ހޭލުންތެރި، ތަހުޒީބު ބަޔަކަށް ދިވެހިން ހެދުމަށް ދިވެހިރާއްޖޭގެ އަޑުގެ ދައުރު ބޮޑު: ވަޒީރު އާދަމް ނަޞީރު

ހޭލުންތެރި، ތަހުޒީބު ބަޔަކަށް ދިވެހިން ހެދުމުގައި ދިވެހިރާއްޖޭގެ އަޑުން މުހިންމު ދައުރެއް އަދާކުރައްވާފައިވާކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.

ވަޒީރު މިހެން ވިދާޅުވީ، ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި އަޑުން ގެނެސްދިން ޕްރޮގުރާމެއްގައި ވާހަކަފުޅުދައްކަވަމުންނެވެ.

ދިވެހިރާއްޖޭގެ އަޑުގެ އަހަރީ ދުވަހާއި ގުޅިގެން ގެނެސްދިން ޕްރޮގުރާމްގައި ވާހަކަފުޅުދައްކަވަމުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވީ، ދިވެހިރާއްޖޭގެ އަޑުގެ ޚިދުމަތް އެންމެ ބޮޑަށް ފާހަގަކުރެވެނީ މީހުން ބިނާކުރުމާއި ހޭލުންތެރިކުރުމުގެ ދާއިރާއިން ކަމަށެވެ.

އެގޮތުން 1962 ވަނަ އަހަރު ފެށި ދިވެހިރާއްޖޭގެ ޤައުމީ ރޭޑިއޯ ވަނީ ޒަމާނީ ދުނިޔެއަކަށް ދިވެހިން ހޭލުންތެރިކޮށް، ތަހުޒީބު ބަޔަކަށް ހެދުމުގައި މުހިންމު ބޮޑު ދައުރެއް އަދާކޮށްފައިކަމަށް ވަޒީރު އާދަމް ނަޞީރު ވިދާޅުވިއެވެ.

ވަޒީރު ވިދާޅުވީ ދިވެހިބަހާބެހޭ ވުޒާރާގެ މަސައްކަތްތަކުގެ ތެރޭގައި ހިމެނޭ ދިވެހިބަހާއި ސަގާފަތާއި ތަރިކައާއި އާދަކާދައާ ގުޅޭގޮތުން ހޭލުންތެރިކުރުމާއި މަޢުލޫމާތު ފޯރުކޮށްދިނުމުގައި ދިވެހިރާއްޖޭގެ އަޑުން ބޮޑު އެހީތެރިކަމެއް ލިބޭ ކަމަށެވެ.

"ޚަބަރާއި މަޢުލޫމާތު ފޯރުކޮށްދިނުމުގައިވެސް ދިވެހިރާއްޖޭގެ އަޑުން ވަނީ މުހިންމު ދައުރެއް އަދާކޮށްފައި. ދިވެހިންގެ މުނިފޫހިފިލުވުމަށް ރޭޑިއޯ ޑްރާމާއާއި ތަމްސީލުތަކާއި ވާހަކަތައް ރޭޑިއޯއިން ގެނެސްދޭ. އަދި ވުޒާރާގެ ބައެއް މަސްއޫލިއްޔަތުތަކަށް (ޤައުމިއްޔަތާ ގުޅުންހުރި ދާއިރާތަކުން ހޭލުންތެރިކުރުމަށް) ރޭޑިއޯއިން އެހީވެދޭ." ވަޒީރު ވިދާޅުވިއެވެ.

ރޭޑިއޯގެ ޚިދުމަތް ރާއްޖޭގައި ފެށީ 1962 ވަނަ އަހަރުގެ ޑިސެންބަރު މަހުގެ 29 ވަނަ ދުވަހުއެވެ. މި ޚިދުމަތް ދެމުންގެންދާތާ މިހާރު މިވަނީ 62 އަހަރު ފުރިފައެވެ. ރޭޑިއޯގެ ޚިދުމަތް ވަނީ ދިވެހިން ހޭލުންތެރިކުރުމާއި މުނިފޫހިފިލުވައިދިނުމުގައި މުހިންމު ދައުރެއް އަދާކޮށްފައެވެ.