ހަޒާޑްގެ މޮޅު ކުޅުމާއެކު ހަންގޭރީ ބަލިކޮށް ޔޫރޯ ފުޓްބޯޅަ މުބާރާތުގެ ކުއާޓަރ ފައިނަލުން ބެލްޖިއަމް ޖާގަ ހޯދައިފިއެވެ. ދެވަނަ ބުރުގެ މެޗް ހަންގޭރީއާ ވާދަކޮށް ބެލްޖިއަމް ކާމިޔާބުކުރީ ހަތަރު ލަނޑު ސުންލަނޑުންނެވެ. މިއީ މިފަހަރުގެ ޔޫރޯގައި އެއް ޓީމަކުން ހަތަރު ގޯލް ޖެހި ފުރަތަމަ މެޗެވެ.
މެޗްގެ ފުރަތަމަ ހާފް ނިމުނީ އެއްލަނޑު ސުންލަނޑުންނެވެ. ފުރަތަމަ ހާފްގައި ބެލްޖިއަމްގެ ލަނޑު ކާމިޔާބުކޮށްދިނީ ޓޮބީ އަލްޑަރވީލްޑެވެ. މެޗްގެ ދެވަނަ ހާފްގައި ބެލްޖިއަމްގެ އަނެއް ތިންލަނޑު ކާމިޔާބުކޮށްދިނީ ބަޓްޝުއާއީ، ޔަނިކް ކަރަސްކޯ އަދި އެޑިން ހަޒާޑެވެ. މެޗްގެ މޮޅު ކުޅުންތެރިއަކަށް ހޮވުނީވެސް ހަޒާޑެވެ.
ކުއާޓަރ ފައިނަލްގައި ބެލްޖިއަމް ވާދަކުރަން ޖެހޭނީ ވޭލްސްއާއެވެ. މިމެޗް ކުޅޭނީ އަންނަ ހުކުރު ދުވަހުގެ ރޭ ދަންވަރު ބާރަ ޖަހާއިރުއެވެ. ބެލްޖިއަމްއާ ވޭލްސްގެ އިތުރުން ކުއާޓަރ ފައިނަލްގެ ޖާގަ ޔަޤީންކޮށްފައިވާ އަނެއް ހަތަރު ޤައުމަކީ ޕޯޗްގަލް، ޕޮލަންޑް، ޖަރމަނީ އަދި ފްރާންސެވެ.
ކުއާޓަރ ފައިނަލްގެ ފަހު ދެ ޖާގަ ޔަޤީންވާނީ އިންގްލެންޑާ އައިސްލެންޑް އަދި އިޓަލިއާ ސްޕެއިން ވާދަކުރާ މެޗަށްފަހުއެވެ.