މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) ގެ ރައީސްގެ މަގާމަށް އިތުރު ދައުރަކަށް އަޙްމަދު އާދަމް (އެޑަމް) އިންތިޚާބުވެވަޑައިގެންފިއެވެ. އެމްބީއޭގެ އައު ހިންގާ ކޮމިޓީ އިންތިޚާބުކޮށްފައިވަނީ ހ. ބޯޅަގޭގައި ހޮނިހިރު ދުވަހުގެރޭ ބޭއްވި، އެ ބޯޑުގެ އިންތިޚާބީ ޖަލްސާގައެވެ.
އެމްބީއޭގެ އިންތިޚާބުގައި ވާދަކުރެއްވުމަށް ކެންޑިޑެސީ ފޯމު ހުށަހެޅުމަށް ހުޅުވާލި މުއްދަތުގައި، ކޮންމެ މަގާމަކަށްވެސް ނަން ހުށަހަޅުއްވާފައިވަނީ އެންމެ ބޭފުޅެކެވެ. އެހެންކަމުން އިންތިޚާބުގައި ނަގާފައިވަނީ ފެންނަ ނުފެންނަ ވޯޓެކެވެ. މި އިންތިހާބުގައި 12 ކުލަބެއް ބައިވެރިވެ ވޯޓު ދީފައިވާއިރު، އެޑަމް އާއި އޭނާގެ ހިންގާ ކޮމިޓީ އިންތިޚާބުކޮށްފައިވަނީ ފުރިހަމަ އަގުލަބިއްޔަތުންނެވެ.
އެމްބީއޭގެ ހިންގާ ކޮމިޓީގައި ދެ ނައިބު ރައީސުން ހިމެނިވަޑައިގަންނަވާއިރު، އިދާރީ ނައިބު ރައީސްގެ މަގާމަށް އިންތީޚާބުވެވަޑައިގަތީ ހުސެއިން ސުހެއިލްއެވެ. އަދި މާލީ ނައިބު ރައީސްއަކީ އިސްމާޢީލް ނުޖައިމީ އިބްރާހީމެވެ. މީގެ އިތުރުން ސެކްރެޓަރީ ޖެނެރަލްގެ މަގާމަށް، މިހާރުވެސް އެ މަގާމު ފުރުއްވަމުން އަންނަ ވިސާމް ރަޝީދު އިންތިޚާބުކުރެއްވިއިރު، ހިންގާ ކޮމިޓީގެ ފުރިހަމަ މެމްބަރުންގެ ގޮތުގައި އިންތިޚާބުވެވަޑައިގެންނެވީ އަޙްމަދު އަފްޝަން ރަޝާދާއި، އާދަމް މުޙައްމަދާއި، ހުސެއިން އަދުހަމް އަލީ އާއި، މުޙައްމަދު ނަސީރު އަދި އަޙްމަދު ގާސިމްއެވެ.
އެމްބީއޭގެ ރައީސްގެ މަގާމަށް ދެވަނަ ދައުރަކަށް އެޑަމް އިންތިޚާބުވެވަޑައިގެންނެވިއިރު، އޭނާ އެންމެ ފުރަތަމަ އެ މަގާމަށް އިންތިޚާބުވެވަޑައިގަތީ 2019 ވަނަ އަހަރު ބޭއްވި އންތިޚާބު ކާމިޔާބުކުރައްވައިގެންނެވެ. އޭގެ ފަހުން އޭނާ ވަނީ ރާއްޖޭގެ ބާސްކެޓަށް ގިނަ ބަދަލުތަކެއް ގެންނަވައި، ގިނަ ކުރިއެރުންތަކެއް ހޯއްދަވައިދެއްވާފައެވެ. އަދި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ހިންގާ ކޮމިޓީގައިވެސް ހިމެނިވަޑަިގަންނަވާ އެޑަމް ވަނީ މިދިޔަ އަހަރުގެ ޖެނުއަރީ މަހުގެ ތެރޭގައި ދެކުނު އޭޝިއާގެ ބާސްކެޓްބޯޅަ ފެޑެރޭޝަން (ސާބާ) ގެ ރައީސްގެ މަގާމަށްވެސް އިންތިޚާބުވެވަޑައިގެންފައެވެ.