އިންލައިން ސްކޭޓިން އިންޓަނޭޝަނަލް ޓްރޭނިންގ ކޭމްޕަކަށް ރާއްޖޭގެ މައުރޫފު ސްޕީޑް ސްކޭޓިން ކުލަބުގެ ބައިވެރިން މިމަހުގެ 20 ގައި އިންޑިއާއަށް ފުރަން ތައްޔާރުވެއްޖެ އެވެ.
މި ޓްރެއިނިން ކޭމްޕް ބާއްވަން ހަމަޖެހިފައިވަނީ އިންޑިއާގެ ކޮއިންބަތޫރުގައި 20 ޑިސެންބަރުން 4 ޖެނުއަރީގެ ނިޔަލަށެވެ. މި ކޭމްޕުގައި ރާއްޖޭގެ 18 އެތުލީޓުން ބައިވެރިވާނެއެވެ. މިއީ މައުރޫފް ސްޕީޑް ކުލަބަށް ލިބިގެންދާ ވަރަށް ބޮޑު ކުރިއެރުމެއް ކަމަށް އެ ކުލަބުގެ ހިންގާ ކޮމިޓީގެ މެންބަރުންނާއި ކުލަބު ހެޑް ކޯޗް މައުރޫފް ދެކެއެވެ.
މައުރޫފް ސްޕީޑް ސްކޭޓިން ކުލަބަކީ 2022 ވަނަ އަހަރުގެ ނޮވެމްބަރުން ފެށިގެން އިންލައިން ސްކޭޓިން އާއި ރޯލާ ސްކޭޓިން ކުޅިވަރު ދަސްކޮށްދިނުމަށް އުފައްދާފައިވާ ކުލަބެކެވެ. މި ކުޅިވަރަކީ ރާއްޖޭގައި ކުޑަކުދިންގެ މެދުގައި މަގްބޫލުވަމުން އަންނަ ކުޅިވަރެކެވެ.
ދެ އަހަރުދުވަހުގެ ތެރޭގައި މައުރޫފް ސްޕީޑް ކުލަބުން ވަނީ މާލެ އާއި ހުޅުމާލޭގައި ބާއްވާ އެކި އިވެންޓްތަކުގައި ބައިވެރިވެ 4 އަހަރާއި 15 އަހަރާއި ދެމެދުގެ ސްކޭޓަރުން ވާދަވެރި މުބާރާތްތަކުގައި ބައިވެރިކޮށްފައެވެ. އަދި އެ މުބާރާތްތަކުން ވަރަށް ފުރިހަމަ ކާމިޔާބީތައްވެސް ހޯދާފައިވާ ކަމަށް އެ ކުލަބުން ބުނެއެވެ.
އެ ކުލަބުގައި މި ވަގުތު 60 ކުދިން ތަމްރީނުވަމުން އަންނައިރު ކުލަބުގެ ކޯޗު މައުރޫފްގެ އުންމީދަކީ ރާއްޖެއާއި އޭޝިއާ ސަރަހައްދީ ލެވެލާއި، ދުނިޔޭގެ ފެންވަރުގެ އެތުލީޓުން ބައިނަލްއަގްވާމީ މުބާރާތްތަކުގައި ރާއްޖެ ތަމްސީލުކުރުމެވެ. މައުރޫފް ސްޕީޑް ސްކޭޓިން ކުލަބުގެ އުންމީދަކީ ބައިނަލްއަގްވާމީ ފެންވަރުގެ 100-200 މީޓަރުގެ އިންލައިން ރޭސިން ރިންގެއް ގާއިމުވެގެންދިއުން ކަމަށް މައުރޫފު ސްޕީޑް ކުލަބުން ބުނެއެވެ.
ފާއިތުވި ދެ އަހަރުތެރޭގައި އެ ކުލަބުން ވަނީ އިންވިޓޭޝަނަލް އޯޕަން ޗެމްޕިއަންޝިޕް އަދި އިންޓާނަލް ކުލަބް ކޮމްޕެޓިޝަންތަކާއި މޯލްޑިވްސް ހާފް މެރަތަން އިވެންޓުތަކުގައިވެސް ސްކޭޓްކޮށް ރަނގަޅު ކާމިޔާބީތަކެއް ހޯދާފައެވެ.