2024: އިޖުތިމާޢީ ޢާއިލީ ތަރައްޤީއާ ބެހޭ ވުޒާރާއިން ރައްޔިތުންނާ ގާތުން މަސައްކަތްކުރި އަހަރެއް

އިޖުތިމާޢީ ރައްކާތެރިކަން ރާއްޖޭގެ ހުރިހާ ސަރަޙައްދެއްގައި ދިރިއުޅެމުންދާ މީހުންނަށް ފޯރުކޮށްދިނުމަށް 2024 ވަނަ އަހަރު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިންވަނީ މުހިންމު ގިނަ މަސައްކަތްތަކެއް ކުރައްވާފައެވެ.

އެގޮތުން ރާއްޖޭގެ ހުރިހާ ސަރަޙައްދަކަށް ހުޅުވާލައިގެން ރައްޔިތުންގެ ބޭނުންތައް ދެނެގަތުމަށް "ހާލު ކިހިނެތް" ޕްރޮގްރާމް ފައްޓަވާ، 8000 އަށްވުރެ ގިނަ ގޭބިސީއަށް ޒިޔާރަތްކޮށް ހާލު ބަލާފައިވެއެވެ.

މީގެ ދަށުން ރައްޔިތުންނަށް ބޭނުންވެފައިވާ މުހިންމު ކަންކަން ދެނެގަނެވި އެކަންކަމަށް ވުޒާރާގެ އިސްނެންގެވުމަށް އެކި އިދާރާތަކާއި ގުޅިގެން އެހީތެރިކަން ފޯރުކޮށްދިނުމުގެ މަސައްކަތްވަނީ ކުރައްވާފައެވެ.

ދައުލަތުގެ ބެލުމުގެ ދަށުގައި ތިބޭ ކުދިންނަކީ ޢާއިލާތަކުގެ ލޯތްބާއި އޯގާތެރިކަން ލިބިގެން ބޮޑުވާ ކުދިންނަށް ހެދުމަށްޓަކައި ސަރުކާރުން ކަނޑައަޅުއްވާފައިވާ "ކޮންމެ ކުއްޖަކަށް ޢާއިލާއެއް" ސިޔާސަތުގެ ދަށުން، 54 ކުއްޖަކުވަނީ 2024 ވަނަ އަހަރު ޢާއިލާތަކާއި ޙަވާލުކޮށްފައެވެ. އަދި މިފަދަ ކުދިން ބަލަހައްޓަމުންދާ ޢާއިލާތަކަށް 5000 ރުފިޔާގެ އެލަވަންސެއް ދިނުމަށްވެސް މިއަހަރުވަނީ ނިންމަވާފައެވެ.

މުޖުތަމަޢުގައި ތިބި ނުކުޅެދުންތެރިކަން ހުންނަ މީހުންނަށް އެހީތެރިކަން ފޯރުކޮށްދިނުމަށް، އެފަދަ ފަރާތްތަކަށް އަދާކުރެވޭނެ ވަޒީފާތައް ދެނެގަނެ އެފަދަ ވަޒީފާ ހޯދައިދިނުމުގެ މަސައްކަތް 2024 ވަނަ އަހަރުވަނީ ކުރައްވާފައެވެ.

އެގޮތުން މިކަމަށްޓަކައި އެކުލަވާލާފައިވާ ދަފްތަރުގައި މިދިޔަ އަހަރު 155 މީހުންވަނީ ދަފްތަރުކޮށްފައެވެ. މިގޮތުން ފަންކްޝަނަލް އެސެސްމަންޓު 52 މީހަކުވަނީ ހަދާފައެވެ. އަދި ވަޒީފާއަށް ތައްޔާރުކުރުމަށް ކުރިއަށްގެންދިޔަ ޕްރޮގްރާމްގައި 12 މީހަކުވަނީ ބައިވެރިވެފައެވެ. މީގެތެރެއިން 7 ފަރާތަކަށް އެކަށޭނެ ވަޒީފާވަނީ ފޯރުކޮށްދީފައެވެ. އަދި 9 މީހަކަށް އިންޓަރންޝިޕްގެ ފުރުސަތުވަނީ ފަހިކޮށްދީފައެވެ. އަދި އިތުރު ތަމްރީން ފޯރުކޮށްދިނުމަށް ހިންގި ކޯހުގައި 20 ފަރާތަކުންވަނީ ބައިވެރިވެފައެވެ.

މީގެއިތުރުން 2024 ވަނަ އަހަރުވަނީ އަންހެނުންގެ ސިއްޙީ ދުޅަހެޔޮކަން ކަށަވަރުކުރުމަށް އެންޑޯމެޓްރިއޯސިސް، ޕީސީއޯއެސް އަދި އިންފަރޓިލިޓީގެ ފަރުވާ އާސަންދަ މެދުވެރިކޮށް ލިބޭނެ އިންތިޒާމު ހަމަޖައްސަވާފައެވެ. ހަމައެއާއެކު އައިވީއެފްގެ ޚިދުމަތްވެސް އާސަންދަ މެދުވެރިކޮށްލިބޭނެ އިންތިޒާމު ވަނީ ހަމަޖައްސަވާފައެވެ.

މުޖުތަމަޢުގައި ތިބި ޢުމުރުން ދުވަސްވީ މީހުންނަށް އަޅާލާ، އެމީހުންނަށްވެސް މުޖުތަމަޢުގެ ކަންކަމުގައި ބައިވެރިވުމުގެ ފުރުސަތު ފަހިކޮށްދިނުމަށް، އިސްރަށްވެހީންގެ ނާދީގެ ނަމުގައި މާލެއާއި ހުޅުމާލޭގައިވަނީ ޤާއިމުކޮށްފައެވެ. އަދި މިފަދަ ތަންތަން އަތޮޅުތެރޭގައި ޤާއިމުކުރުމުގެ މަސައްކަތްވެސްވަނީ 2024 ވަނަ އަހަރު ފަށާފައެވެ.

އެހެންކަމުން މިވީ 2024 ވަނަ އަހަރަކީ އިޖުތިމާޢީ ރައްކާތެރިކަން ކަށަވަރުކުރުމަށް މުހިންމު މަސައްކަތްތަކެއް ކުރެވުނު އަހަރެއްކަން ފާހަގަކޮށްލެވެއެވެ.