވައްމުލަކާއި ގުރައިދޫގެ އިތުރުން ބ. އޭދަފުއްޓާއި، ކ. މާފުށި އަދި ޅ. ނައިފަރުންނެވެ.