އެޗްޑީސީ ބޯޑުގެ ޑިރެކްޓަރުންގެ ސަސްޕެންޝަން ނިމުމަކަށް ގެނެސްފި

ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ ޑިރެކްޓަރުންގެ ބޯޑުގެ ހުރިހާ ޑިރެކްޓަރުންގެ ސަސްޕެންޝަން ނިމުމަކަށް ގެނެސްފިއެވެ.

ބިންވެރިޔާ ސްކީމްގެ ދަށުން، ގޯތި ނުލިބޭ ބަޔަކަށް ގޯތިތަކެއް ދީފައިވާކަމުގެ ތުހުމަތުތަކާއެކު އެޗްޑީސީގެ ޗެއަރމަން ފިޔަވައި ހުރިހާ ޑިރެކްޓަރުން ސަސްޕެންޑުކުރިއެވެ. އޭގެތެރޭގައި އޭރުގެ މެނޭޖިންގ ޑިރެކްޓަރ އިބްރާހީމް ފަޒުލްވެސް ހިމެނެއެވެ. އަދި ފަޒުލް ރަޝީދު ހިމެނޭހެން 20 މީހެއްގެ ޕާސްޕޯޓް ހިފަހައްޓައިފައިވެއެވެ.

އޭގެފަހުން ފަޒުލް ވަނީ މަޤާމުން އިސްތިއުފާދެއްވާފައެވެ.

ބިންވެރިޔާ ސްކީމްގެ ދަށުން، ގޯތި ނުލިބޭ ބަޔަކަށް ގޯތިތަކެއް ދީފައިވާކަމުގެ ތުހުމަތުތަކާއެކު ފުލުހުންނާއި އޭސީސީ ގުޅިގެން އަންނަނީ މައްސަލަ ތަހުގީގްކުރަމުންނެވެ. މި މައްސަލާގެ ތުހުމަތުގައި ފަޒުލް ދިރިއުޅޭ ގެ ބަލައި ފާސްކޮށް އެގެއިން ބައެއް ތަކެތި ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މި މައްސަލާގެ ތުހުމަތުގައި އެޗްޑީސީގެ ބައެއް މުވައްޒަފުންވެސް ވަނީ ވަޒީފާއިން ވަކިކޮށްފައެވެ.