ނޮދާން އަޔަރލެންޑް ބަލިކޮށް ވޭލްސް ޔޫރޯ ފުޓްބޯޅަ މުބާރާތުގެ ކުއަޓަރ ފައިނަލުން ޖާގަ ހޯދައިފިއެވެ. ޔޫރޯ ފުޓްބޯޅަ މުބާރާތުގައި ރޭ ވޭލްސްއާ ނޮދާން އަޔަރލެންޑް ވާދަކުރި މެޗް ވޭލްސް ކާމިޔާބުކުރީ އެއްލަނޑު ސުންލަނޑުންނެވެ.
މެޗްގައި ފެނިގެންދިޔަ ހަމައެކަނި ލަނޑަކީ 75 ވަނަ މިނެޓްގައި ނޮދާން އަޔަރލެންޑްގެ ގެރެތް މެކޫލީ އަތުން ބައިކޮޅަށް ވަތް ލަނޑެކެވެ މިއީ 1958 ވަނަ އަހަރުގެ ވަރލްޑްކަޕަށް ފަހު ވޭލްސް ބޮޑު މުބާރާތެއްގެ ކުއަޓަރ ފައިނަލުން ޖާގަ ހޯދި ފުރަޔަމަ ފަހަރެވެ.
މެޗަށްފަހު ވޭލްސްގެ ކޯޗް ކްރިސް ކޯލްމަން ބުނީ މުބާރާތުގެ މިހާ ހިސާބަށް އާދެވުނީ ކުޅުންތެރިން ކުރި ބުރަ މަސައްކަތުން ކަމަށެވެ. އަދި ކުއަޓަރ ފައިނަލްގައި ކޮންމެ ޓީމާކާ ޖެހުނަސް ފަރުވާލެއް ނެތްކަމަށް ކޯލްމަން ބުންޏެވެ.
ކުއަޓަރފައިނަލްގައި ވޭލްސް ވާދަކުރަން ޖެހޭނީ މިރޭ ބެލްޖިއަމްއާ ހަންގޭރީ ވާދަކުރާ މެޗުން މޮޅުވާ ޓީމަކާއެވެ.