އިމާމުން ތަމްރީނުކުރުމުގެ ޕްރޮގްރާމު ފުޅާކޮށް، އިތުރު ޤައުމުތަކުން ފުރުޞަތު ފަހިކޮށްދެނީ

އިމާމުން ތަމްރީންކުރުމަށް ކުރާ މަސައްކަތުގެ ދަށުން އަންނަ އަހަރު ރާއްޖެއިން ބޭރުގެ އިތުރު ޤައުމުތަކަށް ތަމްރީނުވުމަށް ފޮނުވުމަށް މަސައްކަތް ކުރަމުން އަންނަކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ރާއްޖޭގެ ހުރިހާ އިމާމުންނާއި ޚަތީބުން ތަމްރީންކުރުމަށް ހިންގި ޤާއުމީ މަޝްރޫޢު 2024 ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ އިމާމުން ތަމްރީނުކުރުމަށްޓަކައި ކުރައްވާ މަސައްކަތުގެ ދަށުން މިއަހަރު ރާއްޖެއިން ބޭރަށް އިމާމުން ފޮނުއްވިކަން ފާހަގަކުރައްވާފައެވެ. އަދި އަންނަ އަހަރުވެސް އެފަދަ ތަޖުރިބާ ދަތުރުގެ ފުރުޞަތުތައް ފަހިކޮށްދިނުމަށް ނިންމާފައިވާކަމަށާއި، މިގޮތުން އަންނަ އަހަރު އިތުރު ބައެއް ޤައުމުތަކަށް ފޮނުވުމަށް ނިންމަވާފައިވާކަމަށް ވަޒީރު ވިދާޅުވިއެވެ. އޭގެތެރޭގައި އުރުދުން، ޤަތަރު، ކުވައިތު، ބަހްރައިން، ސަޢުދީޢަރަބިއްޔާ، މެލޭޝިޔާ، އަދި އެހެން ބައެއް ޤައުމުތަކަށްވެސް އިމާމުން ފޮނުވުމަށް މަސައްކަތްކުރައްވަމުން ގެންދަވާކަމަށް ވަޒީރު ވިދާޅުވިއެވެ.

"މިފަދަ ދަތުރުތަކަކީ ކްލާސްރޫމެއްއެއްގައި ކިޔަވަން ލިބޭ މަޢުލޫމާތަށްވުރެ، އެހެން މީހުންގެ ތަޖުރިބާއާއި ކަންތައްތައް ކުރާ ގޮތް ލިބިގަތުމަށް ލިބޭ ފުރުޞަތެއް. ކްލާސްރޫމުން ނުލިބޭ މައުލޫމާތާއި ޢިލްމު މިފަދަ ދަތުރުތަކުގައި އެބަލިބޭ." އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާާޅުވިއެވެ.

އިމާމުން ތަމްރީނުކުރުމުގެ ޕްރޮގްރާމް ކުރިއަށް އޮތް އަހަރުތަކުގައިވެސް ޤައުމީ ޕްރޮގްރާމެއްގެ ގޮތުގައި ކުރިއަށް ގެންދަވާނެކަމަށްވެސް ވަޒީރު ވިދާޅުވިއެވެ. އަދި މިއަހަރ ހިންގި ޕްރޮގްރާމުގެ އަލީގައި ރަނގަޅު ކުރަންޖެހޭ ކަންކަން ރަނގަޅު ކުރައްވާނެކަމަށާއި، އަންނަ އަހަރު އިތުރު މާއްދާތަކެއްވެސް މި ޕްރޮގްރާމްގައި ހިމަނުއްވާނެކަމަށް ވަޒީރު ވިދާޅުވިއެވެ.

އިމާމުން ތަމްރީން ކުރުމުގެ ޕްރޮގްރާމަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން މުޅި ރާއްޖޭގެ ދާއިމީ އިމާމުންނަށާއި ޚަޠީބުންނަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ކުރިއަށް ގެންގޮސްފައިވަނީ 9 މާއްދާއެއް ހިމަނައިގެންނެވެ.

އުތުރާއި ދެކުނުން އަދި މެދުރާއްޖޭތެރޭގެ ހުރިހާ ރަށަކަށް މިޕްރޮގުރާމް ކުރިއަށްގެންގޮސްފައިވާއިރު، 818 ބައިވެރިން މި ޕްރޮގްރާމް ފުރިހަމަކޮށްފައިވެއެވެ.

އިމާމުންގެ ފެންވަރު ރަނގަޅުކޮށް، ފުރުޞަތުތައް ފަހިކޮށްދެއްވުމަކީ ސަރުކާރުން އިސްކަންދެއްވާކަމެކެވެ. މިއަހަރު ރާއްޖޭގެ ހުރިހާ އިމާމުން ތާޒަކޮށް ނިމިފައިވާއިރު 100 އަށް ވުރެ ގިނަ ތަމްރީނު ފުރުޞަތު ރާއްޖެއިން ބޭރުން އިމާމުންނަށް ހޯދާދީފައިވެއެވެ. މީގެ އިތުރުން ބޮޑެތި މިސްކިތްތަކަށް 2 އިމާމުން އައްޔަންކުރުމާއި، އިމާމުންގެ މަހާސިންތާ އެއް ބާއްވަން ފެށުމާއި، އިމާމުންނަށް ޢަރަބި ބަސް ކިޔަވައިދިނުމުގެ ޕްރޮގްރާމްތައްވެސް އިސްލާމީ ކަންތައްތަކާބެހޭ ވުޒާރާއިން މިއަހަރު ވަނީ ހިންގަވާފައެވެ.