މިހާތަނަށް 5،000 ބިދޭސީން ޤައުމަށް ފޮނުވާލެވިއްޖެ، އަމާޒަކީ މިއަދަދު ދެގުނަ ކުރުން: ޝަމްޢާން

އަހަރުގެ މިހާތަނަށް 5،000 އަށްވުރެ ގިނަ ބިދޭސީން އަނބުރާ ޤައުމަށް ފޮނުވާލެވިފައިވާ ކަމަށާއި އަމާޒަކީ އަންނަ އަހަރު މިއަދަދު ދެގުނަ ކުރުންކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވެއްޖެއެވެ.

ޝަމްޢާން މިހެން ވިދާޅުވީ ލޯކަލް މާރުކޭޓު ސަރަހައްދުގައި ކުރިއަށް ގެންދިޔަ ރެއިޑު އޮޕްރޭޝަނަށް ފަހު ޕީއެސްއެމްނިއުސްއަށް މައުލޫމާތު ދެއްވަމުންނެއެވެ.

ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވީ "އިމިޤްރޭޝަން ވޮޗް" އަށް ބިދޭސީންނާއި ގުޅޭ ގިނަ ޝަކުވާތަކެއް ލިބިފައިވާކަމަށެވެ. އެ ޝަކުވާތަކަށް ބަލާ ފާހަގަކުރެވޭ ސަރަހައްދުތައް ބަލާ ފާސްކުރުމުގެ މަސައްކަތް ކުރަމުންދާކަމަށް ޝަމްޢާން ވިދާޅުވިއެވެ.

ޝަމްޢާން ވިދާޅުވީ ލޯކަލް މާރުކޭޓު ސަރަހައްދަކީ ގިނަ ބިދޭސީންތަކެއް ހަރަކާތްތެރިވާ ސަރަހައްދަކަށްވާއިރު މި ސަރަހައްދަށް އަމާޒުކޮށްގެން ކުރިއަށް ގެންދާ މި ރެއިޑު އޮޕްރޭޝަންތަކަކީވެސް އިމިޤްރޭޝަން ވޮޗް އަށް ލިބިފައިވާ މައުލޫމާތުތަކާއި ގުޅިގެން ކުރިއަށް ގެންދާ އޮޕްރޭޝަންތަކެއްކަމަށެވެ.

ޝަމްޢާން ވިދާޅުވީ ޤަވާއިދާ ހިލާފަށް އުޅޭ 5،000 ބިދޭސީން މިއަހަރު އަނބުރާ ޤައުމަށް ފޮނުވާލާފައުވާއިރު އަމާޒަކީ އަންނަ އަހަރު މިއަދަދު ދެގުނަ ކުރުންކަމަށް ޝަމްޢާން ވިދާޅުވިއެވެ.

"މަސައްކަތްތައް ފެށުނު އިރު ކޮންމެވެސް ވަރަކަށް ސްލޯ ކަމެއް ހުރިނަމަވެސް ފަހުން ބޭނުންވާ ސްޕީޑްގައި މަސައްކަތްތައް ކުރިއަތް ގެންދެވުނު، އަންނަ އަހަރު މިއަށް ވުރެއްވެސް ބޮޑަށް މަސައްކަތްތައް ކުރިއަށް ގެންދެވޭނެ އަވަސްވެސް ކުރެވޭނެ" ޝަމްޢާން ވިދާޅުވިއެވެ.

ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވީ މީހުން ފުރުވާލުމުގެ މަސައްކަތާއި ރެއިޑު އޮޕްރޭޝަންތައް އަވަސް ކުރަނީ ބިދޭސީންގެ މައްސަލައަށް އަވަސް ހައްލުތަކެއް ހޯދުމަށް ކަމަށެވެ.

ޝަމްޢާން ވިދާޅުވީ އިމިޤްރޭޝަންގެ މަސައްކަތްތައް ފުޅާކުރުމުގެގޮތުން އަންނަ އަހަރު އަތޮޅު ތެރެއަށް ޒިޔާރަތްކޮށް ޤަވައިދާ ހިލާފަތް އުޅޭ ބިދޭސީން ދެނެގަތުމުގެ މަސައްކަތް ކުރާނެކަމަށެވެ.

ލޯކަލް މާރުކޭޓު ސަރަހައްދުގައި ކުރިއަށް ގެންދިޔަ ރެއިޑު އޮޕަރޭޝަނުގައި ހާބަރުގައި ހުރި ދޯނި ފަހަރުތަކާއި މާރުކޭޓު ގޮޅިތަކުގައި ތިބި ބިދޭސީންގެ މައުލޫމާތުތައް ވަނީ ނަގާފައެވެ. އަދި ޤަވާއިދާ ހިލާފަށް އުޅެމުން ދިޔަ ގިނަ އަދަދެއްގެ ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.