ފެބުރުއަރީ މަހު ބާއްވަނީ ކައުންސިލްތަކުގެ ހިނގަމުންދާ ދައުރުގެ ފަހު ބައި އިލެކްޝަން!

އަންނަ ފެބުރުއަރީ މަހު ބޭއްވުމަށް ނިންމާފައިވާ، ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި އިލެކްޝަނަކީ، ހިނގަމުންދާ ދައުރުގެ ފަހު ބައިލެކްޝަނަށްވުން އެކަށީގެންވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ދިވެހިރާއްޖޭގެ އިދާރާި ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނާއި، އިންތިޚާބުތަކާ ބެހޭ ޤާނޫނަށް ގެނެސްފައިވާ އިސްލާހުތަކުގެ ދަށުން އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި-އިލެކްޝަންތައް ބާއްވަން ޖެހޭނީ އަހަރަކު އެއްފަހަރުއެވެ. އަދި ލޯކަލް ކައުންސިލްތަކުގެ ބައި-އިލެކްޝަން ބާއްވަން ޖެހެނީ އަހަރަކު ދެފަހަރުއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނާއި ލޯކަލް ކައުންސިލްތަކުގެ އިންތިޚާބުގެ ޤާނޫނަށް ގެނައި އިސްލާހުތަކަށް ޢަމަލުކުރަން ފެށުމަށްފަހު ބާއްވާ ފުރަތަމަ ކައުންސިލްތަކުގެ ބައި-އިލެކްޝަން މިހާރު ވަނީ އިއުލާންކޮށްފައެވެ. އެގޮތުން ފަސް ކައުންސިލެއްގައި ހުސްވެފައިވާ ގޮނޑިތަކަށް މެންބަރުން އިންތިޚާބު ކުރުމަށާއި 28 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މެންބަރުން އިންތިޚާބުކުރުމުގެ ބައި އިލެކްޝަނަށް މިހާރު ވަނީ ހުޅުވާލާފައެވެ.

މި ބައި-އިލެކްޝަންތައް ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ އަންނަ އަހަރުގެ ފެބްރުއަރީ މަހުގެ 8ވަނަ ދުވަހުއެވެ.

އަލަށް އަމަލުކުރަން ފެށި އިޞްލާހުތަކުގައިވާގޮތުން ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރެއްގެ މަޤާމު ހުސްވިއިރު، އެފަރާތްތަކުގެ ދައުރުގައި ބާކީ އޮތީ އެއް އަހަރަށްވުރެ ކުރު މުއްދަތެއްނަމަ، ހުސްވި މަޤާމަށް، އަލުން މެންބަރަކު އިންތިޚާބު ކުރުން ލާޒިމެއް ނޫނެވެ. މި ހާލަތުގައި ބައި-އިލެކްޝަނެއް ބާއްވަން މަޖުބޫރުވާނީ ގޮނޑިތައް ހުސްވުމުގެ ސަބަބުން ކޯރަމް ހަމަނުވާނަމައެވެ. ހަމައެހެންމެ ރަމަޟާން މަހުގެ ތެރޭގައިވެސް އިންތިޚާބެއް ނުބޭއްވޭނެކަމަށް އައު އިޞްލާހުގައިވެއެވެ. އަދި އިންތިޚާބެއް ބާއްވާނަމަ ބާއްވަން ޖެހޭނީ ރަމަޟާން މަސް ނިމި، 10 ދުވަސް ފަހުންނެވެ.

އެހެންކަމުން އަންނަ އަހަރު އިތުރު ބައި-އިލެކްޝަނެއް ބާއްވާނަމަ ތައާވަލު ކުރަންޖެހޭނީ އޭޕްރިލް މަހަށް ނުވަތަ އޭގެ ފަހުންނެވެ. ނަމަވެސް އެ މުއްދަތުގެ ތެރޭގައި ކައުންސިލް އަދި އަންހެނުންގެ ކޮމިޓީތަކުގެ ދައުރުގައި ބާކީ އޮންނާނީ އެއް އަހަރަށްވުރެ ކުރު މުއްދަތެކެވެ. ވުމާއެކު، ކޯރަމް ހަމަނުވެގެން ނޫން ހާލަތެއްގައި ބައި-އިލެކްޝަނެއް ބޭއްވުން ލާޒިމެއް ނޫނެވެ.

ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ހިނގަމުންދާ ދައުރު ހަމަވެ، އިންތިޚާބު އޮންނާނީ 2026ވަނަ އަހަރުގެ އޭޕްރިލް މަހުގައެވެ. މި ސަބަބުތަކާހުރެ އަންނަ އަހަރުގެ ފެބްރުއަރީ މަހުގެ 8ވަނަ ދުވަހު ބާއްވާ ބައި-އިލެކްޝަނަކީ ކައުންސިލްތަކާއި އަންހެނުންގެ ކޮމިޓީތަކުގެ މިދައުރުގެ ފަހު ބައި-އިލެކްޝަނަށްވުން އެކަށީގެންވެއެވެ.

ކައުންސިލްތަކާއި އަންހެނުންގެ ކޮމިޓީތަކުގެ ބައި އިލެކްޝަންތައް ބާއްވާ މުއްދަތުތަކަށް ބަދަލުތައް ގެނައީ އެ ބައި-އިލެކްޝަންތަކަށް ކުރަންޖެހިފައިވާ ޚަރަދުތައް ބޮޑުވެ، އިލެކްޝަންސް ކޮމިޝަނާއި ރައްޔިތުންނަށްވެސް ދަތިތަކާ ކުރިމަތިވާތީއެވެ.