މުލީ އެއަރޕޯޓުގެ މަސައްކަތް ނިންމައި، މާރިޗް 1ގައި ޓެސްޓް ފުލައިޓް ޖައްސަނީ
-
މިހާރު ކުރަމުންދަނީ އެއަރޕޯޓަށް ބޭނުންވާ އެކި ވަޞީލަތްތައް ހޯދުމުގެ މަސައްކަތް
-
މުލީ އެއަރޕޯޓުގެ އަމަލީ މަސައްކަތް ފަށާފައިވަނީ 2021 ވަނަ އަހަރު
މުލަކަތޮޅު މުލީގައި ތަރައްޤީކުރާ އެއަތޮޅުގެ ފުރަތަމަ ވައިގެ ބަނދަރުގެ މަސައްކަތް ނިންމައި މާރިޗު މަހުގެ 1 ވަނަ ދުވަހު ޓެސްޓް ފްލައިޓް ޖެއްސުމަށް އަމާޒު ހިފާފައިވާކަމަށް ރީޖަނަލް އެއަރޕޯޓްސް ކޮންޕެނީ ލިމިޓެޑްގެ މެނޭޖިން ޑިރެކްޓަރ އަޙްމަދު މުބީން ވިދާޅުވެއްޖެއެވެ.
މުލީ އެއަރޕޯޓުގެ ޢަމަލީ މަސައްކަތް ފަށާފައިވަނީ 2021 ވަނަ އަހަރުގެ އޮގަސްޓްމަހުއެވެ. މުޅި މަޝްރޫޢު ނިންމާ ޚިދުމަތް ދޭން ފުރަތަމަ ޕްލޭންކުރީ 2023 ވަނަ އަހަރުގެ މެދުތެރޭގައެވެ. ނަމަވެސް އެކި ސަބަބުތަކާހުރެ މަސައްކަތްތައް ވަނީ ލަސްވެފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި މުލީ އެއަރޕޯޓުގެ މަސައްކަތްތަކާ ގުޅޭގޮތުން ވާހަކަފުޅުދައްކަވަމުން ރީޖަނަލް އެއަރޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރ އަޙްމަދު މުބީން ވިދާޅުވީ އަމާޒަކީ އެއަރޕޯޓުގެ މަސައްކަތް މާރިޗް މަހަށް ނިންމުން ކަމަށެވެ. މުބީން ވިދާޅުވީ މިހާރު ކުރަމުންދަނީ އެއަރޕޯޓު ހުޅުވުމަށް ވާންޖެހޭ ފަހުގެ ތައްޔާރީތަކުގެ މަސައްކަތް ކަމަށެވެ. އެގޮތުން ކުރަމުންދާ ބައެއް މަސައްކަތްތައް އޭނާ ފާހަގަކުރެއްވިއެވެ.
"އެއަރޕޯޓަށް ބޭނުންވާ ވެހިކަލާއި މެޝިނަރީއާއި ވަޞީލަތްތައް ހޯދުމުގެ އިތުރުން އޮފީސް ބައިގެ މަސައްކަތް ނިންމުމާއި އަލިފާން ނިއްވުމަށް މީހުން ނަގައި ތަމްރީންކުރުމުގެ މަސައްކަތް މިހާރު ދަނީ ކުރަމުން" މުބީން ވިދާޅުވިއެވެ.
1200 މީޓަރު ދިގު، 30 މީޓާރު ފުޅާ ރަންވޭއަކާއެކު ތަރައްޤީކޮށްފައިވާ އެއަޕޯޓުގެ މަޝްރޫޢަށް ސަރުކާރުން 221 މިލިޔަން ރުފިޔާ ޚަރަދުކުރެއެވެ.
މުލަކަތޮޅަކީ ރާއްޖޭގައި އެއަރޕޯޓެއް ނެތް މަދު އަތޮޅުތަކުގެ ތެރޭގައި ހިމެނޭ އަތޮޅެކެވެ. އެހެންކަމުން މުލީ އެއަރޕޯޓު ތަރައްޤީކުރުމުގެ މަޝްރޫޢަކީ އެ އަތޮޅުގެ ރައްޔިތުންގެ އުންމީދުތަކާ ވަރަށް ބޮޑަށް ގުޅިފައިވާ މަޝްރޫޢެކެވެ. ދަތުރުފަތުރުކުރުމުގައި ދިމާވި އެތައް ދައްޗަކަށް ހައްލު ހޯދައިދޭނެ މުހިންމު މަޝްރޫޢެކެވެ. އެ އަތޮޅުގައި މީހުން ދިރިއުޅޭ 8 ރަށް އޮންނައިރު، އަތޮޅުގެ އާބާދީ އުޅެނީ 8000 އިން ދަށުގައެވެ.