ދީނީ ހަމަޖެހުން ދެމެހެއްޓުމަށްޓަކައި މިއަހަރުގެ ތެރޭގައި މުހިއްމު ޢިލްމީ ދިރާސަތަކެއް ކުރަނީ
-
މައިގަނޑު 4 ދިރާސާއެއް ކުރުމަށް އަމާޒު ހިފާފައިވޭ
-
ދީނީ ޝިއާރު ފުޅާކުރުމަށްޓަކައި މުހިއްމު މަސައްކަތްތަކެއް ކުރުމަށް ނިންމާފައިވޭ
ރާއްޖޭގައި ދީނީ ހަމަޖެހުން ދެމެހެއްޓުމަށްޓަކައި މިއަހަރުގެ ތެރޭގައި މުހިއްމު ޢިލްމީ ދިރާސަތަކެއް ކުރުމަށް އިސްލާމީ ކަންތައްތަކާ ބެހޭ ވުޒާރާއިން ނިންމަވައިފިއެވެ.
އިސްލާމީ ކަންތައްތަކާ ބެހޭ ވުޒާރާއިން މިއަހަރަށް ކުރުމަށް ނިންމާފައިވާ ކަންކަން ހިމެނޭ އެކްޝަން ޕްލޭންގައި ވާގޮތުން މި ޢިލްމީ ދިރާސާތައް ކުރުމަށް ހަމަޖެހިފައިވަނީ ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމީ ޔުނިވަރސިޓީއާ ގުޅިގެންނެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ ރާއްޖެގައި ދީނީ ހަމަޖެހުން ދެމެހެއްޓުމަށްޓަކައި މިއަހަރުގެ ތެރޭގައި މައިގަނޑު 4 ދިރާސާއެއް ކުރުމަށް އަމާޒު ހިފާފައިވާކަމަށެވެ. އެގޮތުން ޤައުމީ މަންހަޖާއި މުގައްރަރުތަކުގައި އިސްލާމީ އަޚުލާޤުގެ ބައި ހިމެނިފައިވާ މިންވަރު ދެނަގަތުމަށްޓަކައި ދިރާސާއެއް ކުރުމަށް ނިންމާފައިވެއެވެ.
ދީނީ ހޭލުންތެރިކަން އިތުރުކުރުމަށްޓަކައި މުޖުތަމަޢުގައި ހިންގޭ ޕްރޮގްރާމްތަކުގައި އުނިކަމެއް ހުރިތޯ ބެލުމަށް ދިރާސާ ކުރުމަށާއި އެފަދަ ޕްރޮގްރާމްތަކުން އަސަރުވެރިކަން ހުރި މިންވަރު ދެނެގަތުމަށްޓަކައިވެސް ދިރަސާއެއް ކުރުމަށް ވަނީ އަމާޒު ހިފާފައެވެ.
މީގެ އިތުރުން އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ މުޖުތަމަޢުގައި ގަނާކުރުމާއި ޖުވާކުޅުމާއި ވައްކަމާއި ފޭރުން، އަދި ޓެކުން، ހަށިވިއްކުން ފަދަ ނޭދެވޭ ކަންކަން ހުރި މިންވަރު ދެނެގަތުމަށްޓަކައި ދިރާސާތައް ކުރުމަށްވެސް ހަމަޖެހިފައިވާކަމަށެވެ.
2024 ވަނަ އަހަރެކޭ އެއްގޮތަށް މިއަހަރުވެސް ދީނީ ޝިއާރު ފުޅާކުރުމަށްޓަކައި މުހިއްމު މަސައްކަތްތަކެއް ކުރިއަށްގެންދިޔުމަށް ރާވާފައިވެއެވެ. އެގޮތުން ދުނިޔޭގެ އެކި ޢިލްމުވެރިންގެ އެހީތެރިކަމާއެކު ދަޢުވާގެ ކަންކަން ކުރިއަށް ގެންދިޔުމަށް މަގުފަހި ކުރުމަށްޓަކައި ބޭރުގެ ޤައުމުތަކާއެކު އެއްބަސްވުންތަކެއްގައި ސޮއިކުރުމަށް ހަމަޖެހިފައިވެއެވެ.
އަދި އިސްލާމް ކިޔަވައިދޭ މުދައްރިސުންގެ ދީނީ ބަސްމަގު އެއްގޮތްކުރުމަށްޓަކައި މަސައްކަތު ބައްދަލުވުންތަކާއި މަހާސިންތަކާއި ތަޖުރިބާ ދަތުރުތަކުގެ ފުރުޞަތުތައް ހޯދުމަށްވެސް މި އަހަރުގެ ޕްލޭންގައި ހިމަނާފައިވެއެވެ.