މި ސަރަހައްދުގެ ކުންފުނިތަކަށް ޚާއްޞަކޮށްގެންދޭ ޝަރަފްވެރި ދެ އެވޯޑެއް އެމްޕީއެލަށް

ވިޔަފާރި ކުންފުނިތަކަށް ޚާއްސަކޮށްގެން ދެކުނު އޭޝިއާގެ ސަރަހައްދުގައި ދެމުން އަންނަ އެންމެ ޝަރަފްވެރި އެއް އެވޯޑް ކަމަށްވާ "ސައުތު އޭޝިއަން ބިޒަންސް އެކްސެލެންސް އެވޯޑް 2024" ގެ މުހިންމު ދެ އެވޯޑެއް މޯލްޑިވްސް ޕޯރޓްސް ލިމިޓެޑް، އެމްޕީއެލްއަށް ލިބިއްޖެއެވެ.

އިންޑިއާގެ ނިއުދިއްލީގައި މިމަހުގެ 20 ވަނަ ދުވަހު އޮތް ސައުތު އޭޝިއަން ބިޒްނަސް އެކްސެލެންސް އެވޯޑް ދިނުމުގެ ހަފްލާގައި އެމް.ޕީ.އެލް.އަށް ލިބުނީ "އިނޮވޭޓިވް ލާނިންގ އެންޑް އޮގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެވޯޑާއި "އިނޮވޭޓިވް ބިޒްނަސް ޓްރާންސްފޮމޭޝަން" އެވޯޑެވެ.

"އިނޮވޭޓިވް ބިޒްނަސް ޓްރާންސްފޮމޭޝަން" އެވޯޑަކީ އެމް.ޕީއެލްގެ ތާރީޚުގައި ފުރަތަމަ ފަހަރަށް ލިބުނު އެވޯޑެކެވެ. އެމްޕީއެލަށް މި ދެ އެވޯޑްވެސް ލިބިފައިވަނީ ދެކުނު އޭޝިއާގެ 7 ޤައުމަކަށް ނިސްބަތްވާ ގިނަ ކުންފުނިތަކަކާ ވާދަކޮށްގެންނެވެ.

މިއީ ދެކުނު އޭޝިއާގެ ވާދަވެރިކަން ބޮޑު ވިޔަފާރީގެ މާހައުލެއްގައި ވިޔަފާރި ފުޅާކުރުމާއި، ތަރައްޤީކުރުމާއި، ޒަމާނީކުރުމަށް ކުންފުނިތަކުން ކުރަމުންދާ މަސައްކަތް ފާހަގަކުރުމަށް ދޭ އެވޯޑެކެވެ. މި އެވޯޑު ދެނީ އެކި ދާއިރާތަކުގެ ތަޖުރިބާކާރުން ހިމެނޭ ފަނޑިޔާރުންގެ ޕެނަލަކުން ކުންފުނިތަކުގެ ޕާފޯމަންސް އިވެލުއޭޓް ކުރުމަށްފަހުއެވެ. އެގޮތުން ތަފާތު 17 ދާއިރާއަކުން ވަނީ އެވޯޑް ދީފައެވެ.

އެމްޕީއެލަށް "އިނޮވޭޓިވް ލާނިންގ އެންޑް އޮގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެވޯޑް ލިބިފައިވަނީ މުވައްޒަފުންނަށް ތައުލީމާއި ތަމްރީންތައް ދިނުމަށް ކުރަމުންދާ މަސައްކަތަށެވެ.

މި ދެ އެވޯޑު އެމްޕީއެލަށް ލިބުމަކީ، ލިބުނު ކުރިއެރުމެއްގެގޮތުގައި އެކުންފުނިންވަނީ ސިފަކުރައްވާފައެވެ.