ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ސެމީ ފައިނަލަށް ބ. އޭދަފުށި ދަތުރުކޮށްފިއެވެ.
މުބާރާތުގެ ސެމީއަށް އޭދަފުށި ދަތުރުކޮށްފައިވަނީ ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ކުއާޓާ ފައިނަލުގެ ފުރަތަމަ މެޗުގައި ޅ. ނައިފަރު އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެގެންނެވެ.
އެހެން މެޗުތަކާ ހިލާފަށް މި މެޗުގައި އޭދަފުށިން ވަނީ ގައުމީ ޓީމުގެ ތިން ކުޅުންތެރިން ކަމަށްވާ ހަމްޒާ މުޙައްމަދު (ހަމްޕު) އާއި، އަލީ ފާސިރު (ސެންޓޭ) އަދި ހައިޝަމް ހަސަންއަށް ފުރުސަތު ދީފައެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނުން އެ ތިން ކުޅުންތެރިންނަށް އެ ފުރުސަތު ފަހިކޮށްދިނުމުންނެވެ.
މި މެޗުގެ ފުރަތަމަ ހާފުގެ ކުރީކޮޅު އޭދަފުށިން ވަނީ ގާތްގާތުގައި ލަނޑުތަކެއް ކާމިޔާބުކޮށްފައެވެ. އެގޮތުން ފުރަތަމަ ލަނޑަކީ މެޗު ފަށައިގެން ހަތަރުވަނަ މިނެޓުގައި ނައިފަރުގެ އިބްރާހީމް ވިޝާމް އަތުން ބައިކޮޅަށް ވަން ލަނޑެވެ. މިއީ އޭދަފުށީގެ އަޙްމަދު އައިހަމް އޭރިއާ ތެރެއަށް މަތިން ނަގައިދިން ބޯޅައެއް ބޮލުން ޖައްސާލި ފަހުން ބައިކޮޅަށް ވަން ލަނޑެކެވެ.
މި ލަނޑަށްފަހު މެޗުގެ 22 ވަނަ މިނެޓުގައި ސެންޓޭ ވަނީ އެ ޓީމުގެ ދެވަނަ ލަނޑު ކާމިޔާބުކޮށްފައެވެ. މިއީ މުޙައްމަދު ފާސިރު ދިން ބޯޅައަކުން ކީޕަރު ކައިރިން ކަޓުވާލުމަށްފަހު އޭނާ ކާމިޔާބުކުރި ލަނޑެކެވެ. މި ލަނޑު ޖެހިތާ މާގިނައިތަކެއް ނުވަނީސް އޭދަފުއްޓަށް ޕެނަލްޓީއެއް ލިބުނެވެ. އެކަމަކު ސެންޓޭއަށް ކުރި ފައުލާއި ގުޅިގެން ހައިޝަމް ފޮނުވާލި ޕެނަލްޓީ ނައިފަރުގެ ގޯލްކީޕަރު އަބްދުﷲ މުޙައްމަދު ވަނީ ހުއްޓުވާފައެވެ.
މި މެޗުގައި އޭދަފުށިން ކާމިޔާބުކުރި ތިންވަނަ ލަނޑަކީ އޭރިއާ ބޭރުން އައިހަމް ފޮނުވާލި ބޯޅައަކުން ކާމިޔާބުކުރި ލަނޑެކެވެ. އަދި އޭދަފުށީގެ ހަތަރުވަނަ ލަނޑު އިޝާން އިބްރާހިމް (ސައްޓު) ކާމިޔާބުކުރީ މެޗުގެ 65 ވަަނަ މިނިޓުގައެވެ. އޭގެ ފަސް މިނިޓުފަހުން އައިހަމް ނެގި ހުރަހަކުން ސައްޓު ވަނީ އެ ޓީމުގެ ފަސްވަނަ ލަނޑު ކާމިޔާބުކޮށްފައެވެ.
މި ނަތީޖާއާއެކު މުބާރާތުގެ ސެމީ ފައިނަލުގައި އޭދަފުށި ބައްދަލުކުރަން ޖެހޭނީ ކުއާޓާ ފައިނަލުގައި މާލެ ސިޓީ އާއި ކ. ގުރައިދޫ ކުޅެގެން މޮޅުވާ ޓީމަކާއެވެ.