ގޯލްޑްކަޕް ފުޓްބޯޅަ މުބާރާތާއެކު ދިވެހި ފުޓުބޯޅައިގެ ފޯރި އަލުން އައުވެގެން ހިނގައްޖެ ކަމަށާއި މިރޭ ކުޅޭ ގޯލްޑް ކަޕްގެ ފައިނަލް މެޗުގައި ވާދަކުރާ، އައްޑޫ ސިޓީ އަދި އޭދަފުށި ދެ ޓީމަށް ކާމިޔާބީއަށް އެދިވަޑައިގަންނަވާ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިންޓީ ޕްލަސް ގޯލްޑް ކަޕްގެ ފައިނަލްގައި މިރޭ 9:00 ގައި ގަލޮޅުދަނޑުގައި ކުޅުމަށް ހަމަޖެހިފައިވާއިރު މި މެޗުގައި ބައްދަލު ކުރާނީ އައްޑޫ ސިޓީ އާއި އޭދަފުށީ ޓީމެވެ.
ނައިބު ރައީސް މި ދެޓީމަށް ކާމިޔާބީއަށް އެދިވަޑައިގެން ފައިވަނީ ސޯޝަލް މީޑިއާގައި ކުރެއްވި ޕޯސްޓެއްގައެވެ. ނައިބު ރައީސް ވިދާޅުވީ މި މުބާރާތާއެކު ދިވެހި ފުޓުބޯޅައިގެ ފޯރި އަލުން އާވެގެން ހިނގައްޖެ ކަމަށާއި، މުބާރާތް ކުރިއަށްދިޔައިރު، ސަޕޯޓު ކުރުމުގައި އެކި ރަށްރަށުގެ ރައްޔިތުން ދެއްކި ނަމޫނާ އާއި ރަށު ލޯބި ފާހަގަ ކުރައްވާ ކަމަށެވެ.
މިރޭގެ މެޗުގައިވެސް މި ރީތި ނަމޫނާ އާއި ކުޅިވަރުގެ ރޫހާ އެއްގޮތަށް ސަޕޯޓަރުންގެ ޢަމަލުތައް ބަހައްޓާނެ ކަމަށް އުންމީދު ކުރައްވާ ކަމަށް ނައިބު ރައީސް ވިދާޅުވިއެވެ. ނައިބު ރައީސް ވަނީ ސެމީ ފައިނަލްގެ ފަހު މެޗުވެސް ޝަރަފުވެރިކޮށްދެއްވާފައެވެ. ނައިބު ރައީސް އަކީ ފުޓްބޯޅަ އާއި ކުޅިވަރަށް ވަރަށް ބޮޑަށް ލޯބި ކުރައްވާ ބޭފުޅެކެވެ.