އިނގިރޭސި ޗެމްޕިއަންޝިޕުގެ ކުލަބު ވެސްޓް ބްރޮމްގެ ކޯޗު ކާލޯސް ކޯބެރަން ހޯދުމަށް ސްޕެއިންގެ ވެލެންސިއާއިން މަސައްކަތް ފަށައިފިއެވެ.
ވެލެންސިއާ އިން އައު ކޯޗެއް ހޯދުމުގެ މަސައްކަތް ފަށާފައިވަނީ އެ ޓީމަށް ކޯޗުކޮށްދެމުން އައި ރުބެން ބަރާހާ މަގާމުން ވަކިކުރުމަށްފަހުގަ އެވެ. މި ސީޒަނުގައި މިހާތަނަށް ވެލެންސިއާ އިން ލީގުގައި 17 މެޗު ކުޅެފައިވާއިރު އެ ޓީމު އޮތީ 12 ޕޮއިންޓާއެކު ރެލިގޭޝަނުގެ ޒޯނުގައި 19 ވަނައިގަ އެވެ.
އުމުރުން 41 އަހަރުގެ ކޯބެރަން ހޯދުމަށް ވެސްޓްބްރޮމް އާއި ވެލެންސިއާ އާއި ދެމެދު މަޝްވަރާތައް ކުރިއަށްދާއިރު ދެ ފަރާތުންވެސް މި ކަމާއި ގުޅޭ ގޮތުން ރަސްމީކޮށް އަދި އެއްޗެއް ބުނެފައެއް ނުވެއެވެ. ނަމަވެސް މީޑިޔާ ރިޕޯޓްތައް ބުނާ ގޮތުގައި ކޯބެރަން އާއިއެކު އެ ކްލަބުން ހަދާފައިވާ އެއްބަސްވުން އުވާލުމަށް ދައްކަން ޖެހޭ ތިނެއް ނުވަތަ ހަތަރު މިލިއަން ޕައުންޑުގެ ފީ ދެއްކުމަށް ވެލެންސިއާއިން ވަނީ އެއްބަސްވެފަ އެވެ.
ވެސްޓްބްރޮމް އިން ކޯބެރަން އެ މަގާމަށް އައްޔަން ކޮށްފައިވަނީ 2022 ވަނަ އަހަރު އެވެ. އޭނާގެ ފުރަތަމަ ސީޒަނުގައި އެ ކްލަބަށް ނުވަވަނަ މަގާމް ހޯދަދީފައިވާއިރު އޭނާ ވަނީ ދެވަނަ ސީޒަނުގައި ފަސްވަނަ ހޯދަދީފަ އެވެ. އަދި ޕްރިމިއާ ލީގުގެ ޕްލޭއޮފްގެ ސެމީ ފައިނަލުން އެ ކްލަބް ބަލިވެފައިވަނީ ސައުތެމްޓަން އަތުންނެވެ.
ސްޕެއިންގެ ވެލެންސިއާއަށް އުފަން ކޯބެރަންގެ އެހީތެރިކަން ހޯދުމަށް އެ ކްލަބުން މަސައްކަތް ކުރަމުންދާއިރު ވެލެންސިއާ އޮތީ ލަލީގާގެ ރެލިގޭޝަނުގެ ބިރާއި ކުރިމަތިލާ ހިސާބުގަ އެވެ. އަދި އަންނަ ޖެނުއަރީ މަހުގެ 3 ވަނަ ދުވަހު ރެއާލް މެޑްރިޑް އަތުން ބަލިވެއްޖެނަމަ އެ ޓީމަށް އިތުރު މައްސަލަތަކާއި ކުރިމަތިލާން ޖެހޭނެ އެވެ.