ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ގައުމީ ބީޗް ވޮލީބޯލް ލީގު 2024 ގެ ފިރިހެން ޑިވިޝަނުގެ ކޮލިފިކޭޝަން ބުރުން ތިން ޕެއާއެއް ފައިނަލް ބުރަށް ދަތުރުކޮށްފިއެވެ.
މުބާރާތުގެ ފިރިހެން ޑިވިޝަނުގެ ކޮލިފިކޭޝަން މެޗުތައް ކުރިއަށްދިޔައީ ދެ ގްރޫޕަކަށް ބަހާލައިގެންނެވެ. އެގޮތުން ގްރޫޕް އޭގައި ހަތަރު ޕެއާ އަދި ގްރޫޕް ބީގައި ތިން ޕެއާ ހިމެނެއެވެ.
ހަތަރު ޕެއާ ހިމެނުނު ގްރޫޕް އޭގައި ތިބީ ޖޫނިއާ ޕެއާތަކެވެ. މި ގްރޫޕުން ފައިނަލް ބުރުގެ ޖާގަ ހޯދީ ރާކިން އާއި ޝައިހާންގެ ޕެއާއެވެ. ތިން ޕެއާ ހިމެނޭ ގްރޫޕް ދޭކުން ފައިނަލް ބުރަށް ދެ ޕެއާއެއް ވަނީ ދަތުރުކޮށްފައެވެ. އެއީ އަދުނާން އާއި ޝިމާލް، އަދި ނިހާދު އާއި ޔޫސުފްގެ ޕެއާއެވެ. މި ގްރޫޕުގައި ވާދަކޮށްފައިވަނީ ސީނިއާ ޕެއާތަކެވެ.
ބީޗުވޮލީ ލީގުގެ ފައިނަލް ބުރުގައި ވާދަކުރާނީ މި ތިން ޕެއާއާއެކު ޖުމްލަ ފަސް ޕެއާ އެވެ. ދެން މި ބުރުގައި ވާދަކުރާނީ އެންމެ ފަހުގެ ލީގު ޗެމްޕިއަން އިސްމާޢީލް ސާޖިދު (ކުޑަ ކާއްޓޭ) އާއި އާދަމް ނަސީމް (އެޑަމް) ގެ ޕެއާ އަދި ރަނަރަޕް މުޙައްމަދު އަލީ (ޑެންޒޯ) އާއި އަޙްމަދު މުހައްމަދު (ކޯކޭ) ގެ ޕެއާ އެވެ.
ފައިނަލް ބުރުުގެ މެޗުތައް ކުޅުމަށް ހަމަޖެހިފައިވަނީ އަންގާރަ ދުވަހުއެވެ. ތިން ދުވަހަށް ކުރިއަށްދާ ލީގަށްފަހު ގައުމީ ބީޗުވޮލީ ޗެމްޕިއަންޝިޕުގެ ފިރިހެން ޑިވިޝަނުގެ ކުޅުން ފެށުމަށް ހަމަޖެހިފައިވަނީ އަންނަ ހުކުރު ދުވަހުއެވެ.