އަލަށް ހަދާ އެއަރޕޯޓްތަކުގެ ކޮންސެޕްޓްތައް ތައްޔާރުކޮށް ބައެއް އިންވެސްޓަރުންވެސް ހޯދައިފިން: މުބީން

އަލަށް ތަރައްޤީކުރުމަށް ނިންމާފައިވާ އެއަރޕޯޓްތަކުގެ ކޮންސެޕްޓްތައް ތައްޔާރުކޮށް، ބައެއް އިންވެސްޓަރުންވެސް ހޯދާފައިވާކަމަށް ރީޖަނަލް އެއަރޕޯޓްސްއިން ވިދާޅުވެއްޖެއެވެ.

ސަރުކާރުން ވަނީ އިތުރު 20 އެއަރޕޯޓެއް ހެދުމަށް ނިންމާފައެވެ. މީގެ ތެރޭގައި މިހާރު މަސައްކަތް ކުރިއަށްދާ އެއަރޕޯޓްތައްވެސް ހިމެނެއެވެ. އަދި ރައީސުލްޖުމްހޫރިއްޔާ އަތޮޅުތަކުގެ އެކި ރަށްތަކަށް ކުރައްވާ ދަތުރުފުޅުތަކުގައިވެސް ބައެއް ރަށްރަށުގައި އެއަރޕޯޓްތައް އަޅުއްވާނެކަމަށް ވަނީ ވިދާޅުވެފައެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ރީޖަނަލް އެއަރޕޯޓްސްގެ މެނޭޖިން ޑިރެކްޓަރ އަޙްމަދު މުބީން ވިދާޅުވީ މިހާރު ހަދަމުންދާ އެއަރޕޯޓްތަކުގެ މަސައްކަތް ކުރިއަށްގެންދިޔުމަށާއި އެއަރޕޯޓްތަކުގައި ހުރި ބައެއް މަސައްކަތްތައް ކުރިއަށްގެންދިޔުމަށް ފައިނޭންސް ހޯދުމުގެ މަސައްކަތް ކުރިއަށްދާކަމަށެވެ.

އަލަށް ތަރައްޤީކުރުމަށް ހަމަޖެހިފައިވާ އެއަރޕޯޓްތަކުގެ ކޮންސެޕްޓްތައްވެސް ތައްޔާރުކޮށްފައިވާކަމަށާއި، އޭގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ އއ. މަތިވެރި އެއަރޕޯޓުގެ ކޮންސެޕްޓްވެސް ހިމެނޭކަމަށް މުބީން ވިދާޅުވިއެވެ.

މުބީން ވިދާޅުވީ މަސައްކަތް ނުފެށި ހުރި ގިނަ އެއަރޕޯޓްތަކަށް އިންވެސްޓަރުންވެސް ހޯދާފައިވާކަމަށެވެ. އޭގެ ލިޔެކިޔުންތައް އިކޮނޮމިކް ކައުންސިލަށް ފޮނުވުމަށް ތައްޔާރުކޮށްފައިވާކަމަށްވެސް އޭނާ ވިދާޅުވިއެވެ.

"ސަރުކާރުން ދެން ނިންމަވާނީ އެއަޕޯޓްގެ މަސައްކަތް ކޮން ދިމާލަކަށްކަމަށް، ނުވަތަ ކޮން ބަޔަކާކަން ހަވާލުކުރާނީ. ކުރެހުންތައް ތައްޔާރުކޮށް، އެއިން ކޮންމެ ތަނަކަށް ޚަަރަދުވާނެވަރު ބަލަމުން ދަނީ." ރީޖަނަލް އެއަރޕޯޓްސްގެ މެނޭޖިން ޑިރެކްޓަރ އަޙްމަދު މުބީން ވިދާޅުވިއެވެ.

މުބީން ވިދާޅުވީ އެއަރޕޯޓްތައް ހިންގާ ރަށްތަކުގައި ވިޔަފާރިގެ ހަރަކާތްތައް ކުރިއަށްގެންދެވޭނެ ގޮތްތައްވެސް ބަލަމުންދާ ކަމަށެވެ. އެގޮތުން ކައުންސިލްތަކާ ގުޅިގެން އެ މަސައްކަތްތައް ކުރަމުންއަންނަކަމަށާއި އެކަމަށްޓަކައި މާސްޓަރ ޕްލޭން އެކުލަވާލުމަށް ނިންމަވާފައިވާކަމަށް މުބީން ވިދާޅުވިއެވެ.

ރާއްޖޭގައި މިވަގުތު ހިންގަމުން އަންނަނީ 19 އެއަރޕޯޓެވެ. އެއީ 5 އިންޓަރނޭޝަނަލް އެއަރޕޯޓާއި، 14 ޑޮމެސްޓިކް އެއަރޕޯޓެވެ. މީގެ އިތުރުން މިވަގުތުވެސް 4 ޑޮމެސްޓިކް އެއަރޕޯޓެއްގެ މަސައްކަތް އަންނަނީ ކުރަމުންނެވެ. އެއީ މ. މުލީ އެއަރޕޯޓާއި ފ. މަގޫދޫ އެއަރޕޯޓްގެ އިތުރުން ރ. އަލިފުށްޓާއި ހދ.މަކުނުދޫ އެއަރޕޯޓްގެ މަސައްކަތެވެ. މި އެއަރޕޯޓްތަކުގެ ތެރެއިން މުލީ އެއަރޕޯޓްގެ މަސައްކަތް ނިންމާ މާރިޗުމަހު ޓެސްޓް ފްލައިޓް ޖެއްސުމަށް އަންނަނީ ތައްޔާރުވަމުންނެވެ.